Robert Vadra: హర్యానాలో భూ అక్రమాలు.. రాబర్ట్ వాద్రాకు రెండోసారి ఈడీ సమన్లు
ఈ వార్తాకథనం ఏంటి
కాంగ్రెస్ పార్టీకి చెందిన వయనాడ్ ఎంపీ ప్రియాంక గాంధీ భర్త అయిన రాబర్ట్ వాద్రా ఓ కీలక కేసులో చిక్కుకున్నాడు.
హర్యానాలోని శిఖోపూర్ గ్రామంలో జరిగిన భూ లావాదేవీ విషయంలో కేంద్ర దర్యాప్తు సంస్థ (ఎన్‌ఫోర్స్‌మెంట్ డైరెక్టరేట్ - ED) ఆర్థిక అక్రమాలను విచారిస్తోంది.
రాబర్ట్ వాద్రాకు చెందిన సంస్థ "స్కైలైట్ హాస్పిటాలిటీ" ఈ భూ ఒప్పందంలో భాగంగా ఉండటంతో, తాజాగా ఏప్రిల్ 15న ఈడీ అతనికి రెండోసారి సమన్లు జారీ చేసింది.
ఇప్పటికే ఏప్రిల్ 8న మొదటిసారి సమన్లు పంపినప్పటికీ, వాటికి వాద్రా స్పందించకపోవడం గమనార్హం.
విచారణ కోసం తక్షణమే హాజరుకావాలని కేంద్ర ఏజెన్సీ మరోసారి అతనికి స్పష్టమైన ఆదేశాలు జారీ చేసింది.
వివరాలు
ఈ ఒప్పందంలో మనీలాండరింగ్..
వివరాల్లోకి వెళితే.. రాబర్ట్ వాద్రా కంపెనీ 2008 ఫిబ్రవరిలో హర్యానాలోని గుర్గావ్ సమీపంలోని శిఖోపూర్ ప్రాంతంలో 3.5 ఎకరాల భూమిని ఓంకారేశ్వర్ ప్రాపర్టీస్ అనే సంస్థ నుండి సుమారు రూ.7.5 కోట్లకు కొనుగోలు చేసింది.
ఆ తర్వాత కొద్ది కాలానికే అదే భూమిని ప్రముఖ రియల్ ఎస్టేట్ సంస్థ అయిన డీఎల్‌ఎఫ్‌కు రూ.58 కోట్లకు అమ్మింది.
ఈ భారీ లాభం వెనుక ఉన్న అసలు ఆర్థిక వ్యవహారాలను ఈడీ అనుమానిస్తోంది.
ఈ ఒప్పందంలో మనీలాండరింగ్ జరిగిందన్న అనుమానంతో రాబర్ట్ వాద్రా లావాదేవీలపై కేంద్ర దర్యాప్తు సంస్థ మేల్కొంది.
ఆకస్మికంగా వచ్చిన ఈ లాభాల మూలాలను, డబ్బు ప్రవాహాన్ని గమనిస్తూ లోతైన విచారణ జరుపుతోంది.