దిల్లీలోని సాకేత్ కోర్టులో కాల్పులు; మహిళకు గాయాలు
ఈ వార్తాకథనం ఏంటి
దిల్లీలోని సాకేత్ జిల్లా కోర్టు కాంప్లెక్స్‌లో సస్పెండ్ అయిన న్యాయవాది శుక్రవారం కాల్పులు జరపడంతో ఒక మహిళ గాయపడినట్లు పోలీసులు తెలిపారు. డీసీపీ (సౌత్) చందన్ చౌదరి తెలిపిన వివరాలు ఇలా ఉన్నాయి. ఉదయం 10:30 గంటలకు కోర్టు ఆవరణలో నాలుగు నుంచి ఐదు రౌండ్లు తుపాకీ కాల్పులు జరిపారు. ఎం.రాధ అనే మహిళకు రెండు బుల్లెట్ గాయాలయ్యాయి. ఆమెను సాకేత్‌లోని మాక్స్ ఆసుపత్రికి తరలించగా, ప్రస్తుతం ఆమె పరిస్థితి నిలకడగా ఉందని వైద్యులు చెప్పారు.
తుపాకీ కాల్పులు
దిల్లీలో శాంతిభద్రతలు పూర్తిగా దెబ్బతిన్నాయ్: కేజ్రీవాల్
కాల్పులు జరిపిన వ్యక్తిని కామేశ్వర్ ప్రసాద్ సింగ్ అలియాస్ బినోద్ సింగ్‌గా గుర్తించారు. అతనిపై చీటింగ్ కేసులు నమోదు చేయడంతో బార్ కౌన్సిల్ అతన్ని సస్పెండ్ చేసినట్లు డీసీపీ (సౌత్) తెలిపారు. ఆర్థిక లావాదేవీలే ఈ కాల్పులకు కారణంగా తెలుస్తోంది. సాకేత్ కోర్టులో పరిస్థితి సాధారణంగానే ఉందని పోలీసులు తెలిపారు. నిందితుడిని పట్టుకునేందుకు బృందాలను ఏర్పాటు చేశారు. సాకేత్ కోర్టులో కాల్పులపై దిల్లీ ముఖ్యమంత్రి అరవింద్ కేజ్రీవాల్ స్పందించారు. దేశ రాజధానిలో శాంతిభద్రతలు పూర్తిగా దెబ్బతిన్నాయని అన్నారు.