ఉత్తర్‌ప్రదేశ్, హర్యానాలో భూకంపం, రిక్టర్ స్కేలుపై 3.2తీవ్రత నమోదు
హర్యానా, ఉత్తరప్రదేశ్‌లోని కొన్ని ప్రాంతాల్లో శుక్రవారం రాత్రి భూ ప్రకంపం సంభవించింది. స్వల్పంగా భూమి కంపించడంతో స్థానికులు భయాందోళనకు గురయ్యారు. ఈ క్రమంలో ఇళ్లలోని వస్తువులు స్వల్పంగా కదిలాయి. ఈ భూకంప తీవ్రత రిక్టర్ స్కేలుపై 3.2గా నమోదైనట్లు నేషనల్ సెంటర్ ఫర్ సిస్మోలజీ తెలిపింది. హర్యానా, యూపీ సరిహద్దులను పంచుకునే దేశ రాజధాని దిల్లీలో జనవరి 24న భూమి కంపించింది.
షామ్లీలో 5 కిలోమీటర్ల లోతులో భూకంప కేంద్రం
హర్యానా సరిహద్దుతో పాటు పశ్చిమ ఉత్తరప్రదేశ్‌లో భూమి కంపించినట్లు నేషనల్ సెంటర్ ఫర్ సిస్మోలజీ వెల్లడించింది. పశ్చిమ ఉత్తరప్రదేశ్‌లోని షుగర్ బెల్ట్ అయిన షామ్లీలో 5 కిలోమీటర్ల లోతులో భూకంప కేంద్రం కేంద్రీకృతమైనట్లు పేర్కొంది. ఒకవైపు ఉత్తరాఖండ్, జమ్ముకశ్మీర్‌లో భూమి కుంగిపోతుండగా, మరోవైపు తరుచూ భూకంపాలు సంభవిస్తుండటంతో ఆయా రాష్ట్రాల ప్రజలు ఆందోళనకు చెందుతున్నారు.
