Manipur: మణిపూర్‌లో డెంగ్యూ విజృంభణ.. ఇప్పటివరకు 448 కేసులు నమోదు.. ఒకరి మృతి
ఈశాన్య భారతదేశం మణిపూర్‌లో డెంగ్యూ వేగంగా వ్యాప్తి చెందుతోంది. రాష్ట్రవ్యాప్తంగా గత నెల రోజుల నుంచి డెంగ్యూ కేసుల సంఖ్య పెరుగుతూ వస్తోంది. ఈ వైరస్ కారణంగా వెస్ట్ ఇంఫాల్ జిల్లాలో ఒక మరణం కూడా చోటుచేసుకుంది. సెప్టెంబర్ నాటికి మొత్తం 448 డెంగ్యూ కేసులు నమోదయ్యాయి. వీటిలో అత్యధికంగా 259 కేసులు ఇంఫాల్ వెస్ట్‌లో, 117 కేసులు ఇంఫాల్ ఈస్ట్‌లో నమోదయ్యాయని అధికారులు తెలిపారు. ఈ విషయాన్ని మణిపూర్ ఆరోగ్య శాఖ మంత్రి సపమ్ రంజన్ సింగ్ ధృవీకరించారు. విలేకరుల సమావేశంలో ఆయన ఆగస్టులో 148 కేసులు నమోదైనట్లు, సెప్టెంబర్ 13 నాటికి ఈ సంఖ్య 230కి పెరిగిందని వెల్లడించారు.
మణిపూర్‌లో 2,548 డెంగ్యూ కేసులు
డెంగ్యూ వ్యాప్తిని నివారించేందుకు అధికారులు ప్రయత్నాలు చేస్తున్నారని, ఆరోగ్య శాఖ తగిన ఏర్పాట్లు చేసినట్లు చెప్పారు. డెంగ్యూ పాజిటివ్ రోగులు ఉన్న ప్రాంతాల్లో 100 మీటర్ల పరిధిలో ఫాగింగ్ నిర్వహిస్తున్నట్లు వివరించారు. ఇంకా, ఇన్‌ఫెక్షన్‌ నియంత్రణకు సమాజ భాగస్వామ్యం అవసరమని, ప్రజలు తగిన జాగ్రత్తలు తీసుకోవాలని మంత్రి సూచించారు. పూల కుండీలతో సహా ఇంట్లో,పరిసరాల్లో నిల్వ నీరు లేకుండా చూసుకోవాలని సూచించారు. డెంగ్యూపై పోరాటంలో దోమల ఉత్పత్తి కేంద్రాలను నిర్మూలించడం ముఖ్యమని అన్నారు. ఆరోగ్య శాఖ డేటా ప్రకారం, గతేడాది మణిపూర్‌లో 2,548 డెంగ్యూ కేసులు నమోదయ్యాయి. వీటిలో ఇంఫాల్ వెస్ట్‌లో 1,639, ఇంఫాల్ ఈస్ట్‌లో 521 కేసులు ఉండగా, అప్పట్లో మరణాలు సంభవించలేదని తెలిపారు.
