GVMC: గ్రేటర్ విశాఖలో టీడీపీలో చేరేందుకు సిద్ధమైన 74వ వార్డు కార్పొరేటర్
ఈ వార్తాకథనం ఏంటి
గ్రేటర్ విశాఖ మున్సిపల్ కార్పొరేషన్ (జీవీఎంసీ) మేయర్‌పై అవిశ్వాస తీర్మానం సమీపిస్తున్న వేళ, వైఎస్సార్ కాంగ్రెస్ పార్టీకి ఊహించని ఎదురు దెబ్బ తగిలింది. గాజువాక ప్రాంతానికి చెందిన 74వ వార్డు కార్పొరేటర్ తిప్పల వంశీ రెడ్డి,తెలుగుదేశం పార్టీలో చేరేందుకు సిద్ధమయ్యారు. ఇప్పటి వరకు వైసీపీలో ఉన్నవంశీ, ఇప్పుడు పార్టీకి గుడ్‌బై చెప్పడమే కాకుండా, ప్రత్యర్థి శిబిరంలో చేరడం రాజకీయంగా సంచలనం రేపింది. గమనించదగిన విషయం ఏమిటంటే, తిప్పల వంశీ రెడ్డి తండ్రి తిప్పల నాగిరెడ్డి 2019లో గాజువాక నియోజకవర్గం నుంచి జనసేన అధినేత పవన్ కల్యాణ్‌పై విజయాన్ని సాధించారు. గత ఎన్నికల్లో టికెట్ రాకపోయినప్పటికీ,ఆయన జగన్మోహన్ రెడ్డికి మద్దతుగా నిలిచారు.ప్రస్తుతానికి వంశీ సోదరుడు తిప్పల దేవన్ గాజువాక వైసీపీ ఇంఛార్జ్ బాధ్యతలు నిర్వహిస్తున్నారు.
వివరాలు
టీడీపీ రాష్ట్ర అధ్యక్షుడు పల్లా శ్రీనివాస్ ఆసక్తికర వ్యాఖ్యలు
ఇప్పటికే మూడు కార్పొరేటర్ల మద్దతు కూటమికి లభించిన తరుణంలో, మరో ముగ్గురిని తమ వైపు తిప్పుకోగలిగితే అవసరమైన మ్యాజిక్ ఫిగర్ చేరుకోవచ్చు. ఈ నేపథ్యంలో వైఎస్సార్‌సీపీ నుంచి ఇటీవలే కూటమిలో చేరిన వారు మరింత చురుగ్గా వ్యవహరిస్తున్నారు. రాజకీయం వేడి పుంజుకుంటున్న తరుణంలో టీడీపీ రాష్ట్ర అధ్యక్షుడు పల్లా శ్రీనివాస్ ఆసక్తికర వ్యాఖ్యలు చేశారు. అధికార పక్షంగా ఉన్న వైసీపీ నుండి ఒత్తిళ్లు లేకుండా కార్పొరేటర్లు తమ పార్టీలోకి వస్తున్నారని పేర్కొన్నారు. మేయర్ స్థానం కచ్చితంగా తమదేననే నమ్మకంతో ఉన్నట్లు ఆయన వెల్లడించారు.
వివరాలు
కూటమి మ్యాజిక్ ఫిగర్‌కు ఇంకా రెండు ఓట్లు దూరం
ఈ ఉదయం నుంచే ఓ హోటల్‌లో తిప్పల వంశీ రెడ్డితో టీడీపీ రాష్ట్ర అధ్యక్షుడు పల్లా శ్రీనివాస్, ఎమ్మెల్యేలు వెలగపూడి, వంశీ యాదవ్ కలిసి చర్చలు జరిపారు. అయినా కూడా, కూటమి మ్యాజిక్ ఫిగర్‌కు ఇంకా రెండు ఓట్లు దూరంగా ఉంది. అయినప్పటికీ, మేయర్ స్థానాన్ని కచ్చితంగా చేజిక్కించుకుంటామని కూటమి నేతలు ధీమా వ్యక్తం చేస్తున్నారు. అవిశ్వాసం చుట్టూ మంత్రణలు, ఒత్తిడులు పెరుగుతుండగా, మేయర్, డిప్యూటీ మేయర్ పోస్టుల పంపకాలపై కూటమిలో ఏకాభిప్రాయం లేకపోవడం సమస్యగా మారుతోంది. జనసేనలోని కొందరు కార్పొరేటర్లు డిప్యూటీ మేయర్ విషయంలో స్పష్టత లేనంత మాత్రాన క్యాంప్ రాజకీయాలకు వెళ్లలేమని చెప్పినట్టు సమాచారం. ఈ కారణంగా టీడీపీ, జనసేన నాయకత్వాలు పరస్పర చర్చలతో తీర్మానం కుదించే ప్రయత్నంలో ఉన్నాయి.
వివరాలు
19వ తేదీన జీవీఎంసీ కౌన్సిల్ ప్రత్యేక సమావేశం
ఇదిలా ఉండగా, క్యాంప్ రాజకీయాలు విదేశాలకే పయనించాయి. టీడీపీ కార్పొరేటర్లు మలేషియాలో తాత్కాలిక మకాం ఏర్పాటు చేస్తే, వైసీపీ తన మద్దతుదారులను శ్రీలంకకు తరలించింది. కమ్యూనిస్టు పార్టీలకు చెందిన ఇద్దరు సభ్యులు ఈ అవిశ్వాస ఓటింగ్‌కు దూరంగా ఉండనున్నారని తెలుస్తోంది. ఈ నెల 19వ తేదీన జీవీఎంసీ కౌన్సిల్ ప్రత్యేక సమావేశం జరుగనుంది. మేయర్ హరి వెంకట కుమారి ఈ అవిశ్వాస పరీక్షలో గెలుస్తారా లేదా అనేది అదే రోజున తేలనుంది. మొత్తం మీద, విశాఖ మేయర్ వ్యవహారం మరో కీలక మలుపు తీసుకోబోతున్నట్టు స్పష్టంగా కనిపిస్తోంది.