Congress: సోనియా గాంధీపై వ్యాఖ్యలు.. అమిత్ షాపై కాంగ్రెస్ 'సభా హక్కుల ఉల్లంఘన నోటీసు''..
ఈ వార్తాకథనం ఏంటి
కాంగ్రెస్ అధినేత్రి సోనియా గాంధీపై ''నిందించే వ్యాఖ్యలు'' చేసినందుకు కేంద్ర హోంమంత్రి అమిత్ షాపై ఆ పార్టీ బుధవారం ''సభా హక్కుల ఉల్లంఘన తీర్మానం'' ప్రవేశపెట్టింది. కాంగ్రెస్ ప్రధాన కార్యదర్శి జైరామ్ రమేష్ ఈ నోటీసులను సభలో సమర్పించారు. రాజ్యసభలో అమిత్ షా, సోనియా గాంధీపై ఉద్దేశపూర్వకంగా నిరాధార ఆరోపణలు చేసి, ఆమె ప్రతిష్టను దిగజార్చే ప్రయత్నం చేశారని జైరాం రమేష్ రాజ్యసభ ఛైర్మన్ జగదీప్ ధన్కర్ కు రాసిన లేఖలో పేర్కొన్నారు. ప్రవర్తనా నియమావళిలోని 188వ నిబంధన ప్రకారం ప్రత్యేక హక్కుల నోటీసులు సమర్పించారు.
వివరాలు
రాజ్యసభలో విపత్తు నిర్వహణ బిల్లు - 2024పై చర్చ
''హోం మంత్రి సోనియా గాంధీ పేరును నేరుగా ప్రస్తావించకపోయినా,ఆమె గురించి స్పష్టంగా ప్రస్తావించి ఆరోపణలు చేశారు.ఆమెపై నిరాధారమైన ఆరోపణలు చేయడమే కాకుండా, ఆమె గౌరవాన్ని కించపరిచే ప్రయత్నం చేశారు. అమిత్ షా చేసిన ప్రకటన పూర్తిగా అసత్యం, పరువు నష్టం కలిగించేవి'' అని లేఖలో వివరించారు. మార్చి 25న రాజ్యసభలో విపత్తు నిర్వహణ బిల్లు - 2024పై జరిగిన చర్చలో అమిత్ షా చేసిన వ్యాఖ్యలను జైరాం రమేష్ ప్రస్తావించారు.
వివరాలు
అమిత్ షా సభను మోసగించారని విమర్శించిన జైరాం రమేష్
''ప్రధానమంత్రి జాతీయ సహాయ నిధిని కాంగ్రెస్ పాలనలో స్థాపించారు. PM-CARES నిధిని ప్రధానమంత్రి నరేంద్ర మోదీ నేతృత్వంలోని NDA ప్రభుత్వం ప్రారంభించింది. కాంగ్రెస్ పాలనలో దేశాన్ని ఒకే కుటుంబం నియంత్రించేది'' అని అమిత్ షా వ్యాఖ్యానించారు. నేరుగా ఎవరి పేరు ప్రస్తావించకపోయినా, కాంగ్రెస్ నేతలు ప్రధానమంత్రి రిలీఫ్ ఫండ్‌లో కీలక పాత్ర వహించేవారని సూచించారు. ఈ వ్యాఖ్యలు వివాదాస్పదమవడంతో, జైరాం రమేష్, అమిత్ షాపై సభా హక్కుల ఉల్లంఘన ఆరోపణలు చేస్తూ, ఆయన సభను మోసగించారని విమర్శించారు.