నేటి నుంచి తెలంగాణలో ఆషాఢ బోనాలు.. తొలి బోనం ఆ అమ్మవారికే
ఈ వార్తాకథనం ఏంటి
ఆషాఢ మాసం వచ్చేసింది. తెలంగాణలో బోనాల పండగ సందడి మొదలైంది. నేటి నుంచి ఆషాఢ బోనాలు ప్రారంభం కానున్నాయి.గోల్కొండలో తొట్టెల ఊరేగింపుతో తొలి బోనాలు మొదలుకానున్నాయి.
ఉత్సవాలతో దాదాపు నెల రోజులు హైదరాబాద్, సికింద్రాబాద్ జంట న‌గ‌రాలు సందడిగా మారనున్నాయి. బోనాల పండుగకు ఇప్పటికే ప్రభుత్వం ఏర్పాట్లు పూర్తిచేసింది. భక్తులకు ఏ ఇబ్బందులు తలెత్తకుండా చర్యలు చేపట్టింది.
మెహదీపట్నం పరిధిలోని లంగర్ హౌస్‌లో గోల్కొండ బోనాల తొట్టెల ఊరేగింపు పర్వం జరగనుంది.
తెలంగాణ మంత్రులు తలసాని శ్రీనివాస్ యాదవ్, ఇంద్రకరణ్ రెడ్డి, మహమూద్ అలీ బోనాల ఊరేగింపులో పాల్గొననున్నట్లు సమాచారం.
ఈ మేరకు తెలంగాణ ప్రభుత్వం తరపున ఆయా మంత్రులు అమ్మవారికి పట్టువస్త్రాలు సమర్పించనున్నారు. ఈ నేపథ్యంలో తొలి బోనం గోల్కొండలోనే ప్రారంభమవుతాయి.
DETAILS
ఉత్సవాలకు ప్రభుత్వం రూ.15 కోట్లు కేటాయించింది : మంత్రి తలసాని
ఏటా ఆషాఢ మాసంలో బోనాల పండుగను నిర్వహించడం ఆనవాయితీ. ఇందులో భాగంగానే ఎల్లమ్మను ప్రత్యేకంగా పూజిస్తారు. అనంతరం అమ్మవారికి భక్తి శ్రద్ధలతో ప్రత్యేక నైవేద్యాలను సమర్పిస్తారు.
మరోవైపు సికింద్రాబాద్ మహంకాళి బోనాల జాతర జూలై 9న ప్రారంభం కానుంది. అయితే ఊరేగింపును జూలై 10న నిర్వహించనున్నారు.
హైదరాబాద్ పాతబస్తీలో జూలై 16న బోనాల ఉత్సవం మొదలుకానుంది. జూలై 17న ఆలయ కమిటీ ఆధ్వర్యంలో ఊరేగింపు ఉత్సవాన్ని జరిపించనున్నారు.
బోనాల ఉత్సవ నిర్వహణపై మంత్రి తలసాని శ్రీనివాస్ యాదవ్ అన్ని శాఖల అధికారులతో సమీక్షా సమావేశం నిర్వహించారు.
బోనాలకు తెలంగాణ ప్రభుత్వం రూ.15 కోట్లు కేటాయించిందని మంత్రి తలసాని తెలిపారు. తెలంగాణ సంస్కృతిని చాటి చెప్పేలా ఈ ఉత్సవాలను జరిపిస్తామని మంత్రి స్పష్టం చేశారు.