మధ్యప్రదేశ్ రాజకీయాల్లో సంచలనం : దిగ్విజయ్ సింగ్ రాజీనామా.. లేఖ వైరల్
మధ్యప్రదేశ్‌లో అసెంబ్లీ ఎన్నికల ముంగిట కాంగ్రెస్‌ను ఓ వార్త కలవరపెట్టింది. ఆ పార్టీ సీనియర్ నేత, మాజీ సీఎం దిగ్విజయ్ సింగ్ రాజీనామా చేసినట్లు ప్రచారం జరిగింది. ఈ క్రమంలోనే ఓ లేఖ ఆయన పేరిట ట్విట్టర్ లో చక్కెర్లు కొడుతోంది. ఓ వైపు ప్రదాన రాజకీయ పార్టీలన్నీ ప్రచారాన్ని ముమ్మరం చేశాయి. మరోవైపు సదరు లేఖ వైరల్‌గా మారింది. దీంతో మధ్యప్రదేశ్ రాజకీయాల్లోనే కలకలం రేగింది. దీనిపై స్పందించిన డిగ్గీ రాజా, తాను రాజీనామా చేయలేదన్నారు. ఆ లేఖను పూర్తిగా తోసిపుచ్చారు. ప్రత్యర్థి పార్టీలు తప్పుడు లేఖలు సృష్టించాయన్నారు. తాను 1971లో కాంగ్రెస్ సభ్యత్వం తీసుకున్నానని, పదవి కోసం పార్టీలో చేరలేదని, సిద్ధాంతాల ప్రభావంతోనే చేరినట్లు తెలిపారు. తుదిశ్వాస వరకు కాంగ్రెస్‌తోనేనన్నారు.
