Nepali Student: ఒడిశాలోని కీట్ వర్సిటీలో 18 ఏళ్ల నేపాలీ బాలిక మృతి.. 90 రోజుల్లో రెండో కేసు
ఈ వార్తాకథనం ఏంటి
ఒడిశా రాష్ట్ర రాజధాని భువనేశ్వర్‌లో ఉన్న కళింగ ఇన్‌స్టిట్యూట్ ఆఫ్ ఇండస్ట్రియల్ టెక్నాలజీ (కీట్) లో నేపాలీ విద్యార్థుల ఆత్మహత్యలు ఒకటి తర్వాత ఒకటి చోటుచేసుకోవడం తీవ్ర ఆందోళన కలిగిస్తోంది.
రెండు నెలల క్రితం ఒక నేపాల్‌కు చెందిన విద్యార్థిని ఈ వర్సిటీ హాస్టల్ గదిలో ఆత్మహత్య చేసుకున్న సంఘటన మరవకముందే, తాజాగా మళ్లీ మరో ఘటన సంభవించింది.
కీట్ విశ్వవిద్యాలయంలో కంప్యూటర్ సైన్స్‌ ఫస్ట్ ఇయర్‌ చదువుతోన్న 21 ఏళ్ల ప్రిషా షా అనే విద్యార్థిని గురువారం రాత్రి ఆత్మహత్యకు పాల్పడింది.
ఈమె నేపాల్ రాజధాని కఠ్మాండూ నగరానికి సుమారు 135 కిలోమీటర్ల దూరంలో ఉన్న బీర్‌గంజ్‌కు చెందినవారు. ప్రిషా, విశ్వవిద్యాలయ ప్రాంగణంలోని నాల్గో నెంబర్ హాస్టల్‌లో నివాసముండేది.
వివరాలు
హాస్టల్ గదిలోని సీలింగ్ ఫ్యాన్‌కు ఉరివేసుకుని..
గురువారం రాత్రి సుమారు 9 గంటల సమయంలో ఆమె హాస్టల్ గదిలోని సీలింగ్ ఫ్యాన్‌కు ఉరివేసుకుని బలవన్మరణానికి పాల్పడింది.
ఈ విషయాన్ని గమనించిన హాస్టల్ సిబ్బంది వెంటనే పోలీసులకు సమాచారం అందించారు.
దాంతో భువనేశ్వర్‌లోని ఇన్‌ఫోసిటీ పోలీస్ స్టేషన్ సిబ్బందితో పాటు డీసీపీ జగ్‌మెహన్ మీనా వర్సిటీకి చేరుకుని ప్రాథమిక దర్యాప్తు ప్రారంభించారు.
అనంతరం మృతదేహాన్ని పోస్టుమార్టం కోసం ఆసుపత్రికి తరలించారు. మృతురాలి కుటుంబ సభ్యులకు ఈ విషయాన్ని అధికారులు తెలియజేశారు.
వివరాలు
అనుమానాస్పద మృతిగా కేసు నమోదు
పోస్టుమార్టం నివేదిక వచ్చిన తర్వాతే ఆమె మృతికి గల అసలు కారణాలు వెలుగులోకి వస్తాయని పోలీసులు పేర్కొన్నారు.
ప్రస్తుతానికి ఈ ఘటనను అనుమానాస్పద మృతిగా పరిగణించి కేసు నమోదు చేసి దర్యాప్తు కొనసాగిస్తున్నట్లు తెలిపారు.
ఇదిలా ఉండగా, గత 90 రోజుల వ్యవధిలో కీట్ వర్సిటీలో నేపాలీ విద్యార్థి ఆత్మహత్యకు పాల్పడిన ఘటన ఇది రెండోది.
గతంలో, ఈ ఏడాది ఫిబ్రవరి 16న బీటెక్ మూడో సంవత్సరం చదువుతోన్న నేపాలీ విద్యార్థిని ప్రకృతి లమ్సాల్ కూడా ఇదే విధంగా తన హాస్టల్ గదిలో ఆత్మహత్య చేసుకున్న సంగతి తెలిసిందే.