Anant Ambani: అనంత్ అంబానీ 'వంటారా' కేంద్రంపై తీవ్ర ఆరోపణలు.. విచారణకు సుప్రీంకోర్టు ప్రత్యేక దర్యాప్తు బృందం ఏర్పాటు
ఈ వార్తాకథనం ఏంటి
ప్రఖ్యాత పారిశ్రామికవేత్త ముకేష్ అంబానీ కుమారుడు,అనంత్ అంబానీ, గుజరాత్‌లో నిర్వహిస్తున్న 'వంటారా' వన్యప్రాణి సంరక్షణ కేంద్రంపై వచ్చిన తీవ్రమైన ఆరోపణల నేపథ్యంలో సుప్రీంకోర్టు స్పందన చూపించింది. ఈ సమస్యకు సంబంధించి సమగ్ర దర్యాప్తు నిర్వహించడానికి, సుప్రీంకోర్టు మాజీ న్యాయమూర్తి జస్టిస్ జాస్తి చలమేశ్వర్ నేతృత్వంలో ప్రత్యేక దర్యాప్తు బృందం (సిట్) ఏర్పాటు చేయబడింది. జస్టిస్ పంకజ్ మిథల్, జస్టిస్ ప్రసన్న బి. వరాలేలతో కూడిన ధర్మాసనం ఈ మేరకు ఉత్తర్వులు ఇచ్చింది. వంటారా కేంద్రంలో జంతువులను అక్రమంగా నిర్బంధిస్తున్నారని, దేశం,విదేశాల నుంచి వన్యప్రాణులను అనధికారంగా తరలిస్తున్నారని ఆరోపిస్తూ రెండు ప్రజా ప్రయోజన వ్యాజ్యాలు (PILs) దాఖలు అయ్యాయి.
వివరాలు
జంతువుల అక్రమ రవాణా, నిర్బంధంపై దర్యాప్తునకు ఆదేశం
ఈ పిటిషన్లపై విచారణ సందర్భంగా, ధర్మాసనం స్వతంత్ర దర్యాప్తు అవసరమని నిర్ణయించింది. సాధారణంగా ఇలాంటి పిటిషన్లను తిరస్కరించగలరని, కానీ ఈ ఆరోపణలు చట్టపరమైన సంస్థల పనితీరుపై సందేహాలు రేకెత్తిస్తున్నందున వాస్తవాలను బయటకు తేవడం అవసరమని కోర్టు పేర్కొంది. జస్టిస్ చలమేశ్వర్ నేతృత్వంలోని సిట్‌లో ఉత్తరాఖండ్, తెలంగాణ హైకోర్టుల మాజీ ప్రధాన న్యాయమూర్తి జస్టిస్ రాఘవేంద్ర చౌహాన్, ముంబై మాజీ పోలీస్ కమిషనర్ హేమంత్ నాగ్‌రాలే, సీనియర్ ఐఆర్ఎస్ అధికారి అనీశ్ గుప్తా సభ్యులుగా ఉంటారు. ఈ బృందం దేశం,విదేశాల నుంచి ఏనుగులు సహా ఇతర జంతువులను ఎలా సంపాదించారో, వన్యప్రాణి సంరక్షణ చట్టం-1972,అంతర్జాతీయ నిబంధనలు పాటించాయో లేదో,జంతువులకు అందుతున్న వైద్య సౌకర్యాలు,ఆర్థిక అవకతవకలు, మనీ లాండరింగ్ వంటి ఆరోపణలపై సమగ్ర దర్యాప్తు నిర్వహించనుంది.
వివరాలు
దర్యాప్తు కేవలం వాస్తవాలను నిగ్గు తేల్చేందుకు మాత్రమేనన్న సుప్రీంకోర్టు
ఈ దర్యాప్తు కేవలం వాస్తవాలను వెలికి తేవడమే లక్ష్యంగా జరుగుతుందని, వంటారా సంస్థ లేదా ఇతర ప్రభుత్వ సంస్థల పనితీరుపై ఎలాంటి అనుమానాలను సృష్టించడమే లక్ష్యం కాదని సుప్రీంకోర్టు స్పష్టంగా తెలిపింది. ధర్మాసనం,సిట్‌ను సెప్టెంబర్ 12 వరకు తమ నివేదికను సమర్పించమని ఆదేశించింది. తదుపరి విచారణను సెప్టెంబర్ 15కు వాయిదా వేసింది. ఇంకా, మహారాష్ట్రలోని కొల్హాపూర్ నుంచి వంటారాకు తరలించబడిన 'మాధురి' అనే ఏనుగుపై స్థానికులు భారీగా ఆందోళనలు వ్యక్తం చేసిన కొన్ని రోజులకే ఈ పిటిషన్లు దాఖలయ్యాయి.
వివరాలు
న్యాయస్థానం ఆదేశాల మేరకే 'మాధురి'వంటారాకి
పిటిషనర్ల ఆరోపణ ప్రకారం, ఆలయాలు, ప్రైవేటు వ్యక్తుల వద్ద ఉన్న ఏనుగులు, ఇతర అంతరించిపోతున్న జీవులను అనధికారంగా వంటారాకు తరలించడం జరుగుతుందని పేర్కొన్నారు. అయితే, న్యాయస్థానం ఆదేశాల మేరకే 'మాధురి'ని తమ కేంద్రానికి తరలించామని, జంతువులకు సంరక్షణ కల్పించడమే తమ బాధ్యత అని వంటారా యాజమాన్యం గతంలో ఒక ప్రకటనలో తెలిపింది.