Miss World 2025: నేటి నుంచి మిస్ వరల్డ్ కాంటినెంటల్ ఫినాలే
ఈ వార్తాకథనం ఏంటి
72వ మిస్ వరల్డ్ పోటీలు తెలంగాణ రాష్ట్రంలో అట్టహాసంగా కొనసాగుతున్నాయి. మొత్తం 28 రోజులపాటు నిర్వహిస్తున్నఈ పోటీలు రాష్ట్రంలోని అనేక ప్రాంతాల్లో జరిగే విధంగా ప్రణాళిక రూపొందించారు. మే 10వ తేదీన గచ్చిబౌలిలోని ఇండోర్ స్టేడియంలో ఈ మెగా ఈవెంట్‌ ఘనంగా ప్రారంభమైంది. ముఖ్యమంత్రి రేవంత్ రెడ్డి ఈ కార్యక్రమాన్ని అధికారికంగా ప్రారంభించారు. ఈ ప్రారంభ వేడుకలో తెలంగాణకు ప్రత్యేకతనిచ్చే సాంప్రదాయ కళలతో పాటు పాశ్చాత్య నృత్యాలు, కళా ప్రదర్శనలు కూడా సందర్శకులను మంత్రముగ్ధులను చేశాయి. రాష్ట్ర ప్రభుత్వం ఈ పోటీలను ఎంతో ప్రతిష్ఠాత్మకంగా తీసుకుని నిర్వహిస్తున్న విషయం విదితమే. ప్రపంచంలోని 109 దేశాల నుండి అందాల రాణులు ఈ పోటీల్లో పాల్గొంటున్నాయి.
వివరాలు
ఈ నెల 31వ తేదీన విజేతను అధికారికంగా ప్రకటిస్తారు
భారతదేశానికి ప్రాతినిధ్యం వహిస్తూ,రాజస్థాన్‌కు చెందిన 21 ఏళ్ల నందిని గుప్తా ఈ పోటీలో పోటీ పడుతోంది. ఈ రోజు నుంచి మిస్ వరల్డ్ కాంటినెంటల్ ఫినాలే పోటీలు ప్రారంభంకానున్నాయి. ఇందులో అమెరికా,కరేబియన్,ఆఫ్రికా, యూరప్, ఆసియా వంటి ఖండాలనుండి ప్రాతినిధ్యం వహిస్తున్న కాంటెస్టెంట్లు క్రమంగా ఎంపిక చేయబడ్డారు. రెండో రౌండ్‌లో 48 మంది కాంటెస్టెంట్లు ఎంపిక చేయబడగా, నేపాల్, హైతీ, ఇండోనేషియా దేశాల నుంచి వచ్చిన అందాల రాణులు తమ ప్రతిభను ప్రదర్శించనున్నారు. ఈ పోటీ చివరగా ఈ నెల 31వ తేదీన విజేతను అధికారికంగా ప్రకటించనున్నారు. ఈ అంతర్జాతీయ పోటీని తెలంగాణలో నిర్వహించడం రాష్ట్రానికి ప్రపంచవ్యాప్తంగా గుర్తింపు తీసుకువస్తోంది. అంతేకాకుండా,రాష్ట్ర సాంస్కృతిక వైభవాన్ని ప్రపంచానికి పరిచయం చేయడంలోనూ,పర్యాటక రంగ అభివృద్ధికి దోహదపడుతుండటం విశేషం.