IRCTC scam: లాలూ అనుచరులు, బంధువుల ఇళ్లపై ఈడీ దాడులు
ఇండియన్ రైల్వే క్యాటరింగ్ అండ్ టూరిజం కార్పొరేషన్(ఐఆర్‌సీటీసీ) కుంభకోణం కేసులో ఆర్జేడీ చీఫ్ లాలూ ప్రసాద్ యాదవ్ కుటుంబ సభ్యులు, అనుచరుల ఇళ్లే లక్ష్యంగా ఈడీ శుక్రవారం సోదాలు నిర్వహిస్తోంది మూడు రాష్ట్రాల్లోని 15 ప్రాంతాల్లో దాడులు జరుగుతున్నాయి. బిహార్‌లోని పాట్నాలో లాలూ ప్రసాద్ యాదవ్ అనుచరుడు అబు దోజానా ఇంట్లో ఈడీ అధికారులు ఉదయం నుంచి తనిఖీలు చేస్తున్నారు. బిహార్‌తో పాటు ఉత్తరప్రదేశ్, ముంబయిలోని లాలూ కుటుంబ సభ్యుల ఇళ్లను ఈడీ అధికారులు టార్గెట్ చేశారు. ఆర్జేడీ చీఫ్ లాలూ ప్రసాద్ యాదవ్‌ను సీబీఐ ఈ కేసులో విచారణకు పిలిచిన కొద్ది రోజుల తర్వాత ఈడీ సోదాలు జరగడం గమనార్హం. ఇప్పటికే లాలూ భార్య రబ్రీ దేవిని కూడా సీబీఐ ప్రశ్నించింది.
గ్రూప్ డీ ఉద్యోగాల నియామకంలో అక్రమాలు జరిగాయాని అభియోగాలు మోపిన సీబీఐ
2004నుంచి 2009 మధ్య కాలంలో రైల్వే మంత్రిగా ఉన్న సమయంలో బిహార్‌లో గ్రూప్ డీ ఉద్యోగాల నియామకంలో లాలూ ప్రసాద్ యాదవ్ అక్రమాలకు పాల్పడినట్లు సీబీఐ అభియోగాలు మోపింది. ఉద్యోగం ఇప్పించి అనుచరులు, కుటుంబ సభ్యుల పేరు మీద భూమి తీసుకున్నట్లు సీబీఐ ఛార్జిషీట్‌లో పేర్కొంది. భూమి రూపంలో ఆర్థిక ప్రయోజనాలను పొందినట్లు ఆరోపిస్తోంది. 2018లో పట్నాలో నిర్మాణంలో ఉన్న మాల్‌ను ఈడీ సీజ్ చేసింది. దీనిని లాలూ ప్రసాద్ యాదవ్, అతని కుటుంబం నిర్మించారు. ప్రభుత్వం నుంచి క్లియరెన్స్‌ పొందకుండా బినామీ ఆస్తులతో మాల్‌ను నిర్మించారని బీజేపీ ఆరోపించింది. మాల్ నిర్మాణాన్ని అబు డోజానాకు చెందిన మెరిడియన్ కన్‌స్ట్రక్షన్ ఇండియా లిమిటెడ్ సంస్థ చేపట్టింది.
