India security doctrine: భారత్ కొత్త భద్రతా డాక్ట్రిన్‌.. 2035లో సుదర్శన చక్రం కవచం
ఈ వార్తాకథనం ఏంటి
దేశ రక్షణలో భారత్ కొత్త శిఖరాలు అధిరోహిస్తోంది. జాతీయ భద్రతపై మరింత స్పష్టత, బలమైన ప్రతిస్పందన, స్వావలంబన దిశగా నిత్య కృషి లక్ష్యంగా కేంద్ర ప్రభుత్వం కొత్త డాక్ట్రిన్‌ను ప్రకటించింది. ప్రభుత్వం విడుదల చేసిన ప్రకటనలో.. "జాతీయ భద్రత విషయంలో ఎలాంటి రాజీ ఉండదని ఈ ప్రభుత్వం పదేపదే స్పష్టం చేసింది. ఈ భద్రత కోసం భారత్ తన సొంత సామర్థ్యాన్ని పెంచుకుంటుంది. దీంతో బాహ్య, అంతర్గత సవాళ్లను ఎదుర్కొనే ధైర్యం, ఆధునికత, ప్రొయాక్టివ్‌ దృష్టి పెరిగాయి" అని పేర్కొంది.
వివరాలు
రక్షణ ఖర్చు పెంపు
ప్రధాని నరేంద్ర మోదీ నాయకత్వంలో దేశ రక్షణ ఖర్చులు గణనీయంగా పెరిగాయి. 2013-14లో రూ.2.53 లక్షల కోట్ల నుంచి 2025-26 నాటికి రూ.6.81 లక్షల కోట్లకు పెరిగాయి. 2024-25లో రక్షణ ఉత్పత్తి రూ.1.50 లక్షల కోట్లు చేరి రికార్డు సృష్టించింది. యుద్ధవిమానాలు, క్షిపణి వ్యవస్థలు, ఆర్టిల్లరీ, యుద్ధ నౌకలు, విమాన వాహక నౌకలు సహా అనేక రక్షణ పరికరాలు దేశంలోనే తయారు అవుతున్నాయి. గత దశాబ్దంలో రక్షణ ఎగుమతులు 34 రెట్లు పెరిగి 2024-25లో రూ.23,622 కోట్లకు చేరాయి. అమెరికా, ఫ్రాన్స్‌, ఆర్మేనియా సహా 100కిపైగా దేశాలకు 'మేడ్ ఇన్ ఇండియా' రక్షణ సామగ్రి ఎగుమతి అవుతోంది.
వివరాలు
స్వావలంబన దిశగా అడుగులు
గత దశాబ్దంలో రక్షణ రంగం పూర్తిగా మారిపోయింది. ఆత్మనిర్భర భారత్ లక్ష్యంగా ప్రభుత్వం పలు సంస్కరణలు చేపట్టింది. రక్షణ కొనుగోళ్లలో 2020 నిబంధనల ప్రకారం 'బై' కేటగిరీకి ప్రాధాన్యం ఇవ్వడం జరిగింది. అంటే దేశీయ డిజైన్‌, డెవలప్‌మెంట్‌, మాన్యుఫాక్చరింగ్‌కు పెద్దపీట వేసింది. 'మేక్‌' ప్రొసీజర్‌ను సులభతరం చేసి భారతీయ పరిశ్రమలు కొత్త రక్షణ వ్యవస్థలు రూపకల్పన, తయారీలో భాగస్వామ్యం కావడానికి అవకాశం కల్పించింది.
వివరాలు
పాక్‌పై ఐదు కొత్త నార్మల్స్‌
పాకిస్తాన్‌తో వ్యవహరించడంలో ప్రధాని మోదీ ఐదు స్పష్టమైన సూత్రాలను అమలు చేస్తున్నారు. ఉగ్రదాడులకు కఠిన ప్రతిస్పందన.. భారత్‌పై దాడి జరిగితే తక్షణ ప్రతీకారం. అణు బెదిరింపులకు లొంగరాదు.. ఉగ్రశిబిరాలపై దాడిని ఆపలేవు. ఉగ్రవాదులు-ప్రోత్సాహకులు ఒకటే - ఇరువురినీ సమానంగా బాధ్యుల్ని చేస్తాం. చర్చల్లో ఉగ్రవాదమే ప్రధాన అంశం - చర్చ జరిగితే అది ఉగ్రవాదం లేదా పాక్ ఆక్రమిత కాశ్మీర్‌పై మాత్రమే. సార్వభౌమత్వంపై రాజీ లేదు - "టెరర్‌-టాక్స్‌ కలిసిరావు, టెరర్‌-ట్రేడ్‌ కలిసిరావు, రక్తం-నీరు కలిసిరావు."
వివరాలు
సుదర్శన చక్ర మిషన్‌
ప్రస్తుత సవాళ్లకే కాకుండా, భవిష్యత్తు బెదిరింపులకు ముందుగానే సన్నద్ధం కావాలని ప్రభుత్వం సుదర్శన చక్ర మిషన్‌ను ప్రకటించింది. 2025 స్వాతంత్ర్య దినోత్సవ ప్రసంగంలో మోదీ దీన్ని ఆవిష్కరించారు. 2035 నాటికి దేశానికి భద్రతా కవచంగా మారే ఈ ప్రాజెక్టు మూడు ప్రధాన సూత్రాలపై ఆధారపడి ఉంది. పరిశోధన, తయారీ పూర్తి స్వదేశీకరణ; వచ్చే తరహా యుద్ధాలను అంచనా వేసే ప్రిడిక్టివ్‌ టెక్నాలజీలు వినియోగం; ఖచ్చితమైన కౌంటర్‌ సిస్టమ్స్‌ అభివృద్ధి. ఇవి వ్యూహాత్మక మౌలిక వసతులు మాత్రమే కాకుండా సాధారణ పౌర రక్షణకు కూడా కవచమవుతాయి.