మధ్యప్రదేశ్‌‌లో ఘోరం..7 ఏళ్లు జెైలుకు వెళ్లినా బుద్ధిరాలేదు, ఈసారి దళిత బాలికపై రేప్
మధ్యప్రదేశ్‌‌లో దారుణం వెలుగు చూసింది. 7 ఏళ్ల పాటు జైల్లో శిక్ష అనుభవించిన ఇటీవలే విడుదలైన ఓ బుద్ధిలేని ఖైదీ మరోసారి లైంగిక దాడికి పాల్పడ్డాడు.ఈ మేరకు ఐదేళ్ల దళిత బాలికను ఘోరంగా అత్యాచారం చేశాడు. రాకేష్ వర్మ అలియాస్ రక్కు 2012లో కోల్గ్వాన్ ఠాణా పరిధిలో నాలుగున్నరేళ్ల బాలికను రేప్ చేశాడు. దర్యాప్తులో రాకేష్ దోషిగా తేలడంతో న్యాయస్థానం 10 ఏళ్ల జైలు శిక్ష విధించినట్లు జిల్లా పోలీస్ సూపరింటెండెంట్ మహేంద్ర సింగ్ చౌహాన్ వెల్లడించారు. సత్ప్రవర్తన కారణంగా నిందితుడికి మూడేళ్ల జైలు శిక్షను రద్దు చేశారు.దీంతో 18 నెలల క్రితమే రక్కు(రాకేష్)ను జైలు నుంచి విడుదల చేశామన్నారు. జైలు నుంచి రిలీజైన సంవత్సరన్నరకు నిందితుడిలో దుర్మార్గుడు మళ్లీ నిద్రలేచాడు.
స్వీట్లు తినిపిస్తానని చెప్పి అఘాయిత్యానికి పాల్పడ్డ రాకేశ్ వర్మ
దీంతో మరో మైనర్ చిన్నారిపై అఘాయిత్యానికి ఒడిగట్టాడు. పాపకు స్వీట్లు తినిపిస్తానని నమ్మబలికి, ప్రలోభాలకు గురిచేసినట్లు విచారణలో పోలీసులు తేల్చారు. బుధవారం సాయంత్రం 5 గంటల సమయంలో బాలిక కనిపించలేదు. ఈ నేపథ్యంలోనే బాధితురాలి అమ్మమ్మ ఆమె కోసం గాలించింది. సుమారు రెండు గంటల పాటు గాలించాక ఇంటికి కొంత దూరంలో బాలిక ఆపస్మారక స్థితిలో రక్తసిక్తమై కనిపించింది. పాప పరిస్థితి విషమంగా ఉన్నట్లు గమనించిన కుటుంబీకులు, వెంటనే జిల్లా ఆస్పత్రికి తరలించారు. ప్రథమ చికిత్స అనంతరం రేవాలోని సంజయ్ గాంధీ ఆస్పత్రికి తరలించారు. బాలిక లైంగిక దాడికు గురైందని వైద్య నివేదికల్లో స్పష్టమైనట్లు పోలీసులు తెలిపారు. ఆటోలో పరారైన నిందితుడు రాకేష్ వర్మ కోసం గాలిస్తున్నట్లు పేర్కొన్నారు.
