PM Modi: చైనాలో ఎస్‌సీవో శిఖరాగ్ర సదస్సు.. పాక్ ప్రధానిని పట్టించుకోని మోదీ
ఈ వార్తాకథనం ఏంటి
చైనా వేదికగా జరుగుతున్న షాంఘై సహకార సంస్థ (ఎస్‌సీవో) శిఖరాగ్ర సమావేశంలో ప్రధానమంత్రి నరేంద్ర మోదీ, పాకిస్థాన్ ప్రధానమంత్రి షెహబాజ్ షరీఫ్‌కు పెద్ద షాక్ ఇచ్చారు. సమావేశానికి హాజరైన సమయంలో ఆయనతో కనీసం ముఖాముఖి కూడా జరగకుండా మోదీ పట్టించుకోకుండా వెళ్లిపోయారు. ఈ దృశ్యాలు ప్రస్తుతం సోషల్ మీడియాలో విస్తృతంగా వైరల్ అవుతున్నాయి. సమావేశం సోమవారం ప్రారంభమైంది. ముందుగా అన్ని దేశాధినేతలు గ్రూప్ ఫొటో కోసం వరుసగా నిలబడ్డారు. ఈ క్రమంలో పాకిస్థాన్ ప్రధాని షెహబాజ్ షరీఫ్ కూడా వరుసలో నిలబడి ఉన్నారు. తన స్థానానికి చేరుకోవడానికి మోదీ ఆయనను దాటుకుని వెళ్లాల్సి వచ్చింది. అయితే మోదీ మాత్రం షెహబాజ్ వైపు చూడకుండానే, రష్యా అధ్యక్షుడు వ్లాదిమిర్ పుతిన్‌తో సంభాషిస్తున్నట్లుగా దాటుకుని వెళ్లిపోయారు.
Details
షరీఫ్‌తో ఎటువంటి సంభాషణ జరపలేదు
గ్రూప్ ఫొటో తర్వాత కూడా మోదీ, షరీఫ్‌తో ఎటువంటి సంభాషణ జరపలేదు. బదులుగా, పుతిన్, చైనా అధ్యక్షుడు షీ జిన్‌పింగ్‌లతో కులాసాగా మాట్లాడారు. మోదీ వారితో ఎక్కువ సేపు నవ్వుతూ మాట్లాడడం కెమెరాల్లో రికార్డయింది. షరీఫ్ అక్కడి నుంచి వెళ్లిపోయిన తర్వాతే మోదీ నెమ్మదిగా వారి వెనుక నుంచి వెళ్లడం గమనార్హం. ఈ పరిణామాలు భారత్-పాకిస్థాన్ సంబంధాల ప్రస్తుత పరిస్థితిని ప్రతిబింబిస్తున్నాయి. ఏప్రిల్ 22న జమ్ముకశ్మీర్‌లోని పహల్గామ్‌లో ఉగ్రవాదులు జరిపిన దాడిలో 26 మంది ప్రాణాలు కోల్పోయారు. ఈ ఘటన తర్వాత భారత్ కఠిన చర్యలు చేపట్టింది. సింధు జలాల ప్రవాహాన్ని నిలిపివేసింది.
Details
పాకిస్థాన్ పౌరుల వీసా రద్దు
పాకిస్థాన్ పౌరులకు వీసాలను రద్దు చేసింది. అటారీ సరిహద్దు మూసివేసింది. మే 7న 'ఆపరేషన్ సిందూర్' నిర్వహించి 100 మంది ఉగ్రవాదులను హతం చేయడంతో పాటు పాకిస్థాన్ వైమానిక స్థావరాలను ధ్వంసం చేసింది. దీంతో రెండు దేశాల మధ్య సంబంధాలు తీవ్రంగా దెబ్బతిన్నాయి. ఇదే సమయంలో అమెరికా అధ్యక్షుడు డొనాల్డ్ ట్రంప్ భారత్‌పై 50 శాతం సుంకాలు విధించడం వల్ల భారత్-అమెరికా సంబంధాలు కూడా క్షీణించాయి. ఈ నేపథ్యంలో భారత్, రష్యా, చైనా మధ్య సంబంధాలు బలపడుతున్నాయి. గతంలో సరిహద్దు ఘర్షణల కారణంగా చైనాతో సంబంధాలు దెబ్బతిన్నప్పటికీ, ఏడేళ్ల తర్వాత ప్రధాని మోదీ చైనాను సందర్శించడం గమనార్హం