Cyclone Fengal: పుదుచ్చేరి సమీపంలో 17 గంటల పాటు కేంద్రీకృతమైన ఫెయింజల్‌ తుపాన్‌.. ఉత్తర తమిళనాడు వ్యాప్తంగా భారీ వర్షాలు
ఈ వార్తాకథనం ఏంటి
బంగాళాఖాతంలో ఏర్పడిన తుపాను 'ఫెయింజల్‌' శనివారం అర్ధరాత్రి పుదుచ్చేరి సమీప తీరాన్ని తాకింది. ఆ ప్రాంతంలోనే దీర్ఘకాలం నిలిచి విస్తృత ప్రభావం చూపింది. గంటకు 90 కి.మీ. వేగంతో గాలులు వీచడం, విపరీత వర్షాలు కురవడంతో పుదుచ్చేరి నగరం తీవ్రంగా దెబ్బతింది. తమిళనాడులోని పలు జిల్లాల్లో కూడా భారీ వర్షాలు పడ్డాయి. తుపాను తీరాన్ని తాకిన వెంటనే బలహీనపడుతుందని అంచనా వేసిన వాతావరణ శాఖ అంచనాలు తప్పిపోయాయి. శనివారం రాత్రి నుంచి ఆదివారం మధ్యాహ్నం వరకు దాదాపు 17 గంటల పాటు తుపాను పుదుచ్చేరి సమీపంలోనే కేంద్రీకృతమై ఉంది. వాయుగుండంగా మారిన ఈ తుపాను పశ్చిమ దిశగా కదులుతుండగా, పుదుచ్చేరి, తమిళనాడు పలు ప్రాంతాల్లో రెడ్‌ అలర్ట్‌ను కొనసాగించారు.
వివరాలు
30 ఏళ్లలో ఎప్పుడూ లేనంతగా..
తమిళనాడులోని విల్లుప్పురం జిల్లాలో 24 గంటల్లో 51 సెం.మీ., పుదుచ్చేరి ప్రాంతంలో 49 సెం.మీ. వర్షపాతం నమోదైంది. ఈ ప్రాంతంలో గత 30 ఏళ్లలో ఇంత వర్షపాతం నమోదు కాలేదు. గంటకు 70-90 కి.మీ. వేగంతో గాలులు వీచడంతో చెట్లు, విద్యుత్‌ స్తంభాలు కూలిపోయాయి. పుదుచ్చేరి నగరంలో శనివారం రాత్రి నుంచి విద్యుత్‌ సరఫరా నిలిచిపోయింది. వరద నీరు ఇళ్లలోకి చేరడంతో ప్రజలు భవనాల పై అంతస్తులకు చేరుకున్నారు. పాఠశాలలను పునరావాస కేంద్రాలుగా మార్చి, 208 తాత్కాలిక శిబిరాలు ఏర్పాటు చేశారు. రెస్క్యూ సిబ్బందితో సహా ఆర్మీ కూడా సహాయక చర్యల్లో పాల్గొంది.
వివరాలు
చెన్నై, పుదుచ్చేరిలో ప్రాణ నష్టం
చెన్నైలో విద్యుదాఘాతంతో ముగ్గురు, పుదుచ్చేరిలో ఇద్దరు మరణించారు. చెన్నైలో ఓ వ్యక్తి ఏటీఎంలో డబ్బులు డ్రా చేస్తుండగా కరెంట్‌ షాక్‌కు గురయ్యారు. పుదుచ్చేరిలో వరద నీటిలో ఇద్దరి మృతదేహాలను వెలికితీశారు. తమిళనాడులో ఆకస్మిక వరదల కారణంగా ప్రజలను పునరావాస కేంద్రాలకు తరలించారు. విమానానికి తప్పిన ప్రమాదం శనివారం పుదుచ్చేరిలో గాలుల దాటికి ఇండిగో విమానానికి రన్‌వేపై ల్యాండింగ్ సమయంలో కుదుపునకు లోనైంది. పైలట్ అప్రమత్తతతో విమానాన్ని మళ్లీ గాల్లోకి తీసుకెళ్లారు. ఆదివారం నుంచి విమాన రాకపోకలు పునరుద్ధరించబడినా, కొన్ని సర్వీసులు రద్దయ్యాయి. ఈ తుపాను ప్రభావం పుదుచ్చేరి, తమిళనాడులోని ప్రజల జీవనాన్ని గణనీయంగా ప్రభావితం చేసింది. సహాయక చర్యలు ఇంకా కొనసాగుతున్నాయి.