pakistan: పాక్‌ ఆక్రమిత కశ్మీర్లోకి హమాస్‌.. అప్రమత్తమైన భారత ఇంటెలిజెన్స్‌ వర్గాలు
ఈ వార్తాకథనం ఏంటి
ఇజ్రాయెల్‌ దాడుల్లో తీవ్రంగా దెబ్బతిన్న పాలస్తీనా మిలిటెంట్‌ సంస్థ హమాస్‌ ప్రస్తుతం పాక్‌ ఆక్రమిత కశ్మీర్‌లో అడుగుపెట్టే అవకాశం ఉందని ప్రచారం జరుగుతోంది. ఈ నేపథ్యంలో భారత నిఘా వర్గాలు అప్రమత్తమయ్యాయి. కశ్మీర్‌ సంఘీభావ దినోత్సవం సందర్భంగా బుధవారం పీవోకేలోని ఓ కార్యక్రమంలో హమాస్‌ సీనియర్‌ నేత ప్రసంగించనున్నట్లు సమాచారం. ఈ కార్యక్రమం రావల్కోట్‌లోని సబీర్‌ స్టేడియంలో నిర్వహిస్తున్నారు. ఈ సభలో లష్కరే తోయిబా, జైషే మహమ్మద్‌ వంటి ఉగ్రవాద సంస్థల సీనియర్‌ నాయకులు కూడా పాల్గొనబోతున్నారు.
వివరాలు
హమాస్‌ ప్రతినిధి ఖలీద్‌ కద్దౌమి ప్రసంగం
ఈ కార్యక్రమంలో హమాస్‌ ప్రతినిధి ఖలీద్‌ కద్దౌమి ప్రసంగించబోతున్నట్లు వివిధ మార్గాల్లో ప్రచారం జరుగుతోంది. అతడు కశ్మీర్‌లో పోరాటాన్ని పాలస్తీనాతో సంబంధం పెట్టుకుని మాట్లాడే అవకాశం ఉందని ఇంటెలిజెన్స్‌ వర్గాలు పేర్కొంటున్నాయి. జిహాదీ సంస్థలు తమ ఉద్దేశాలను ప్రమాణించేలా వాదనలు వినిపించే అవకాశముంది. అలాగే, మసూద్‌ అజర్‌ సోదరుడు తల్హాసైఫ్‌, అస్గర్‌ఖాన్‌, ఇలియాస్‌ మసూద్‌ వంటి ఉగ్రవాదులు కూడా సభకు హాజరుకావచ్చని ఊహిస్తున్నారు.
వివరాలు
హమాస్‌ నేతలతో లష్కరే ఉగ్రవాది సైఫుల్లా ఖలీద్‌ భేటీ
ఈ సందర్భంగా భారత హోం మంత్రి అమిత్‌ షా మంగళవారం జమ్మూ కశ్మీర్‌ భద్రతా పరిస్థితులను సమీక్షించేందుకు హై-లెవల్‌ మీటింగ్‌ను నిర్వహించారు. కౌంటర్‌ టెర్రరిజం ఆపరేషన్లపై దృష్టి పెట్టారు. ఇంటెలిజెన్స్‌ నెట్‌వర్క్‌ను బలోపేతం చేయడం, సీమాంతర చొరబాట్లను అడ్డుకోవడం వంటి చర్యలను చేపట్టాలని ఆయన అధికారులకు సూచించారు. కశ్మీర్‌లో వాహన తనిఖీలను మరింత కట్టుదిట్టం చేయాలని ఆదేశించారు. గత ఏడాది ఆగస్టులో, హమాస్‌ నేతలతో లష్కరే ఉగ్రవాది సైఫుల్లా ఖలీద్‌ భేటీ అయ్యాడు. ఈ సమావేశం ఖతార్‌ రాజధాని దోహాలో జరిగింది. 2018లో సైఫుల్లాను అమెరికా ఉగ్రజాబితాలో చేర్చింది. అతడు, లష్కరే వ్యవస్థాపకుడు హఫీజ్‌ సయీద్‌ సన్నిహితుడు.