Isha Foundation: ఈశా ఫౌండేషన్కు సుప్రీం కోర్టులో ఊరట
తమిళనాడు కోయంబత్తూరులోని ఇషా ఫౌండేషన్కు సుప్రీంకోర్టు నుంచి పెద్ద ఊరట లభించింది. సద్గురు జగ్గీ వాసుదేవ్ నిర్వహిస్తున్న ఈ ఫౌండేషన్‌పై మద్రాస్ హైకోర్టులో దాఖలైన పిటిషన్‌ను సుప్రీంకోర్టు శుక్రవారం కొట్టివేసింది. ఇషా ఫౌండేషన్‌లో తమ కూతుళ్లను బ్రెయిన్ వాష్ చేసి సన్యాసం వైపు మళ్లించారని ఆరోపిస్తూ ప్రొఫెసర్ దాఖలు చేసిన కేసును విచారణ రద్దు చేయడంతో పాటు, దీనిపై సుప్రీంకోర్టు తీర్పు వెలువరించింది. ఈ కేసులో మద్రాస్ హైకోర్టు అనుచితంగా వ్యవహరించినట్టు సర్వోన్నత న్యాయస్థానం పేర్కొంది. ఇద్దరు మహిళలు గీత (42) లత (39) మేజర్లు కావడం, వారి ఇష్టపూర్వకంగా ఆశ్రమంలో నివసిస్తున్నందున ఈ పిటిషన్ చట్ట విరుద్ధమని ప్రధాన న్యాయమూర్తి డివై చంద్రచూడ్ నేతృత్వంలోని ధర్మాసనం స్పష్టం చేసింది.
కేసు పుర్వాపరాలు
ఇదిలావుంటే, పిటిషనర్ కూతుళ్లలో ఒకరు వీడియో ద్వారా సుప్రీంకోర్టుకు హాజరయ్యారు. ఆమె మాట్లాడుతూ,'నేను,నా సోదరి స్వచ్ఛందంగా, ఇష్టపూర్వకంగా ఈషా ఫౌండేషన్‌లో నివసిస్తున్నాం.ఇందులో ఎవరిపై ఒత్తిడి లేదా బలవంతం లేదు. మా తండ్రి ఎనిమిదేళ్లుగా మమ్మల్ని వేధిస్తున్నాడు'అని కోర్టుకు తెలిపారు. ఈషా ఫౌండేషన్‌పై తమిళనాడుకు చెందిన రిటైర్డ్ ప్రొఫెసర్ హెబియస్ కార్పస్ రిట్ దాఖలు చేయడంతో మద్రాస్ హైకోర్టు విచారణ చేపట్టింది. ఆయన కుమార్తెలు గీత,లత ఈషా యోగా కేంద్రంలో యోగా నేర్చుకునేందుకు వెళ్లి అక్కడే ఉండిపోయారని,ఈశా కేంద్రంలో వారికి బ్రెయిన్ వాష్ చేసి సన్యాసం వైపు మళ్లించారని ఆరోపించారు. ఇద్దరు కుమార్తెలను తమకు అప్పగించాలని ఆయన కోరారు.దీనిపై విచారణ చేపట్టిన హైకోర్టు, కేసును పరిశీలించి నివేదిక దాఖలు చేయాలని తమిళనాడు పోలీసులను ఆదేశించింది.
ఇద్దరు మహిళలు ఆశ్రమంలో స్వచ్ఛందంగా ఉన్నారు: పోలీసులు
ప్రొఫెసర్ చేసే ఆరోపణలను ఈషా యోగా కేంద్రం తోసిపుచ్చింది. "మేము ఎవరినీ పెళ్లి చేసుకోమని లేదా సన్యాసం తీసుకోమని సలహాలు ఇవ్వమని చెప్పలేదు. అందరూ స్వచ్ఛందంగా నిర్ణయం తీసుకుంటారు" అని ఒక ప్రకటనలో పేర్కొంది. ఈ నేపథ్యంలో, ఈశా యోగా కేంద్రం సుప్రీంకోర్టును ఆశ్రయించగా, ఫౌండేషన్‌పై నమోదైన క్రిమినల్ కేసుల వివరాలను సమర్పించాలని తమిళనాడు పోలీసులకు మద్రాసు హైకోర్టు ఇచ్చిన ఆదేశాలపై ధర్మాసనం స్టే విధించింది. అలాగే, స్టేటస్ రిపోర్టును తమకు సమర్పించాలని తమిళనాడు పోలీసులకు స్పష్టం చేసింది. తాజా సమాచారం ప్రకారం, ఇద్దరు మహిళలు ఆశ్రమంలో స్వచ్ఛందంగా ఉన్నారని అత్యున్నత న్యాయస్థానానికి పోలీసులు వివరించారు. దీంతో కేసును సుప్రీంకోర్టు కొట్టి వేసింది.
