Uttarakhand: ఉత్తరాఖండ్‌లో ఘోర రోడ్డుప్రమాదం.. బస్సు లోయలో పడి 30 మంది దుర్మరణం
ఉత్తరాఖండ్‌లో ఘోర రోడ్డుప్రమాదం చోటుచేసుకుంది. పెళ్లి బృందంతో ప్రయాణిస్తున్న బస్సు 200 అడుగుల లోతులో ఉన్న లోయలో పడిపోయింది. ఈ ప్రమాదంలో సుమారు 25 నుంచి 30 మంది వరకు మరణించినట్లు సమాచారం. శుక్రవారం రాత్రి 8 గంటల సమయంలో ఈ ఘటన చోటు చేసుకుంది. బస్సులో అప్పటివరకు 50-55 మంది ప్రయాణికులు ఉన్నట్లు తెలుస్తోంది. బస్సు డ్రైవర్ పట్టు కోల్పోవడంతో ఈ ఘోర ప్రమాదం సంభవించినట్లు పోలీసులు భావిస్తున్నారు. ప్రమాదం జరిగిన వెంటనే సమాచారం అందుకున్న పోలీసులు, ఎస్డీఆర్ఎఫ్ బృందం ఘటన స్థలానికి చేరుకుని సహాయక చర్యలను ప్రారంభించారు.
ఘటనా స్థలాన్ని పరిశీలించిన ఎమ్మెల్యే
క్షతగాత్రులను సమీప ఆస్పత్రికి తరలించి, చికిత్స అందిస్తున్నారు. ఈ బస్సు ప్రమాదం వధువు ఇంటికి కేవలం 2 కిలోమీటర్ల దూరంలో జరిగింది. హరిద్వార్ జిల్లా లాల్ ధంగ్ నుంచి పౌడిలోని బిరోంఖాల్‌కు వెళ్తున్న సమయంలో ఈ ప్రమాదం చోటుచేసుకుంది. స్థానిక ఎమ్మెల్యే రీతూ ఖండూరి సంఘటనా స్థలాన్ని పరిశీలించి, ఆస్పత్రిలో చికిత్స బాధితులను పరామర్శించారు. ఈ ఏడాది జూన్‌లో కూడా గంగోత్రి నేషనల్ హైవేపై ప్రయాణికులతో వెళ్తున్న బస్సు అదుపు తప్పి వాగులో పడటంతో ముగ్గురు మరణించగా, 24 మంది గాయపడ్డారు.
