భారత్‌లో అంతర్జాతీయ ఈవెంట్.. అక్టోబర్ 12 నుంచి G20 పార్లమెంట్ స్పీకర్ల సమావేశం
ఈ వార్తాకథనం ఏంటి
దిల్లీ వేదికగా G-20 దేశాల శిఖరాగ్ర సమావేశం అనంతరం మరో అంతర్జాతీయ కార్యక్రమాన్ని నిర్వహించేందుకు కేంద్ర ప్రభుత్వం సిద్ధమైంది. ఈ మేరకు P-20 పార్లమెంట్ స్పీకర్ల సమావేశం జరగనుంది.
G-20 కూటమి దేశాలకు చెందిన పార్లమెంట్ స్పీకర్ల సమావేశం వచ్చే నెలలో దిల్లీలో జరగనుంది. అక్టోబర్ 12 నుంచి 14 వరకు పార్లమెంట్ స్పీకర్ల భేటీ నిర్వహించేందుకు యంత్రాంగం సన్నద్ధమవుతోంది.
సభ్య దేశాలు, ఆహ్వానిత దేశాల పార్లమెంట్ ప్రిసైడింగ్ అధికారులతో చర్చలు జరపనున్నట్లు G-20 ప్రత్యేక కార్యదర్శి ముక్తేశ్‌ పర్దేశి వెల్లడించారు.
DETAILS
ప్రజాస్వామ్యానికే భారత్ తల్లి అని చాటి చెబుతాం : ముక్తేశ్‌ పర్దేశి
పార్లమెంట్ నూతన భవనంలో G20 దేశాల పార్లమెంటు స్పీకర్‌లు, ప్రిసైడింగ్ అధికారులకు సంబంధించిన సమావేశం అక్టోబర్ 12 నుంచి జరుగుతుందని పర్దేశి అన్నారు.
ప్రజాస్వామ్యానికే భారత్ తల్లి అని, దిల్లీలో వివిధ పార్లమెంట్ స్పీకర్లతో కలిసి కీలక సందేశం రూపొందిస్తామన్నారు. పార్లమెంటేరియన్లు సంబంధిత ప్రభుత్వాలకు మార్గనిర్దేశం చేయడంలో కీలక పాత్ర పోషిస్తారని గుర్తు చేశారు. ఈ మేరకు P-20 సమావేశాలు ప్రపంచ పాలనకు గీటురాయిగా ఉంటుందన్నారు.
పార్లమెంటరీ కోణాన్ని తీసుకురావడం, వాటిపై అవగాహన పెంచడం, అంతర్జాతీయ నిబంధనలకు రాజకీయ మద్దతును కూడగట్టి సమర్థంగా అమలు చేయడమే సమావేశాల గమ్యమన్నారు.
భారతదేశాన్ని ప్రజాస్వామ్యానికి తల్లిగా చాటి చెప్పేందుకు ఉద్దేశించిన ఓ ఎగ్జిబిషన్‌ను ఏర్పాటు చేసినట్లు వివరించారు.