Nara Lokesh: అమిత్ షాతో మంత్రి లోకేశ్ భేటీ.. రాష్ట్ర అభివృద్ధిపై కీలక చర్చలు
కేంద్ర హోంశాఖ మంత్రి అమిత్ షాను ఏపీ విద్య, ఐటీ శాఖల మంత్రి నారా లోకేశ్ ఆదివారం కలిశారు. దాదాపు 40 నిమిషాల పాటు ఇరువురి మధ్య పలు అంశాలపై చర్చలు జరిగాయి. మొదటగా ఆంధ్రప్రదేశ్ అభివృద్ధికి కేంద్రం అందిస్తున్న సహకారం పట్ల లోకేశ్ తన కృతజ్ఞతలు వ్యక్తం చేశారు. నారా లోకేశ్, రాష్ట్రంలో కూటమి ప్రభుత్వం ఏర్పడిన తర్వాత చేపట్టిన అభివృద్ధి కార్యక్రమాలను అమిత్ షాకు వివరించారు. కేంద్రం సహకారంతో రాష్ట్రం మరింత బలమైన శక్తిగా ఎదగడానికి అవసరమైన భరోసాను అమిత్ షా ఇచ్చారు.
అమిత్ షాకు ధన్యవాదాలు : నారా లోకేశ్
అమిత్ షాతో సమావేశం అనంతరం, లోకేశ్ ఎక్స్ వేదికగా స్పందించారు. సమావేశం ఫలప్రదమైందని, అమిత్ షాతో రాష్ట్రంలో జరుగుతున్న తాజా పరిణామాలను వివరణాత్మకంగా చర్చించానని తెలిపారు. ఆర్థికంగా ఆంధ్రప్రదేశ్ మరింత పటిష్టంగా ఎదగడం, తెలుగు ప్రజల ఆశయాలను సాకారం చేయడంలో అమిత్ షా గౌరవానికి సంబంధించిన నిబద్ధతను ప్రశంసించారు. ప్రధాని నరేంద్ర మోదీ, సీఎం నారా చంద్రబాబు నాయుడు నేతృత్వంలో రాష్ట్రం ఉజ్వల భవిష్యత్తు వైపు ప్రయాణిస్తున్నందుకు అమిత్ షాకు ధన్యవాదాలు తెలిపారు.
