Cm chandrababu: మూడు నెలల్లోగా ఏఐ ఆధారిత పన్నుల వ్యవస్థ.. ఆదాయార్జన శాఖల సమీక్షలో సీఎం చంద్రబాబు ఆదేశాలు
ఈ వార్తాకథనం ఏంటి
రాష్ట్ర భవిష్యత్‌లో ఆదాయాన్ని పెంచేందుకు, గత 30 ఏళ్ల డేటాను పరిగణలోకి తీసుకుని వృద్ధి ప్రణాళికలు రూపొందించాలని ముఖ్యమంత్రి నారా చంద్రబాబు నాయుడు ఆదాయార్జన శాఖలకు స్పష్టం చేశారు. ఇందుకు డిజిటల్ టెక్నాలజీ, ముఖ్యంగా ఎలక్ట్రానిక్స్, ఇన్ఫర్మేషన్ టెక్నాలజీ సేవలను విస్తృతంగా వినియోగించాల్సిన అవసరం ఉందని సూచించారు. ప్రతి శాఖలో ఆర్టిఫిషియల్ ఇంటెలిజెన్స్ (ఏఐ) బృందం తప్పనిసరిగా ఉండాలనీ, పన్ను చెల్లింపుదారులకు మరింత మెరుగైన సేవలు అందించేందుకు ఏఐ ఆధారిత పన్నుల నిర్వహణ వ్యవస్థను మూడు నెలల్లోగా అమలు చేయాలని ఆదేశించారు. ఈ విషయాలపై మంగళవారం సచివాలయంలో ఆదాయార్జన శాఖలపై సీఎం సమీక్ష నిర్వహించారు.
వివరాలు
ఆదాయార్జన శాఖలపై ముఖ్యమంత్రి సమీక్ష
"బంగారం కొనుగోళ్లలో దేశంలో అగ్రస్థానంలో ఉన్నప్పటికీ, ఆంధ్రప్రదేశ్‌లో పన్నుల రూపంలో వచ్చిన ఆదాయం తక్కువగా ఉండటం ఆలోచనీయమైంది," అని ముఖ్యమంత్రి వ్యాఖ్యానించారు. కర్ణాటక, తమిళనాడు రాష్ట్రాల్లో రవాణా శాఖ ద్వారా అధిక ఆదాయం రాగా, మన రాష్ట్రంలో మాత్రం తక్కువగా ఉండటానికి కారణాలపై విశ్లేషణ చేయాలన్నారు. అవసరమైన చర్యలు తీసుకుని, నెలవారీ ఆదాయ లక్ష్యాలను అధిగమించేలా శాఖలు కృషి చేయాలని సూచించారు. అక్రమ మద్యం రవాణాపై కఠిన చర్యలు పొరుగు రాష్ట్రాల నుంచి అక్రమంగా మద్యం తీసుకురావడాన్ని పూర్తిగా అరికట్టాలని,మద్యం సరఫరా నుంచి అమ్మకం వరకూ ప్రతి దశను రియల్ టైమ్‌లో ట్రాక్ చేయాల్సిన అవసరం ఉందని చెప్పారు. మద్యం అమ్మకాల్లో పారదర్శకత ఉండాలనీ,రాష్ట్ర ఆదాయాన్ని పెంచేందుకు కొత్త మార్గాలను అన్వేషించాలన్నారు.
వివరాలు
కేంద్రం సహాయం ప్రాథమికం మాత్రమే
కేంద్ర ప్రభుత్వం నుంచి వచ్చే సహాయం,అప్పులు తాత్కాలికంగా ఉపయోగపడతాయని,దీని ద్వారా వాస్తవ అభివృద్ధిని సాధించలేమని సీఎం స్పష్టం చేశారు. కొన్ని శాఖలు ఒక్క ఏడాది వ్యవధిలో కూడా ఆశించిన పురోగతిని సాధించలేకపోయాయని ఆయన అసంతృప్తి వ్యక్తం చేశారు. ఎర్రచందనం వ్యాపారంపై ప్రత్యేక కమిటీ రాష్ట్రానికి మాత్రమే ప్రత్యేకమైన ఎర్రచందనం వనరులపై దృష్టి పెట్టాలన్నారు. రాష్ట్రంలో ఉన్న ఎర్రచందనం నిల్వలపై ఖచ్చితమైన లెక్కలు వేసి, వాటి విలువను అంచనా వేసి, అంతర్జాతీయ మార్కెట్‌లో విక్రయించేందుకు ప్రత్యేక కమిటీని ఏర్పాటు చేయాలని ముఖ్యమంత్రి ఆదేశించారు.
వివరాలు
2025-26 ఆర్థిక సంవత్సరానికి లక్ష్యం - రూ.1.34 లక్షల కోట్లు
వాణిజ్య పన్నులు,ఎక్సైజ్‌, స్టాంపులు,రిజిస్ట్రేషన్, గనులు, అటవీ శాఖల ద్వారా వచ్చే అన్ని ఆదాయాలను కలిపి, రాష్ట్రం 2025-26 సంవత్సరానికి రూ.1,34,208 కోట్లు స్వంత ఆదాయం లక్ష్యంగా పెట్టుకుందని అధికారులు ముఖ్యమంత్రికి వివరించారు. ఇది గత సంవత్సరంతో పోల్చితే సుమారు 29 శాతం అధికమని తెలిపారు. అయితే ఈ ఆర్థిక సంవత్సరం ఏప్రిల్ 1 నుంచి మే 11 వరకు వాణిజ్య పన్నులు, అటవీ శాఖల ఆదాయం తగ్గగా, స్టాంపులు, రిజిస్ట్రేషన్ శాఖ ఆదాయం పెరిగిందని వివరించారు. ఇదే కాలంలో కేంద్ర ప్రభుత్వం నుంచి రూ.12,717 కోట్లు మాత్రమే అందాయని చెప్పారు. గత ఏడాది ఇదే సమయంలో రూ.17,170 కోట్లు వచ్చిన నేపథ్యంలో ఇది 29 శాతం తక్కువగా ఉందని తెలిపారు.
వివరాలు
ఎక్సైజ్‌ పాలసీతో ఆదాయం వృద్ధి
రాష్ట్రంలో అమలు చేసిన కొత్త ఎక్సైజ్‌ పాలసీ వల్ల ఆదాయంలో స్పష్టమైన వృద్ధి నమోదైందని అధికారులు పేర్కొన్నారు. గత నెలలో ఒక్కటే రూ.2,116 కోట్ల ఆదాయం వచ్చింది. మొత్తం 2024-25 సంవత్సరంలో ఎక్సైజ్‌ ఆదాయం రూ.28,842 కోట్లకు చేరిందని, ఇది గత సంవత్సరంతో పోల్చితే 14.84 శాతం అధికమని వివరించారు. ఈ ఏడాదికి మొత్తం ఎక్సైజ్‌ ఆదాయాన్ని రూ.33,882 కోట్లు గా అంచనా వేస్తున్నట్లు తెలిపారు. అయితే తెలంగాణ, తమిళనాడు, కర్ణాటక వంటి పొరుగు రాష్ట్రాలతో పోల్చితే, ఆంధ్రప్రదేశ్‌లో ఎక్సైజ్‌ ఆదాయం ఇప్పటికీ తక్కువగానే ఉందని వారు గుర్తించారు.