ప్రయాణికుల కోసం హైదరాబాద్ మెట్రో ప్రత్యేక ఆఫర్లు, డిస్కౌంట్లు; ఏప్రిల్ 1నుంచి అమలు
ఎల్‌అండ్‌టీ మెట్రో రైలు హైదరాబాద్ లిమిటెడ్ (ఎల్‌అండ్‌టీఎమ్‌ఆర్‌హెచ్‌ఎల్) ప్రయాణికుల కోసం ప్రత్యేక ఆఫర్లను ప్రకటించింది. హైదరాబాద్ మెట్రో కొత్తగా ప్రవేశపెట్టిన ఆఫర్లు, డిస్కౌంట్లు ఏప్రిల్ 1వ తేదీ నుంచి అమల్లోకి వస్తాయని యాజమాన్యం ప్రకటించింది. ఈ ఆఫర్లు హైదరాబాద్ మెట్రో రైలు సేవలను మరింత బలోపేతం చేయడం కోసం, ప్రయాణికులను ప్రయోజనం కోసం తీసుకొచ్చినట్లు ఎల్‌అండ్‌టిఎమ్‌ఆర్‌హెచ్‌ఎల్ ఎండీ,సీఈఓ కేవీబీ రెడ్డి తెలిపారు. హైదరాబాద్ మెట్రో కంపెనీ ఆఫ్-పీక్ అవర్స్ ఆఫర్‌ను ప్రవేశపెట్టింది. ఇది కాంటాక్ట్‌లెస్ స్మార్ట్ కార్డ్‌ల (సీఎస్‌సీ)నోటిఫైడ్ ఛార్జీలపై 10 శాతం తగ్గింపును అందిస్తుంది. అయితే రద్దీలేని సమయాల్లో ఉదయం 6 నుంపవ 8గంటల వరకు, రాత్రి 8 నుంచి 11గంటల వరకు మాత్రమే ఈ ఆఫర్ వర్తిస్తుంది.
రూ.99తో మెట్రోలో అపరిమిత ప్రయాణం
హైదరాబాద్ మెట్రో తీసుకొచ్చిన సూపర్ సేవర్ ఆఫర్-59 విశేష ఆదరణ పొందింది. ఈ ఆఫర్ కింద దాదాపు 1.3 మిలియన్ల మంది ప్రయాణించారు. ఈ నెల 31తో ఈ ఆఫర్ ముగుస్తుంది. దీనికి కొనసాగింపుగా మరో కొత్త ఆఫర్‌ను ప్రకటించింది హైదరాబాద్ మెట్రో యాజమాన్యం. 'సూపర్ సేవర్ ఆఫర్-99' పేరుతో తీసుకొచ్చిన కొత్త ఆఫర్‌ను ఏప్రిల్ 1వ తేదీ నుంచి అమలు చేయనుంది. ఇది మార్చి 31, 2024 వరకు ఉంటుంది. ఈ ఆఫర్ కింద ప్రయాణికులు రూ.99తో 100 సెలవు దినాల్లో అపరిమితంగా మెట్రోలో ప్రయాణించవచ్చు. ఎస్ఎస్ఓ-99 కింద ఆఫర్ వర్తించే నోటిఫైడ్ సెలవుల జాబితా ఆన్‌లైన్‌, స్టేషన్‌లలో అందుబాటులో అందుబాటులో ఉంచుతామని యాజమాన్యం ప్రకటించింది.
ఈ టైమ్ లైన్ ని షేర్ చేయండి