Monsoon Session: కేంద్ర ప్రభుత్వం కీలక నిర్ణయం.. జులై 21 నుంచి పార్లమెంట్ వర్షాకాల సమావేశాలు
ఈ వార్తాకథనం ఏంటి
పహల్గాం ఉగ్రదాడి అనంతరం భారత సైన్యం చేపట్టిన 'ఆపరేషన్ సిందూర్' అంశంపై ప్రత్యేక పార్లమెంట్ సమావేశం నిర్వహించాలని విపక్ష పార్టీలు గట్టిగా డిమాండ్ చేస్తున్నాయి.
ఈ క్రమంలో కేంద్ర ప్రభుత్వం తాజా నిర్ణయం తీసుకుంది. పార్లమెంట్ వర్షాకాల సమావేశాల తేదీలను అధికారికంగా ప్రకటించింది.
పార్లమెంటరీ వ్యవహారాల శాఖ మంత్రి కిరణ్ రిజిజు బుధవారం వెల్లడించిన ప్రకారం,జూలై 21 నుండి ఆగస్టు 12వ తేదీ వరకు వర్షాకాల సమావేశాలు జరగనున్నాయి.
ఈ 23 రోజుల సమావేశాల్లో పహల్గాం దాడి తర్వాత సాగించిన ఆపరేషన్ సిందూర్‌పై చర్చకు అవకాశం ఉండనున్నట్లు సమాచారం.
అంతేకాకుండా,ఈ సమావేశాల్లో కేంద్ర ప్రభుత్వం పలు కీలక బిల్లులను కూడా ప్రవేశపెట్టనుంది. జాతీయ భద్రత,ఆర్థిక పరిపాలన అంశాలపై కూడా చర్చలు సాగే అవకాశముంది.
వివరాలు
ప్రధానిని కోరిన ఎంపీలు
పహల్గాం దాడికి ప్రతిస్పందనగా భారత ఆర్మీ 'ఆపరేషన్ సిందూర్' పేరిట పాక్ వైమానిక స్థావరాలపై లక్ష్యంగా దాడులు నిర్వహించింది.
అయితే, ఈ ఆపరేషన్ విజయానికి దగ్గరగా ఉన్న సమయంలోనే మోదీ ప్రభుత్వం కాల్పుల విరమణకు అంగీకరించడంపై దేశవ్యాప్తంగా అనేక అనుమానాలు,ప్రశ్నలు ఊపందుకున్నాయి.
ఈ అంశంపై ప్రధాని నరేంద్ర మోదీ సహా ప్రభుత్వం నుంచి ఎవరు స్పష్టమైన ప్రకటన చేయకపోవడం విపక్షాల ఆగ్రహానికి దారితీసింది.
ఈ నేపథ్యంలో పహల్గాం దాడి, ఆపరేషన్ సిందూర్‌పై చర్చించేందుకు పార్లమెంట్‌లో ప్రత్యేక సమావేశం ఏర్పాటు చేయాలంటూ 16 విపక్ష పార్టీలు కలిసి మంగళవారం ప్రధానికి లేఖ రాశాయి.
ఈ లేఖపై లోక్‌సభకు చెందిన 200 మందికిపైగా విపక్ష ఎంపీలు సంతకాలు చేశారు.
వివరాలు
చర్చకు పట్టుబడుతున్న విపక్షాలు
పహల్గాం ఘటన, ఆపరేషన్ సిందూర్‌పై చర్చ తప్పనిసరి అని విపక్ష పార్టీలు స్పష్టంగా పేర్కొంటున్నాయి.
అంతేకాకుండా, భారత్-పాక్ మధ్య కాల్పుల విరమణ ఒప్పందానికి తానే మధ్యవర్తిగా వ్యవహరించానని అమెరికా అధ్యక్షుడు డొనాల్డ్ ట్రంప్ చేసిన వ్యాఖ్యలపై కూడా చర్చ అవసరమని సూచించాయి.
సరిహద్దు గ్రామాల్లో పాకిస్తాన్ రేంజర్లు జరిపిన షెల్లింగ్‌లో ప్రాణాలు కోల్పోయిన సాధారణ పౌరుల విషయాన్ని కూడా సభలో ప్రస్తావించాలని విజ్ఞప్తి చేశాయి.
ఆపరేషన్ సిందూర్ విషయంలో అన్ని విపక్ష పార్టీలు కేంద్రానికి సంపూర్ణ మద్దతు తెలిపినప్పటికీ, ఈ దృష్ట్యా పార్లమెంట్ ప్రత్యేక సమావేశం నిర్వహించాలని కేంద్రాన్ని విపక్షాలు అర్ధించుకుంటున్నాయి.