భారత్- నేపాల్ మధ్య బంధాన్ని హిమాలయాలంత ఎత్తుకు తీసుకెళ్తాం: ప్రధాని మోదీ
నేపాల్ ప్రధాని పుష్పకమల్ దహల్ 'ప్రచండ' భారత పర్యటనలో బిజీబిజీగా ఉన్నారు. ప్రచండ గురువారం ప్రధానమంత్రి నరేంద్ర మోదీతో కీలక ద్వైపాక్షిక అంశాలపై చర్చించారు. ఇంధనం, కనెక్టివిటీ, వాణిజ్యంతో సహా పలు రంగాల్లో భారతదేశం-నేపాల్ దేశాల మధ్య సహకారం మరింత బలపడే విధంగా ఇద్దరు ప్రధానులు విస్తృత చర్చలు జరిపారు. సమావేశం అనంతరం ప్రధాని మోదీ మాట్లాడారు. భారత్-నేపాల్ సంబంధాలను హిమాలయ శిఖరాల ఎత్తులకు తీసుకెళ్లేందుకు తాము నిరంతరం కృషి చేస్తామన్నారు. భవిష్యత్తులో ఇరు దేశాల భాగస్వామ్యాన్ని సూపర్‌హిట్‌గా మార్చేందుకు ప్రచండ, తాను ఈరోజు చాలా ముఖ్యమైన నిర్ణయాలు తీసుకున్నట్లు మోదీ చెప్పారు.
ప్రధాని పదవి చేపట్టిన తర్వాత ప్రచండ చేపట్టిన మొదటి విదేశీ పర్యటన ఇదే
నేపాల్ ప్రధాని తన నాలుగు రోజుల భారత పర్యటన నిమిత్తం బుధవారం దిల్లీకి చేరుకున్నారు. కమ్యూనిస్ట్ పార్టీ ఆఫ్ నేపాల్-మావోయిస్ట్ నాయకుడు ప్రచండ 2022లో ప్రధానమంత్రి పదవిని చేపట్టిన తర్వాత చేస్తున్న మొదటి ద్వైపాక్షిక విదేశీ పర్యటన ఇదే కావడం గమనార్హం. ఆసియాలో ప్రాంతంలో వ్యూహాత్మక ప్రయోజనాల దృష్ట్యా భారతదేశానికి నేపాల్ చాలా ముఖ్యమైన భాగస్వామి. రెండు దేశాల ప్రజల మధ్య సరిహద్దు వివాహాలు నేపాల్- భారత్ మధ్య బంధాన్ని మరింత బలపరుస్తాయి. సిక్కిం, పశ్చిమ బెంగాల్, బిహార్, ఉత్తరప్రదేశ్, ఉత్తరాఖండ్ రాష్ట్రాలతో నేపాల్ దాదాపు 1,850 కి.మీ పైగా సరిహద్దును పంచుకుంటుంది. 1950 నాటి భారత్-నేపాల్ శాంతి, స్నేహ ఒప్పందం రెండు దేశాల మధ్య ప్రత్యేక సంబంధాలకు పునాదిగా నిలిచింది.
ఈ టైమ్ లైన్ ని షేర్ చేయండి