Andhra News: ఏపీలో ప్రతి 50 కి.మీ.లకు ఒక పోర్టు.. 2026 నాటికి 4 అందుబాటులోకి తేవాలని లక్ష్యం..

వ్రాసిన వారు Sirish Praharaju

Aug 26, 2025

08:11 am

ఈ వార్తాకథనం ఏంటి

ఏపీ ప్రభుత్వం ప్రస్తుతం నిర్మాణంలో ఉన్న రామాయపట్నం, మచిలీపట్నం, మూలపేట, కాకినాడ గేట్‌వే పోర్టుల పనులను వేగవంతం చేసి, 2026 నాటికి వినియోగంలోకి తేవాలని నిర్ణయించింది. ఈ క్రమంలో పోర్టుల అనుసంధానానికి అవసరమైన రహదారి, రైలు కనెక్టివిటీ ప్రాజెక్టులు కూడా ప్రతిపాదించారు. అంతేకాకుండా, పొరుగు రాష్ట్రాలకూ పోర్టు సేవలు అందించేందుకు తెలంగాణ, ఒడిశా రాష్ట్రాల్లో డ్రైపోర్టులను ఏర్పాటు చేసి, వాటిని నేరుగా పోర్టులకు అనుసంధానం చేసే ప్రణాళికలు సిద్ధం చేశారు. సముద్ర తీరం వెంట ప్రతి 50 కిలోమీటర్లకో పోర్టు నిర్మాణం చేసి, వాటి ఆధారంగా పరిశ్రమలను ఏర్పాటు చేస్తూ మొత్తం 20 పోర్టులను అభివృద్ధి చేయాలన్నదే ప్రభుత్వ ఆలోచన.

వివరాలు

రామాయపట్నం పోర్టు

ప్రస్తుతం ఈ పోర్టు నిర్మాణం 69 శాతం పూర్తయింది. వచ్చే ఏడాది జూన్‌లోపల పోర్టును వినియోగంలోకి తేవాలన్నదే ప్రభుత్వ లక్ష్యం. కేప్‌ సైజ్‌ నౌకలు రాకపోకలకు అనుకూలంగా ఉండేలా డ్రెడ్జింగ్‌ లోతును 16 మీటర్ల నుంచి 18.5 మీటర్లకు పెంచాలని నిర్మాణ సంస్థ ప్రతిపాదించింది. దీన్ని ప్రభుత్వం అంగీకరిస్తే, పనుల గడువు మరింత పొడిగించే అవకాశం ఉంది. మొదటి దశలో 4 బెర్తులు నిర్మించాలని లక్ష్యంగా పెట్టుకున్నారు. ఇప్పటివరకు ఒకటి పూర్తయింది. 3.7 కి.మీ. దక్షిణ బ్రేక్‌వాటర్‌, 1.35 కి.మీ. ఉత్తర బ్రేక్‌వాటర్‌ పనులు కొనసాగుతున్నాయి. ఈ పోర్టు జాతీయ రహదారి 16తో, ఉమ్మడి ప్రకాశం జిల్లా చేవూరు జంక్షన్‌ దగ్గర అనుసంధానం కానుంది.

వివరాలు

మచిలీపట్నం పోర్టు

2026 నవంబరు నాటికి పూర్తి చేయాలని లక్ష్యంగా పెట్టుకున్నారు. ఇప్పటివరకు 45.5 శాతం పనులు ముగిశాయి. మొదటి దశలో 4 బెర్తులు నిర్మిస్తారు. తర్వాతి దశల్లో 16 బెర్తుల వరకు విస్తరించే అవకాశం ఉంది. ఈ పోర్టు సంవత్సరానికి 36 మిలియన్‌ టన్నుల సరకు రవాణా సామర్థ్యాన్ని కలిగి ఉంటుంది. తెలంగాణలో ఒక డ్రైపోర్టును నిర్మించి, అక్కడి నుంచి సరుకును మచిలీపట్నం పోర్టుకు చేర్చే ప్రణాళిక సిద్ధమైంది. అదేవిధంగా, రూ.638 కోట్ల వ్యయంతో బీచ్‌ రోడ్డును ఆరు లేన్లుగా విస్తరించి, జాతీయ రహదారి 65తో అనుసంధానం చేసే ప్రతిపాదనను కేంద్రానికి పంపించారు.

వివరాలు

మూలపేట పోర్టు

ఈ పోర్టు నిర్మాణ పనుల్లో 54.01 శాతం పూర్తయ్యాయి. 2026 మే నాటికి పూర్తిచేసి వినియోగంలోకి తీసుకురావడమే లక్ష్యం. ఏడాదికి 25 నుంచి 30 మిలియన్‌ టన్నుల సరుకు రవాణా సామర్థ్యాన్ని కలిగేలా ప్రణాళికలు సిద్ధమయ్యాయి. ఒడిశా, ఉత్తరాంధ్ర జిల్లాల్లో డ్రైపోర్టులు నిర్మించి, వాటిని మూలపేట పోర్టుతో అనుసంధానిస్తారు. ఈ పోర్టును చెన్నై-కోల్‌కతా జాతీయ రహదారి 16తో టెక్కలి జంక్షన్‌ దగ్గర కలుపుతారు. అలాగే, హావ్‌డా-చెన్నై రైల్వే మార్గంతో కూడా అనుసంధానం జరగనుంది.