APSRTC : ప్రయాణికులకు శుభవార్త.. దసరా సందర్భంగా 6100 ప్రత్యేక బస్సులు
ఈ వార్తాకథనం ఏంటి
దసరా పండుగను పురస్కరించుకొని, ఏపీఎస్‌ఆర్టీసీ ప్రయాణికులకు శుభవార్త అందించింది.
తిరుమల వేంకటేశ్వరుడి బ్రహ్మోత్సవాలు, బెజవాడ కనకదుర్గమ్మ నవరాత్రి ఉత్సవాలు, విద్యాసంస్థలకు దసరా సెలవుల నేపథ్యంలో 6,100 ప్రత్యేక బస్సు సర్వీసులు ఏర్పాటు చేసినట్లు సోమవారం పేర్కొంది.
అక్టోబరు 4 నుంచి 11 వరకు 3,040 ప్రత్యేక బస్సులు, పండుగ తర్వాత 3,060 ప్రత్యేక సర్వీసులు అందుబాటులో ఉంటాయని ఆర్టీసీ పేర్కొంది.
ఈ ప్రత్యేక బస్సుల్లో ఎలాంటి అదనపు ఛార్జీలు ఉండవని, సాధారణ రోజుల్లో ఉండే టిక్కెట్ ధరలే వర్తిస్తాయని విజయవాడ ఆర్టీసీ స్పష్టం చేసింది.
దసరా సందర్భంగా రాష్ట్రంలోని వివిధ ప్రాంతాల నుంచి హైదరాబాద్‌, బెంగళూరు, చెన్నై వంటి ప్రధాన నగరాలకు ఆర్టీసీ బస్సులను నడపనుంది.
Details
రాష్ట్రంలోని అన్ని పట్టణాలకు ప్రత్యేక బస్సులు
దుర్గా శరన్నవరాత్రుల సమయంలో విజయవాడకు వచ్చే భక్తుల సంఖ్యను దృష్టిలో పెట్టుకొని, రాష్ట్రంలోని అన్ని నగరాలు, పట్టణాల నుంచి ప్రత్యేక బస్సులు నడవనున్నాయి.
దసరాకు ముందు ప్రత్యేకంగా, హైదరాబాద్‌ నుంచి 990, బెంగళూరు నుంచి 275, చెన్నై నుంచి 65 ప్రత్యేక బస్సులను ఏర్పాటు చేశారు.
విశాఖ నుంచి 320, రాజమండ్రి నుంచి 260, విజయవాడ నుంచి 400 బస్సులను కూడా నడపనున్నారు.
దసరా తర్వాత, హైదరాబాద్‌ నుంచి 990, బెంగళూరు నుంచి 330, చెన్నై నుంచి 70 బస్సులు నడుస్తాయని ఆర్టీసీ తెలిపింది.
Details
ప్రయాణికుల కోసం యూటీఎస్ మెషిన్లు
విజయవాడకు భవానీ భక్తులు ఎక్కువగా వస్తుండడంతో పొరుగు రాష్ట్రాలతో పాటు రాష్ట్రంలోని వివిధ ప్రాంతాల నుంచి 1,100 ప్రత్యేక బస్సులు నడుపనున్నట్లు ఆర్టీసీ ప్రకటించింది.
ప్రయాణికులకు టిక్కెట్లలో చిల్లర సమస్యలు ఏర్పడకుండా యూటీఎస్ మెషిన్లు అందుబాటులో ఉంచనున్నట్లు వెల్లడించింది.
ఫోన్‌పే, గూగుల్‌పే, క్యూఆర్ కోడ్ స్కాన్, క్రెడిట్, డెబిట్ కార్డుల ద్వారా టిక్కెట్లు పొందే అవకాన్ని కల్పించింది. ముందస్తు రిజర్వేషన్‌ చేసుకున్న వారికి టిక్కెట్ ధరలో 10శాతం రాయితీ అందించనున్నారు.