Jaishankar: భారత్‌పై 'ఆర్థిక బంకర్‌ బస్టర్‌' ప్రతిపాదనపై అమెరికాకు మా ఆందోళనలు తెలియజేశాం
ఈ వార్తాకథనం ఏంటి
రష్యా నుంచి చమురు దిగుమతి చేసుకునే దేశాలపై 500 శాతం దిగుమతి పన్ను విధించే 'ఆర్థిక బంకర్‌ బస్టర్‌' విధానాన్ని అమెరికా సెనేటర్‌ లిండ్సే గ్రాహం ప్రతిపాదించిన వ్యాఖ్యలపై భారత్ స్పందించింది. క్వాడ్‌ సమావేశానికి హాజరయ్యేందుకు నాలుగు రోజుల పర్యటనలో భాగంగా వాషింగ్టన్‌కు వెళ్లిన భారత విదేశాంగ మంత్రి ఎస్. జైశంకర్‌ ఈ వ్యాఖ్యలపై స్పందించారు. ఆ సెనేటర్‌తో తమ ఆందోళనలను ఇప్పటికే పంచుకున్నట్లు పేర్కొన్నారు. ఆ బిల్లు కార్యరూపం దాల్చితే తలెత్తే సమస్యలపై భారత్‌కు స్పష్టమైన అవగాహన ఉందని చెప్పారు.
వివరాలు
భారత్ ప్రయోజనాలపై ప్రభావం
వాషింగ్టన్‌లో ఏర్పాటు చేసిన విలేకర్ల సమావేశంలో జైశంకర్‌ మాట్లాడుతూ, అమెరికా కాంగ్రెస్‌లో జరుగుతున్న పరిణామాలను భారత్ గమనిస్తున్నదని తెలిపారు. ఎందుకంటే, ఇవి భారత్ ప్రయోజనాలపై ప్రభావం చూపే అవకాశం ఉన్నందున జాగ్రత్తగా పరిశీలిస్తున్నామని పేర్కొన్నారు. ఈ బిల్లు ప్రధాన నాయకుడైన లిండ్సే గ్రాహంతో భారత అధికారులు, దౌత్య సిబ్బంది సంపర్కంలో ఉన్నారని వెల్లడించారు. ''మన ఇంధన భద్రతా అవసరాలు, ఆందోళనల్ని ఆయన్ని సమాచారం ఇచ్చినట్లు భావిస్తున్నాం. ఆ బిల్లు సాధ్యమైనపుడు, అవసరమైతే దాన్ని ప్రత్యక్షంగా ఎదుర్కోవాల్సి ఉంటుంది,'' అని తెలిపారు.
వివరాలు
రష్యా నుంచి చమురు కొనుగోలు చేస్తున్న దేశాలపై 500 శాతం పన్ను
అమెరికా అధ్యక్షుడు డొనాల్డ్‌ ట్రంప్‌ కూడా ఈ బిల్లుకు మద్దతు ప్రకటించడంతో ఇది మరింత సంక్లిష్టంగా మారింది. ఈ బిల్లు ప్రకారం, రష్యా నుంచి చమురు కొనుగోలు చేస్తున్న దేశాల నుండి అమెరికా దిగుమతులపై 500 శాతం పన్ను విధించాలని సూచించింది. ఈ సందర్భంగా సెనేటర్‌ గ్రాహం స్పష్టంగా భారత్, చైనా పేర్లను ప్రస్తావించడం గమనార్హం. ఉక్రెయిన్‌పై రష్యా ఒత్తిడి పెంచేందుకు ఈ బిల్లును ఒక వ్యూహాత్మక ఆయుధంగా ఉపయోగించాలన్న ఉద్దేశంతో ట్రంప్‌ శిబిరం ఉన్నట్లు సమాచారం.
వివరాలు
ఉక్రెయిన్‌కు మద్దతు ప్రకటించే దేశాల కోసం మరో ప్రత్యేక ఒప్పందం
ఈ బిల్లు అమలులోకి వస్తే, రష్యా నుంచి భారీగా ముడి చమురు దిగుమతి చేసుకుంటున్న భారత్, చైనా వంటి దేశాలపై తీవ్ర ప్రభావం చూపే ప్రమాదం ఉంది. దీని వల్ల భారతదేశం ఎగుమతి చేసే ఔషధాలు, వస్త్రాలపై కూడా పరోక్షంగా ప్రభావం పడే అవకాశం ఉంది. ఇదే సమయంలో, ఉక్రెయిన్‌కు మద్దతు ప్రకటించే దేశాల కోసం మరో ప్రత్యేక ఒప్పందాన్ని లిండ్సే ప్రతిపాదించబోతున్నట్లు సమాచారం. ఇక, రాబోయే 48 గంటల్లో భారత్-అమెరికా మధ్య ఓ మినీ వాణిజ్య ఒప్పందం తుదిరూపం దాల్చబోతున్న వేళ, జైశంకర్‌ వ్యాఖ్యలు కీలకంగా నిలిచాయి.