Rahul Gandhi :తెలుగు భాషను 'ప్రైడ్ ఆఫ్ ఇండియా' గా అభివర్ణించిన రాహుల్ గాంధీ
ఈ వార్తాకథనం ఏంటి
కాంగ్రెస్‌ ఎంపీ రాహుల్ గాంధీ, అమెరికా పర్యటనలో భాగంగా డాలస్‌లోని ప్రవాస భారతీయులతో ముచ్చటించారు.
భారతదేశం భిన్నత్వంలో ఏకత్వానికి ప్రతీకగా నిలుస్తుందని ఆయన అన్నారు. భాషలు, సంప్రదాయాల ఆధారంగా ప్రజలను విడదీయకూడదని రాహుల్ గాంధీ పేర్కొన్నారు.
ఈ సందర్భంగా ఆయన ప్రత్యేకంగా తెలుగు భాష గురించి ప్రస్తావించారు.
"మన జాతీయ గీతం అన్ని రాష్ట్రాలను సమానంగా ప్రతిబింబిస్తుంది. కానీ అందులో ఏ రాష్ట్రం బెస్ట్‌ అని,మరొక రాష్ట్రం సెకండ్‌ బెస్ట్‌ అని అందులో ఎక్కడా ఉండదు.
భారతదేశం రాష్ట్రాల సమాఖ్యగా ఉంటుందని అది స్పష్టంగా చెబుతుంది. భాషలు,సంప్రదాయాలు కూడా అలాంటివే.
తమిళం మాట్లాడేవారు మాకు ఇష్టంలేదు అని, హిందీ మాట్లాడేవారే మనకు ఇష్టమని చెప్పడం సరికాదు," అని రాహుల్ గాంధీ వ్యాఖ్యానించారు.
వివరాలు
ఆ రాష్ట్ర ప్రజలను అవమానించినట్లే..
అదే విధంగా, "తెలుగు గురించి ఆలోచించండి. తెలుగు అనేది కేవలం ఒక భాష మాత్రమే కాదు, అది ఒక చరిత్ర, సంప్రదాయం,సంస్కృతిని సూచిస్తుంది.
మీరు తెలుగు భాషను హిందీతో పోలిస్తే అంత ముఖ్యమేమీ కాదని చెప్పినట్లయితే, ఆ రాష్ట్ర ప్రజలను అవమానించినట్లే. మీరు తెలుగు చరిత్ర, సంప్రదాయం, సంస్కృతి, పూర్వీకులను తక్కువగా చూడాలని చెప్పినట్లే అవుతుంది," అని రాహుల్ గాంధీ వ్యాఖ్యానించారు.
ఇది అర్థం చేసుకోకపోవడం వల్లే భారత్‌లో భిన్నతకు సంబంధించిన వివాదాలు కొనసాగుతున్నాయంటూ ఆయన బీజేపీ పై విమర్శలు గుప్పించారు.