Poll Body Chief: ఓట్ల చోరీ వ్యవహారం.. ఎన్నికల సంఘం సీఈసీ జ్ఞానేశ్‌కుమార్‌పై అభిశంసన తీర్మానం?
ఈ వార్తాకథనం ఏంటి
ఓట్ల చోరీ జరిగిందంటూ విపక్షాలు ఎన్నికల సంఘంపై తీవ్రస్థాయిలో దాడులు జరుపుతున్నాయి. ఈ క్రమంలోనే ప్రధాన ఎన్నికల కమిషనర్‌ (సీఈసీ) జ్ఞానేష్ కుమార్‌పై అభిశంసనకు సిద్ధమవుతున్నారని వార్తలు వెలువడుతున్నాయి. దీనికి సంబంధించి ప్రతిపక్ష ఎంపీలు నోటీసు తీసుకొచ్చే దిశగా ఆలోచిస్తున్నారని రాజకీయ వర్గాలు చెబుతున్నాయి. ఈ విషయంపై తాము త్వరలోనే నిర్ణయం ప్రకటిస్తామని కాంగ్రెస్‌ ఎంపీ ఇమ్రాన్‌ ప్రతాప్‌గఢీ మీడియా ముందు స్పష్టం చేశారు. అయితే సీఈసీని పదవి నుంచి తప్పించాలంటే పార్లమెంట్‌ రెండు సభల్లోనూ మూడింట రెండొంతుల మెజార్టీ తప్పనిసరి. కానీ విపక్షాల వద్ద ఆ సంఖ్యలో సభ్యులు లేరు.
వివరాలు
ఆధారాలైనా చూపండి.. క్షమాపణైనా చెప్పండి
ఇదిలాఉంటే... ఓట్ల చోరీ అంశంపై కాంగ్రెస్‌ అగ్రనేత రాహుల్‌ గాంధీ ఆందోళన కార్యక్రమం ప్రారంభించడంతో ఆదివారం సీఈసీ జ్ఞానేశ్‌ కుమార్‌ కమిషనర్లు సుఖ్బీర్‌సింగ్‌ సంధు, వివేక్‌ జోషీలతో కలిసి మీడియా ముందుకు వచ్చారు. కాంగ్రెస్‌ చేసిన ఆరోపణలకు ఆయన గట్టిగా సమాధానమిచ్చారు. తమపై చేసిన విమర్శలకు సంబంధించి కాంగ్రెస్‌ ఎంపీ తగిన ఆధారాలు చూపాలని, లేకుంటే బహిరంగంగా క్షమాపణ చెప్పాలని ఆయన డిమాండ్‌ చేశారు. తన వద్ద సాక్ష్యాలు ఉంటే వారం రోజుల్లో ప్రమాణపత్రం రూపంలో సమర్పించాలని స్పష్టమైన గడువు విధించారు. లేనిపక్షంలో ఆరోపణలను పూర్ణంగా నిరాధారంగా పరిగణిస్తామని హెచ్చరించారు. ఎన్నికల సంఘాన్ని అడ్డుపెట్టుకుని ఓటర్లపై దాడులు చేసి రాజకీయ లాభాలు పొందే ప్రయత్నాలు ఎప్పటికీ సఫలీకృతం కావని ఆయన స్పష్టం చేశారు.
వివరాలు
ఓటు దోపిడీకి కొత్త ఆయుధం
ఈ నేపథ్యంలోనే సీఈసీపై అభిశంసన వార్తలు చర్చనీయాంశంగా మారాయి. ఇదిలాఉంటే... ఓట్ల చోరీ అంశంపై చర్చ జరగాలని విపక్షాలు పట్టుబట్టడంతో లోక్‌సభలో నిరంతరం నినాదాలు వినిపిస్తున్నాయి. అదే సమయంలో రాజ్యసభను మధ్యాహ్నం రెండు గంటల వరకు వాయిదా వేసారు. ఇక, బిహార్‌లో జరుగుతున్న ఓటరు జాబితా ప్రత్యేక సమగ్ర సవరణను కాంగ్రెస్‌ సీనియర్‌ నేత రాహుల్‌ గాంధీ "ఓటు దోపిడీకి కొత్త ఆయుధం"గా అభివర్ణించారు. ఈ విషయాన్ని ఆయన తన వాట్సాప్‌ ఛానల్‌లో పోస్టు చేశారు. గత ఎన్నికల్లో ఓటు వేసిన పలువురిని ప్రస్తుత ఓటరు జాబితా నుంచి తొలగించారని ఆరోపించారు.