తెలంగాణలో ఎల్లో అలెర్ట్, వచ్చే 5 రోజుల్లో భారీ వర్షాలు.. ఏపీకి వర్ష సూచన
రాగల 5 రోజుల పాటు తెలంగాణ రాష్ట్రంల్లో వర్షాలు కురవనున్నాయి. ఉత్తర, ఈశాన్య జిల్లాల్లో అక్కడక్కడ భారీ వర్షాలకు అవకాశం ఉంది. ఈ మేరకు హైదరాబాద్ వాతావరణ శాఖ ప్రకటించింది. మరోవైపు ఇప్పటికే తెలంగాణలో విస్తారంగా వర్షాలు కురుస్తున్నాయి. మంగళవారం ఉదయం నుంచి రాత్రి వరకు రాజధాని నగరం హైదరాబాద్ సహా పలు జిల్లాల్లోనూ మోస్తరు నుంచి భారీ వర్షాలు కురిశాయి. ఆదిలాబాద్, కుమురంభీం ఆసిఫాబాద్, ములుగు జిల్లాల్లో భారీ వర్షం కురిసింది. హన్మకొండ, జగిత్యాల, మంచిర్యాల, వరంగల్ జిల్లాల్లో అక్కడక్కడ భారీ వానలు పడ్డాయి. వచ్చే 5 రోజుల్లో ఆదిలాబాద్, కొమురంభీం, మంచిర్యాల, నిర్మల్, నిజామాబాద్, ములుగు, కొత్తగూడెం, ఖమ్మం, నల్గొండ, సూర్యాపేట జిల్లాల్లో అక్కడక్కడ వర్షాలు కురవనున్నాయి.
నైరుతి బంగాళాఖాతంలో ఆవర్తనం
నైరుతి బంగాళాఖాతంలో సగటు సముద్ర మట్టం 4.5కిమీ నుండి 7.6కిమీ ఎత్తు మధ్య ఆవర్తనం కొనసాగుతోందని వాతావరణ శాఖ వెల్లడించింది. దిగువ స్థాయిలోని గాలులు పశ్చిమ దిశవైపు నుంచి తెలంగాణవైపుకి వీస్తున్నాయని వాతావరణ కేంద్రం పేర్కొంది. హైదరాబాద్ లో గరిష్ఠ, కనిష్ఠ ఉష్ణోగ్రతలు వరుసగా 30 డిగ్రీలు, 23 డిగ్రీలుగా ఉండే అవకాశం ఉందని తెలిపింది. ఉపరితల గాలులు నైరుతి దిశ నుంచి గాలి వేగం గంటకు 6 నుంచి 10 కిలో మీటర్ల వేగంతో వీచే అవకాశం ఉందని నివేదిక ద్వారా వెల్లడించింది. మరో వైపు నైరుతి ఆంధ్రప్రదేశ్ లో బంగాళాఖాతంపై ఉత్తర తమిళనాడు తీరాన్ని ఆనుకుని ఆవర్తనం కొనసాగుతుందని రాష్ట్ర విపత్తుల నిర్వహణ సంస్థ వెల్లడించింది.
రైతులు, కూలీలు, గొర్రెల కాపరులు చెట్ల కింద ఉండకూడదని హెచ్చరిక
ఈ మేరకు రాష్ట్రంలో మరో 3 రోజులలో అక్కడక్కడ మోస్తరు నుంచి భారీ వర్షాలు కురవనున్నట్లు అంచనా వేసింది. ఉరుములు, మెరుపులతో పాటు పిడుగులు కూడా పడే అవకాశం ఉందని పేర్కొంది. రానున్న 3 రోజుల్లో శ్రీకాకుళం, పార్వతీపురం మన్యం, విజయనగరం, విశాఖపట్నం, అనకాపల్లి, అల్లూరి సీతారామరాజు, కాకినాడ, తూర్పుగోదావరి, కోనసీమ, పశ్చిమగోదావరి, ఏలూరు, ఎన్టీఆర్, గుంటూరు, పల్నాడు, శ్రీ సత్యసాయి జిల్లాల్లో మోస్తరు నుంచి భారీ వర్షాలు కురవనుంది. మిగిలిన జిల్లాల్లో తేలికపాటి జల్లులు పడే అవకాశం ఉంది. ఈ మేరకు ఏపీ విపత్తు నిర్వహణ సంస్థ వెల్లడించింది. ఉరుములతో కూడిన వర్షం కురిసే క్రమంలో రైతులు, పొలాల్లో పని చేసే కూలీలు, గొర్రెల కాపరులు చెట్ల కింద ఉండకూడదని హెచ్చరించింది.
