Omar Abdullah: జమ్మూకశ్మీర్‌లో ప్రభుత్వం ఏర్పడిన తర్వాత మా తొలి తీర్మానం అదే: ఒమర్ అబ్దుల్లా
జమ్ముకశ్మీర్ అసెంబ్లీ ఎన్నికల ఫలితాల్లో నేషనల్ కాన్ఫరెన్స్ పార్టీ గెలిచిన తరువాత, ముఖ్యమంత్రి పదవిని ఒమర్ అబ్దుల్లా చేపడుతారని నేషనల్ కాన్ఫరెన్స్ అధినేత ఫరూక్ అబ్దుల్లా వెల్లడించారు. ఈ సందర్భంగా, పార్టీ ఉపాధ్యక్షుడు ఒమర్ అబ్దుల్లా మాట్లాడుతూ, "జమ్మూకశ్మీర్‌లో ప్రభుత్వం ఏర్పడిన వెంటనే, జమ్మూ-కశ్మీర్‌కు రాష్ట్ర హోదా ఇచ్చే విషయంలో తీర్మానాన్ని ప్రధానికి సమర్పిస్తాం." అలాగే, నియోజకవర్గాల పునర్విభజన, ఎన్నికలు, రాష్ట్ర హోదా వరుసగా ఉంటాయని తెలిపారు. కొంతమంది నేతలు జమ్మూకశ్మీర్‌ను దిల్లీతో పోల్చడంపై ఒమర్ అబ్దుల్లా మండిపడ్డారు. కశ్మీర్‌ను దిల్లీతో పోల్చవద్దని, ఎందుకంటే దేశ రాజధానికి రాష్ట్ర హోదా ఇస్తామని ఎవరూ చెప్పలేదని అన్నారు.
బీజేపీ , కశ్మీర్‌లోని రాజకీయ పార్టీలను బలహీనపరచడానికి ప్రయత్నిస్తోంది: ఒమర్ అబ్దుల్లా
కానీ, కశ్మీర్‌కు రాష్ట్ర హోదాను పునరుద్ధరిస్తామని ప్రధాని, హోంమంత్రి, బీజేపీ సీనియర్ మంత్రులు చెప్తున్నారని పేర్కొన్నారు. 2019 వరకు జమ్మూకశ్మీర్ రాష్ట్రంగానే ఉన్నట్లు గుర్తుచేశారు. కశ్మీర్‌లో శాంతిని కాపాడడం, అభివృద్ధికి పునాది వేయడం కోసం రాష్ట్ర హోదా అవసరమని తెలిపారు. బీజేపీ , కశ్మీర్‌లోని రాజకీయ పార్టీలను బలహీనపరచడానికి ప్రయత్నిస్తోందని దుయ్యబట్టారు. అయితే ఆ పార్టీ ఎత్తులు ఫలించలేదని పేర్కొన్నారు. ముఖ్యమంత్రిగా తన పేరును తన తండ్రి ప్రకటించడంపై ఒమర్ అబ్దుల్లా స్పందిస్తూ, "నేషనల్ కాన్ఫరెన్స్ శాసనసభా పక్ష సమావేశం అనంతరం మిత్రపక్షాలతో చర్చలు జరుపుకుని ఈ విషయంలో నిర్ణయం తీసుకుంటాం" అన్నారు.
జమ్మూకశ్మీర్‌కు తిరిగి రాష్ట్ర హోదా ఇవ్వాలన్నది ఫరూక్ అబ్దుల్లా డిమాండ్
జమ్మూకశ్మీర్‌లో ఆర్టికల్ 370ను రద్దు చేయడంతో 2019లో ప్రత్యేక ప్రతిపత్తి హోదా కోల్పోయింది. దీని ఫలితంగా ఆ రాష్ట్రం రెండు కేంద్ర పాలిత ప్రాంతాలుగా మారిపోయింది. జమ్మూకశ్మీర్‌కు తిరిగి రాష్ట్ర హోదా ఇవ్వాలన్నది ఫరూక్ అబ్దుల్లా నేతృత్వంలోని నేషనల్ కాన్ఫరెన్స్ డిమాండ్ చేస్తోంది. ఒమర్ అబ్దుల్లా కూడా గత ఐదేళ్లుగా అందుకోసమే కష్టపడుతున్నారు. కేంద్ర పాలిత ప్రాంతంగా ఉన్నంతవరకూ జమ్మూకశ్మీర్ అసెంబ్లీలో అడుగుపెట్టబోనని చెప్పారు. కానీ, యూటర్న్ తీసుకొని అసెంబ్లీ ఎన్నికల్లో రెండు నియోజకవర్గాల నుంచి పోటీ చేసి విజయం సాధించారు. కశ్మీర్‌కు రాష్ట్ర హోదాను పునరుద్ధరించే వరకు తన ప్రయత్నాన్ని విరమించుకోనని స్పష్టం చేశారు.
