J&K: జమ్ముకశ్మీర్ రాష్ట్ర హోదా.. కేబినెట్ తీర్మానానికి ఆమోదం తెలిపిన లెఫ్టినెంట్ గవర్నర్..
జమ్ముకశ్మీర్ కి పూర్తిస్థాయిలో రాష్ట్ర హోదా కల్పించాలని ఆ రాష్ట్ర కేబినెట్ కేంద్రాన్ని కోరింది. ఈ తీర్మానానికి జమ్మూ కాశ్మీర్ లెఫ్టినెంట్ గవర్నర్ మనోజ్ సిన్హా ఆమోదం తెలిపారు. కేంద్ర పాలిత ప్రాంతం నుంచి రాష్ట్ర హోదా పునరుద్ధరించాలని సీఎం ఒమర్ అబ్దుల్లా తన మంత్రి వర్గంతో కలిసి కేంద్రాన్ని కోరారు. తాజా తీర్మానం జమ్మూ కాశ్మీర్‌కు రాష్ట్ర హోదా గుర్తింపును పునరుద్ధరించడానికి ముఖ్యమైన ముందడుగుగా భావిస్తున్నారు. ఈ అంశాన్ని ప్రధానితో పాటు కేంద్ర ప్రభుత్వ దృష్టికి తీసుకెళ్లేందుకు కేబినెట్ ఈ నిర్ణయం తీసుకుంది. రాష్ట్ర హోదా పునరుద్ధరణకు సంబంధించి ప్రధాన మంత్రి, కేంద్రమంత్రులతో సీఎం ఒమర్ అబ్దుల్లా భేటీ అయ్యేందుకు త్వరలోనే దిల్లీ రానున్నట్లు ఒక ప్రభుత్వ అధికారి వెల్లడించారు.
రెండో అతిపెద్ద పార్టీగా బీజేపీ
నవంబర్ 04న శ్రీనగర్‌లో కొత్తగా ఎన్నికైన శాసనసభ సమావేశం జరగనుంది. సెషన్ ప్రారంభంలో లెఫ్టినెంట్ గవర్నర్ ప్రసంగించనున్నారు. అక్టోబర్ 21న ఎన్నికైన ఎమ్మెల్యేల ప్రమాణస్వీకారం జరగనుంది, అందుకోసం ముబారిక్ గుల్‌ని ప్రొటెం స్పీకర్‌గా నియమించాలని కేబినెట్ సిఫారసు చేసింది. స్పీకర్ ఎన్నిక జరిగే వరకు గుల్ ప్రొటెం స్పీకర్‌గా కొనసాగుతారు, దీనికి సంబంధించి ఎల్‌జీ ఉత్తర్వులు జారీ చేశారు. దశాబ్దం తర్వాత, ఆర్టికల్ 370 రద్దు చేసిన అనంతరం తొలిసారిగా జమ్మూ కాశ్మీర్‌లో ఇటీవల ఎన్నికలు జరిగాయి. ఈ ఎన్నికల్లో నేషనల్ కాన్ఫరెన్స్-కాంగ్రెస్ కూటమి మొత్తం 90 అసెంబ్లీ స్థానాల్లో 48 స్థానాలను గెలుచుకుంది. బీజేపీ 29స్థానాలతో రెండో అతిపెద్ద పార్టీగా నిలిచింది,అయితే కాంగ్రెస్ కేవలం 6 స్థానాల్లో మాత్రమే విజయం సాధించింది.
