PMO Impersonation Case : పీఎంవో అధికారినంటూ బెంగాల్ సచివాలయంలోకి మహిళ.. ఢిల్లీలో అరెస్టు
ఈ వార్తాకథనం ఏంటి
ప్రధానమంత్రి కార్యాలయం (పీఎంవో)లో ఉన్నతస్థాయి అధికారినంటూ నకిలీ గుర్తింపుతో పశ్చిమ బెంగాల్ రాష్ట్ర సచివాలయం నబన్నాలోకి ప్రవేశించిన ఓ మహిళను పోలీసులు దిల్లీలో అరెస్టు చేశారు. ఆకాంక్ష విద్యార్థి అనే 30 ఏళ్ల మహిళ బుధవారం మధ్యాహ్నం పశ్చిమ బెంగాల్ ప్రజాపనుల శాఖ (పీడబ్ల్యూడీ) మంత్రి అజయ్‌ పొద్దార్‌తో సమావేశం కోసం ముందుగానే అపాయింట్‌మెంట్‌ తీసుకుంది. పీఎంవోకు చెందిన ఉన్నతాధికారినని చెప్పి కట్టుదిట్టమైన భద్రత ఉండే నబన్నాలోని మంత్రి కార్యాలయంలోకి ఆమె ప్రవేశించింది. అయితే ఆమెతో మాట్లాడుతున్న సమయంలో చెప్పిన వివరాల్లో పొంతన లేకపోవడంతో మంత్రి పొద్దార్‌కు అనుమానం వచ్చింది. ఆమె గుర్తింపు, హోదా గురించి ప్రశ్నించడంతో అసలు విషయం బయటపడుతుందన్న అనుమానంతో ఆకాంక్ష అక్కడి నుంచి వెళ్లిపోయినట్లు పోలీసులు తెలిపారు.
వివరాలు
ఢిల్లీలో అరెస్టు
వెంటనే మంత్రి సిబ్బంది పోలీసులకు సమాచారం అందించారు.
దీంతో శిబ్‌పూర్‌ పోలీసులు కేసు నమోదు చేసి దర్యాప్తు ప్రారంభించారు. అప్పటికే ఆకాంక్ష విమానంలో ఢిల్లీ వెళ్లిపోయినట్లు పోలీసులు గుర్తించారు.
ప్రభుత్వ అధికారిగా నటించడం, నకిలీ గుర్తింపుతో మోసం చేయడం, నకిలీ పత్రాలు సమర్పించడం వంటి ఆరోపణలపై కేసులు నమోదు చేశారు.
అనంతరం మహిళా అధికారి నేతృత్వంలోని హౌరా సిటీ పోలీసుల బృందం ఢిల్లీకి వెళ్లింది.
గురువారం సెంట్రల్‌ ఢిల్లీలోని ఆమె నివాసాన్ని గుర్తించి అదుపులోకి తీసుకుంది.
ఆమెను కోల్‌కతాకు తీసుకువచ్చి మరింత విచారించేందుకు ట్రాన్సిట్‌ రిమాండ్‌ తీసుకునే ప్రక్రియ చేపట్టినట్లు ఓ పోలీసు అధికారి తెలిపారు.
వివరాలు
నకిలీ పీఎంవో గుర్తింపులతో గతంలోనూ ఘటనలు
ఈ వ్యవహారంలో ఆకాంక్షకు స్థానికంగా ఎవరైనా సహకరించారా?ఆమె ఉపయోగించిన గుర్తింపు కార్డులు, ఇతర పత్రాలు నిజమైనవేనా?నబన్నాలోకి ప్రవేశించడానికి ఆమెకు అపాయింట్‌మెంట్‌ ఎలా లభించింది? వంటి అంశాలపై పోలీసులు దర్యాప్తు చేస్తున్నారు.
అంతేకాకుండా ఆమె వెనుక పెద్ద ముఠా ఏదైనా ఉందా? అనే కోణంలోనూ పోలీసులు దర్యాప్తు చేస్తున్నారు.
ఇదిలా ఉండగా,పీఎంవో అధికారులమంటూ నకిలీ గుర్తింపులతో ప్రభుత్వ అధికారులు, ఇతర ప్రముఖులను కలిసేందుకు ప్రయత్నించిన ఘటనలు గతంలోనూ వెలుగులోకి వచ్చాయి.
గత నెలలో ముంబయిలో ఇద్దరిని పోలీసులు అరెస్టు చేశారు. ప్రధానమంత్రి నరేంద్ర మోదీ గ్లోబల్‌ ఫిన్‌టెక్‌ ఫెస్ట్‌ 2026 కోసం ముంబయికి రానున్న నేపథ్యంలో, నిందితులు బాంద్రా-కుర్లా కాంప్లెక్స్‌లోని జియో వరల్డ్‌ ప్లాజాలోకి నకిలీ పీఎంవో గుర్తింపు కార్డుతో ప్రవేశించినట్లు పోలీసులు తెలిపారు.
వివరాలు
పీఎంవో అధికారినంటూ మరో మోసం..
అయితే ఆ ఘటనకు ప్రధాని పర్యటన లేదా కార్యక్రమంతో ఎలాంటి సంబంధం లేదని పోలీసులు స్పష్టం చేశారు.
మరో కేసులో జమ్మూకు చెందిన వ్యాపారవేత్త, ఓ వార్తా సంస్థ వ్యవస్థాపకుడు, ఎడిటర్‌ విజయ్‌ గుప్తాను ఎన్‌ఫోర్స్‌మెంట్‌ డైరెక్టరేట్‌ (ఈడీ) మే 20న ఢిల్లీలో అరెస్టు చేసింది.
పీఎంవోలో ప్రభావవంతమైన అధికారినంటూ నటించి, పనులు చేయిస్తానని చెప్పి పలువురి నుంచి రూ.4 కోట్లకు పైగా మోసం చేసినట్లు ఆయనపై ఆరోపణలు ఉన్నాయి.
జమ్మూకశ్మీర్‌లోని రాజకీయ, పరిపాలనా వర్గాల్లో తనకు ఉన్న పరిచయాలను ఉపయోగించుకుని తనకు లేని అధికారాన్ని ఉన్నట్లుగా చూపించుకున్నారని దర్యాప్తు సంస్థ ఆరోపించింది.
ఆయన తరచూ సివిల్‌ సెక్రటేరియట్‌కు వెళ్లడం కూడా ఈ వ్యవహారంలో ప్రస్తావనకు వచ్చింది.