Revanth Reddy: కార్పొరేట్ వైద్యులు నెలకు ఒకసారైనా ప్రభుత్వ ఆసుపత్రుల్లో సేవ చేయాలి: రేవంత్
ఈ వార్తాకథనం ఏంటి
కార్పొరేట్ ఆసుపత్రుల్లో పనిచేస్తున్న వైద్యులు తమ సామాజిక బాధ్యతగా ప్రతి ఏడాది కనీసం ఒక నెల పాటు ప్రభుత్వ ఆసుపత్రుల్లో సేవలు అందించాలని ముఖ్యమంత్రి రేవంత్ రెడ్డి విజ్ఞప్తి చేశారు. ఇది వైద్య వృత్తిలో అసలైన తృప్తిని, పరమసంతృప్తిని కలిగించే మార్గమని ఆయన పేర్కొన్నారు. బుధవారం హైదరాబాద్‌లోని బంజారాహిల్స్‌లో ఏఐజీ (AIG) ఆసుపత్రి కొత్త విభాగాన్ని ప్రారంభించిన సందర్భంగా మాట్లాడిన సీఎం, ప్రభుత్వ ఆసుపత్రులకు వెళ్లితే ప్రాణహాని జరుగుతుందన్న అపోహను తొలగించాలన్నదే రాష్ట్ర ప్రభుత్వ ప్రధాన లక్ష్యమని స్పష్టం చేశారు. ప్రభుత్వ వైద్య రంగాన్ని కార్పొరేట్ స్థాయిలో తీర్చిదిద్దేందుకు ప్రభుత్వం కృషి చేస్తోందని చెప్పారు.
వివరాలు
ఉస్మానియా ఆధునీకరణ.. నిమ్స్ విస్తరణ
వందేళ్ల చరిత్ర కలిగిన ఉస్మానియా ఆసుపత్రికి 30 ఎకరాల్లో రూ. 3 వేల కోట్లతో ఆధునిక సౌకర్యాలతో కూడిన భవనాన్ని నిర్మిస్తున్నట్లు సీఎం తెలిపారు. నిమ్స్ ఆసుపత్రిలో మరో 2,000 పడకల విభాగాన్ని ప్రారంభించనున్నట్టు పేర్కొన్నారు. వీటితో పాటు వరంగల్, అల్వాల్, ఎల్‌బీ నగర్, సనత్‌నగర్ ప్రాంతాల్లో నిర్మిస్తున్న ఆసుపత్రుల ద్వారా డిసెంబర్ 9 నాటికి రాష్ట్రంలో మొత్తం 7,000 పడకలు అందుబాటులోకి రానున్నాయని చెప్పారు.
వివరాలు
వైద్యులకు వేదిక ఏర్పాటు చేసేందుకు సూచన
కార్పొరేట్ రంగానికి చెందినవారు, విదేశాల్లో స్థిరపడిన వైద్యులు రాష్ట్ర ప్రజలకు సేవలు అందించాలనుకుంటున్నా, అందుకు తగిన వేదిక లేదని సీఎం అన్నారు. "ఉదాహరణకు అమెరికాలో స్థిరపడిన మన రాష్ట్ర వైద్యులు పేదలకు సేవ చేయాలనుకుంటే, ప్రస్తుతం అందుకు సరైన ప్లాట్‌ఫామ్ లేదు. ఇందుకు ప్రత్యేక వ్యవస్థను ఏర్పాటు చేయాలని అధికారులను ఆదేశించాం," అని వివరించారు. ఈ విధంగా కార్పొరేట్ వైద్యులు ప్రభుత్వ ఆసుపత్రులతో భాగస్వామ్యంగా పనిచేసే అవకాశాన్ని కల్పించాలనేదే ఉద్దేశమని తెలిపారు.
వివరాలు
ఆరోగ్య రంగానికి ప్రభుత్వ ప్రాధాన్యత
వైద్య ఖర్చుల భారాన్ని ప్రజలపై తగ్గించేందుకు తమ ప్రభుత్వం రాజీవ్ ఆరోగ్యశ్రీ లిమిట్‌ను రూ. 2 లక్షల నుంచి రూ. 10 లక్షలకి పెంచిందని సీఎం తెలిపారు. సీఎం సహాయ నిధి (CMRF) ద్వారా ఇప్పటివరకు రూ. 1,400 కోట్లు ఖర్చు చేసి పేదలకు వైద్యసాయం అందించామని చెప్పారు. ఆరోగ్యం, విద్య రంగాలకు తమ ప్రభుత్వం అత్యంత ప్రాధాన్యతనిస్తోంది. తాజా బడ్జెట్‌లో వైద్యానికి రూ. 11,500 కోట్లు, విద్యకు రూ. 21 వేల కోట్లు కేటాయించామని వివరించారు.
వివరాలు
మహిళల ఆరోగ్యంపై దృష్టి
రాష్ట్రంలోని స్వయం సహాయక సంఘాల్లో సభ్యులైన కోటి మంది మహిళలకు సంబంధించిన ఆరోగ్య వివరాలతో హెల్త్ ప్రొఫైల్స్ తయారు చేయాలని లక్ష్యంగా పెట్టుకున్నట్లు సీఎం తెలిపారు. మహిళల్లో క్యాన్సర్ కేసులు పెరుగుతుండటంతో, ప్రతి మహిళకు ప్రత్యేక ఐడీతో కూడిన హెల్త్ కార్డులు ఇవ్వాలనే ప్రణాళికను రూపొందిస్తున్నామని చెప్పారు. డాక్టర్ నోరి సేవలను వినియోగించనున్న ప్రభుత్వం క్యాన్సర్ చికిత్సలో ప్రపంచ వ్యాప్తంగా ఖ్యాతిగాంచిన డాక్టర్ నోరి దత్తాత్రేయుడిని రాష్ట్ర ప్రభుత్వ సలహాదారుగా నియమించిన విషయాన్ని సీఎం ప్రస్తావించారు. 'తెలంగాణ రైజింగ్ 2047' దృష్టి పత్రంలో ఆరోగ్య రంగానికి ప్రత్యేక అధ్యాయాన్ని చేర్చామని, డాక్టర్ నాగేశ్వర రెడ్డి వంటి నిపుణుల సలహాలు కూడా తీసుకుంటామని తెలిపారు.
వివరాలు
ఏఐజీ ఆసుపత్రి సేవలకు ప్రశంస
ఈ కార్యక్రమంలో ఏఐజీ ఆసుపత్రి సేవలను సీఎం ప్రశంసించారు. 65 దేశాల నుంచి రోగులు చికిత్స కోసం హైదరాబాద్‌లోని ఏఐజీకి రావడం రాష్ట్రానికే గర్వకారణమని పేర్కొన్నారు. భారత నర్సులకు జపాన్‌లో మంచి డిమాండ్ ఉందని, అందుకే వారికి జపనీస్ భాషలో శిక్షణ ఇచ్చేలా చర్యలు చేపట్టాలని నిర్ణయించినట్లు సీఎం వెల్లడించారు.