Andhra pradesh: 700 నోటీసులు,147 కేసులు,49 అరెస్టులు.. సోషల్ మీడియాలో అసభ్యకర పోస్టులు.. అసలేం జరుగుతోంది?
ఆంధ్రప్రదేశ్‌లో సోషల్ మీడియా పోస్టులపై వివాదం చెలరేగుతోంది. తెలుగుదేశం పార్టీ (టిడిపి) నేతృత్వంలోని జాతీయ ప్రజాస్వామ్య కూటమి (ఎన్‌డిఎ) ప్రభుత్వం వైఎస్సార్ కాంగ్రెస్ పార్టీ మద్దతుదారులు, కార్యకర్తలపై విరుచుకుపడటం ప్రారంభించింది. ఈ పోస్టుల్లో మహిళలను కించపరిచే పదజాలం ఉపయోగించారని టీడీపీ అంటోంది. నవంబర్ 6-12 మధ్య 680 నోటీసులు జారీ చేసిన పోలీసులు 147 ఎఫ్‌ఐఆర్‌లు నమోదు చేసి 49 మందిని అరెస్టు చేశారు.
ఎందుకు చర్యలు తీసుకుంటున్నారు?
ఇండియన్ ఎక్స్‌ప్రెస్ ప్రకారం, సోషల్ మీడియాలో అవమానకరమైన పోస్ట్‌లను పంచుకున్నారనే ఆరోపణలపై 100 మందికి పైగా YSRCP కార్యకర్తలను పోలీసులు అదుపులోకి తీసుకున్నారు. వివిధ పార్టీల నేతలు, వారి కుటుంబాలు, ముఖ్యంగా మహిళలను టార్గెట్ చేసిన పోస్టులపై ఈ చర్య తీసుకున్నారు. ఇలాంటి పోస్టులు వివిధ గ్రూపుల మధ్య ఘర్షణకు దారితీస్తాయని పోలీసులు చెబుతున్నారు.
వివాదాస్పద పోస్టుల్లో ఏముంది?
ముఖ్యమంత్రి చంద్రబాబు నాయుడు భార్య భువనేశ్వరి, ఆయన కుమారుడు, మంత్రి నారా లోకేశ్ భార్య బ్రాహ్మిణి, హోమ్ మంత్రి వంగలపూడి అనిత, టీడీపీ ఎమ్మెల్యే , నటుడు ఎన్ఆర్ బాలకృష్ణ భార్య వసుంధర, ఉపముఖ్యమంత్రి, జనసేన పార్టీ అధినేత పవన్ కళ్యాణ్ కుమార్తెలు, ఆంధ్రప్రదేశ్ కాంగ్రెస్ కమిటీ అధ్యక్షురాలు వై.ఎస్.షర్మిల, ఆమె తల్లి వై.ఎస్. విజయమ్మ గురించి అవమానకరమైన వ్యాఖ్యలు చేసిన పలు పోస్టులపై చర్యలు తీసుకుంటున్నారు.
వైఎస్సార్‌సీపీ కో-ఆర్డినేటర్ అరెస్టు
వైఎస్సార్‌సీపీ కోకన్వీనర్‌ రవీందర్‌రెడ్డిని కూడా పోలీసులు అరెస్టు చేశారు. పార్టీ సోషల్ మీడియా హ్యాండిల్స్‌ను రవీందర్ నిర్వహిస్తున్నారు. ఆన్‌లైన్‌లో అభ్యంతరకరమైన కంటెంట్‌ను వ్యాప్తి చేసి, కమ్యూనిటీల మధ్య అశాంతిని సృష్టించారని ఆయనపై ఆరోపణలు ఉన్నాయి. పోలీసులు తెలిపిన వివరాల ప్రకారం, రవీందర్ 40కి పైగా యూట్యూబ్ ఛానెల్‌లను నడుపుతున్నాడు, అందులో ముఖ్యంగా మహిళా నాయకులకు సంబంధించిన అనుచితమైన కంటెంట్‌ను ఉంది. రవీందర్‌ను 14 రోజుల రిమాండ్‌కు తరలించారు.
చర్యలు తీసుకుంటామని హెచ్చరించిన చంద్రబాబు
సామాజిక మాధ్యమాల్లో ముఖ్యంగా మహిళల పట్ల అనుచిత పదజాలం వాడేవారిపై చర్యలు తీసుకుంటామని ముఖ్యమంత్రి చంద్రబాబు నాయుడు హెచ్చరించారు. "ఆడబిడ్డలపై కించపరచే వ్యాఖ్యలు చేస్తే వారిని వదిలిపెట్టేది లేదని హెచ్చరించారు. వైసీపీ నేతల కుటుంబ సభ్యులపై వ్యతిరేక పోస్టులు చేసినా ఊరుకోమని స్పష్టం చేశారు.రాజకీయ నేతల ముసుగులో ఉన్ననేరస్తులను విడిచిపెట్టబోమని వార్నింగ్ ఇచ్చారు.'మర్యాదగా ఉండటం వల్ల మర్యాదా వ్యవహారం ఉంటుంది. కానీ, ఆడబిడ్డలను ఉద్దేశిస్తూ, వారి గౌరవం గురించి మాట్లాడినట్లైతే, దానికి తీవ్రమైన ప్రతిస్పందన ఉంటుంది. మీ చెల్లెలు, అక్కలు, తల్లులపై గౌరవం లేకపోవచ్చు, కానీ మాకు మాత్రం గౌరవం ఉంది. వైసీపీ నేతల భార్యలు,కూతుళ్లపై ఎలాంటి వ్యాఖ్యలు చేసినా, వారిని వదిలిపెట్టే ప్రసక్తే లేదు"అని అన్నారు.
టీడీపీ ప్రతీకార రాజకీయాలకు పాల్పడుతోంది: జగన్
మాజీ ముఖ్యమంత్రి, వైఎస్‌ఆర్‌సీపీ అధినేత వైఎస్‌ జగన్మోహన్ రెడ్డి అరెస్ట్‌లను ఖండిస్తూ టీడీపీ ప్రతీకార రాజకీయాలకు పాల్పడుతోందని ఆరోపించారు. "ప్రభుత్వం సోషల్ మీడియా కార్యకర్తలను వేధించడం, అక్రమంగా నిర్బంధించడం, బెదిరింపులు జారీ చేయడం, ఇది రాజ్యాంగం కల్పించిన భావప్రకటనా స్వేచ్ఛపై ప్రత్యక్ష దాడి. ఈ గొంతులను అణచివేయడం ద్వారా ప్రభుత్వం ప్రజాస్వామ్యాన్ని నిర్వీర్యం చేస్తోంది, ప్రాథమిక హక్కులను ఉల్లంఘిస్తోంది"అని జగన్ అన్నారు.
