Telangana: సీఆర్‌ఐఎఫ్‌ కింద తెలంగాణకు గత ఐదేళ్లలో రూ.2,288 కోట్ల రహదారులు మంజూరు
ఈ వార్తాకథనం ఏంటి
గత ఐదేళ్లలో,మౌలిక వసతుల నిధి(సీఆర్‌ఐఎఫ్‌)కింద తెలంగాణకు మొత్తం రూ.2,288 కోట్ల వ్యయంతో 1109.04 కి.మీ. రహదారులు మంజూరు చేసినట్లు కేంద్ర రహదారుల మంత్రి నితిన్ గడ్కరీ వెల్లడించారు. లోక్‌సభలో నిజామాబాద్ భాజపా ఎంపీ ధర్మపురి అర్వింద్‌ అడిగిన ప్రశ్నకు సమాధానంగా ఆయన ఈ వివరాలను వెల్లడించారు. అంతేకాకుండా,2022-23లో రూ.432.84 కోట్ల వ్యయంతో 5 ఆర్‌ఓబీలు(రోడ్డు ఓవర్ బ్రిడ్జిలు)నిర్మాణం కోసం కూడా అనుమతులు ఇచ్చినట్లు తెలిపారు. 2019-24 మధ్యకాలంలో తెలంగాణ నుంచి సీఆర్‌ఐఎఫ్‌ కింద రూ.1,433.82 కోట్లు వసూలు చేయగా, రూ.1,391.50 కోట్లు విడుదల చేసినట్లు వెల్లడించారు. ప్రస్తుతం రూ.1,827.14 కోట్ల వ్యయంతో 790కి.మీ. పొడవైన 66రహదారుల నిర్మాణాలు వివిధ దశల్లో కొనసాగుతున్నాయని,2026 నాటికి ఈ ప్రాజెక్టులను దశలవారీగా పూర్తిచేస్తామని నితిన్ గడ్కరీ పేర్కొన్నారు.
వివరాలు
జిల్లాల వారీగా రహదారుల అనుమతులు
రంగారెడ్డి - 421 కి.మీ. కరీంనగర్, నల్గొండ - తలా 327 కి.మీ. ఖమ్మం - 293 కి.మీ. వరంగల్ - 266 కి.మీ. మెదక్ - 262 కి.మీ. మహబూబ్‌నగర్ - 224 కి.మీ. నిజామాబాద్ - 220 కి.మీ. అంతేకాకుండా, గత ఐదేళ్లలో తెలంగాణలో కొత్తగా 18 టోల్‌ప్లాజాలు నిర్మాణం జరిగినట్లు కూడా వెల్లడించారు.
వివరాలు
వరంగల్ అవుటర్ రింగు రోడ్డు ప్రాజెక్టు లేదు
వరంగల్‌కు అవుటర్ రింగు రోడ్డు నిర్మాణం కోసం కేంద్ర ప్రభుత్వం వద్ద ఎటువంటి ప్రతిపాదన లేదని నితిన్ గడ్కరీ స్పష్టంచేశారు. లోక్‌సభలో కాంగ్రెస్ ఎంపీ కడియం కావ్య అడిగిన ప్రశ్నకు సమాధానంగా,వరంగల్ చుట్టూ అవుటర్ రింగు రోడ్డు నిర్మాణ ప్రణాళిక ఏదీ లేదని తెలిపారు. అయితే, ఎన్‌హెచ్‌-163 నాలుగు వరుసల హైవేలో భాగంగా, యాదగిరి నుండి వరంగల్ సెక్షన్ వరకు వరంగల్ సిటీకి ఉత్తర భాగంలో బైపాస్ రోడ్డు నిర్మాణం జరిగిందని చెప్పారు. ఈ ప్రాజెక్టు 2020 అక్టోబర్ 1న ప్రారంభమైందని వెల్లడించారు. ఇక, వరంగల్ ఇన్నర్ రింగు రోడ్డు ప్రాజెక్టు మాత్రం కాకతీయ అర్బన్ డెవలప్‌మెంట్ అథారిటీ (KUDA) రాష్ట్ర ప్రభుత్వ పరిధిలోకి వస్తుందని వివరించారు.
వివరాలు
అటవీ హక్కుల చట్టం కింద పట్టాల పంపిణీ
2006 అటవీ హక్కుల గుర్తింపు చట్టం ప్రకారం, తెలంగాణలో 6,55,249 క్లెయిమ్‌లు నమోదయ్యాయి. అందులో 2,31,456 మందికి పట్టాలు పంపిణీ చేసినట్లు కేంద్ర గిరిజన వ్యవహారాల శాఖ సహాయ మంత్రి దుర్గాదాస్ ఉయికె ప్రకటించారు. లోక్‌సభలో పెద్దపల్లి కాంగ్రెస్ ఎంపీ గడ్డం వంశీకృష్ణ అడిగిన ప్రశ్నకు సమాధానంగా, ఇప్పటి వరకు వ్యక్తిగతంగా 6,51,822 క్లెయిమ్‌లు, సామూహికంగా 3,427 క్లెయిమ్‌లు దాఖలైనట్లు చెప్పారు. ఆమధ్య, 2,30,735 మంది వ్యక్తిగత దరఖాస్తుదారులు, 721 సామూహిక దరఖాస్తుదారులకు పట్టాలు మంజూరు చేసినట్లు వివరించారు.