Hyderabad: గాడిద పాల పేరిట కుంభకోణం.. రూ.100 కోట్లు నష్టపోయిన బాధితులు
ఈ వార్తాకథనం ఏంటి
ఇటీవల గాడిద పాల గురించి దేశవ్యాప్తంగా విస్తృత చర్చ జరుగుతున్నది.
మార్కెట్లో ఉన్న హైప్‌, డిమాండ్‌ను ఉపయోగించి, తమిళనాడులోని ఓ ముఠా గాడిద పాల ఉత్పత్తి చేసే సంస్థ ఒక పెద్ద మోసాన్ని చేసింది.
ఈ ఘటనలో తెలుగు రాష్ట్రాల్లో గాడిద పాల కుంభకోణం తాజాగా వెలుగులోకి వచ్చింది.
ఫ్రాంచైజీ మోడల్‌లో గాడిద పాలు తీసుకుని, ఓ సంస్థ దాదాపు రూ.100 కోట్ల మేరకు రైతులను మోసం చేసి పారిపోయిందని బాధితులు ఆరోపించారు.
హైదరాబాద్‌ సోమాజిగూడ ప్రెస్‌క్లబ్‌లో ఈ వ్యవహారంపై బాధిత రైతులు ఆందోళన వ్యక్తం చేశారు.
వారు చెన్నైలోని "డాంకీ ప్యాలెస్" ఫ్రాంచైజీ గ్రూపు వారు నమ్మించి, వారిని మోసం చేశారని చెప్పారు.
వివరాలు
గాడిదను రూ.80 వేల నుండి రూ.1.50 లక్షల వరకు అమ్మారు
''కొవిడ్‌ సమయంలో బహుళ పోషకాలు,రోగ నిరోధక శక్తి కలిగిన గాడిద పాలు చాలా డిమాండ్‌ ఉంటాయని సామాజిక మాధ్యమాల్లో ప్రచారం జరిగింది.
దీన్నిచూసి మేము ఈ సంస్థతో సంప్రదించాం. 'డాంకీ ప్యాలెస్' సంస్థ ఉలగనాథన్‌, అతని బృందం, గిరి సుందర్‌, బాలాజీ, సోనికరెడ్డి, డాక్టర్‌ రమేశ్‌ రైతుల వద్ద రూ.5 లక్షలు సెక్యూరిటీ డిపాజిట్‌గా తీసుకున్నారు.
ఒక్కో పాడి గాడిదను రూ.80 వేల నుండి రూ.1.50 లక్షల వరకు అమ్మారు.అలాగే,గాడిదల నుంచి పాలు లీటరుకు రూ.1600 చొప్పున సేకరించేందుకు ఒప్పందం చేసుకున్నారు.
3 నెలల పాటు నగదు చెల్లించారు, అయితే తర్వాత 18 నెలలుగా పాల సరఫరా, నిర్వహణ ఖర్చులు, షెడ్ నిర్మాణం, సిబ్బంది జీతాలు, వెటర్నరీ చికిత్స ఖర్చులు ఏమీ ఇవ్వలేదు.
వివారాలు
చెన్నై పోలీసులకు ఫిర్యాదు
ఈ వ్యవహారంపై ప్రశ్నించినప్పుడు, ఒక్కొక్కరికీ రూ.15 లక్షల నుంచి రూ.70లక్షల వరకు బ్యాంకు చెక్కులు రాసిచ్చారు.
ఇచ్చిన బ్యాంకు చెక్కులు బౌన్స్‌ అయ్యాయి. ఈ మోసంలో తెలంగాణ, ఆంధ్రప్రదేశ్‌, తమిళనాడు, కర్ణాటక రాష్ట్రాల నుండి 400 మందికి పైగా రైతులు దాదాపు రూ.100 కోట్ల మేర నష్టపోయారు.
ఈ కుంభకోణం వెనుక రాజకీయ హస్తం ఉండవచ్చని బాధితులు చెబుతున్నారు.
ఈ విషయంపై చెన్నై పోలీసులకు ఫిర్యాదు చేసినా, వారు పట్టించుకోలేదని పేర్కొన్నారు.
ఒప్పందం సమయంలో ఇచ్చిన జీఎస్‌టీ సంఖ్య, ఎఫ్‌ఎస్‌ఎస్‌ఏఐ లైసెన్స్ కూడా నకిలీదని తేలింది.
తెలుగు రాష్ట్రాల ముఖ్యమంత్రులు ఈ వ్యవహారంపై చర్యలు తీసుకొని న్యాయం చేయాలని బాధితులు కోరుతున్నారు.
లేకపోతే, తీవ్ర పరిణామాలు చోటుచేసుకోవచ్చని వారు ఆందోళన వ్యక్తం చేశారు.