Pahalgam: కొన్నాళ్లు ముందు బేతాబ్‌ వ్యాలీలో ఉగ్రవాదుల సంచారంపై అనుమానాలు..?
ఈ వార్తాకథనం ఏంటి
పహల్గాం సమీపంలోని బైసరన్‌ లోయలో జరిగిన ఉగ్రదాడిపై ప్రస్తుతం కీలక ఆధారాలు వెలుగు చూస్తున్నాయి. ఈ దాడికి ముందు నుంచే ఉగ్రవాదులు పర్యాటక ప్రాంతాల్లో రెక్కీ నిర్వహించారని అనుమానాలు బలపడుతున్నాయి. తాజాగా ఒక మలయాళ కుటుంబం తమ కుమార్తె కోసం తీసిన వీడియోలో ఇద్దరు అనుమానితులు కనిపించారని ఆరోపణలొచ్చాయి. పుణేలో స్థిరపడ్డ మలయాళ సామాజిక ఉద్యమకారుడు శ్రేజిత్‌ రమేశన్‌ తన కుటుంబంతో కలిసి ఏప్రిల్‌ 18న జమ్మూకశ్మీర్‌లో పర్యటించారు. ఈ సందర్భంగా బేతాబ్‌ వ్యాలీకి వెళ్లిన ఆయన, అక్కడ భార్య, ఇద్దరు కుమార్తెలతో కలిసి సెల్ఫీ వీడియోలు తీశారు.
Details
ఇద్దరు ఉగ్రవాదుల ఊహచిత్రాలు ఫోన్లో
బేతాబ్‌ వ్యాలీ పహల్గాం నుంచి సుమారు 7.5 కిలోమీటర్ల దూరంలో ఉంది. పర్యటన అనంతరం వారు శ్రీనగర్‌, గుల్మార్గ్‌ వెళ్లి తిరిగి పుణేకు చేరుకున్నారు. ఏప్రిల్‌ 22న బైసరన్‌ లోయలో ఉగ్రవాదులు పర్యాటకులపై కాల్పులు జరిపిన ఘటనలో పలువురు ప్రాణాలు కోల్పోయారు. దీంతో రమేశన్‌ బంధువులు, స్నేహితులు అతనికి ఫోన్ చేసి క్షేమం తెలుసుకున్నారు. అదే సమయంలో నిందితుల ఊహాచిత్రాలు బయటకొచ్చాయి. వాటిని గమనించిన రమేశన్‌, తాను బేతాబ్‌ వ్యాలీలో తీసిన వీడియోల్లో ఉన్న ఇద్దరు వ్యక్తులు.. ఊహాచిత్రాల్లో ఉన్నవారితో పోలుస్తున్నారని గుర్తించారు.
Details
జాతీయ దర్యాప్తు సంస్థకు వీడియో క్లిప్ అందజేత
ఈ సమాచారంతో వెంటనే రమేశన్‌ జాతీయ దర్యాప్తు సంస్థ (NIA)ను సంప్రదించి, సంబంధిత వీడియో క్లిప్‌ను అందజేశారు. దీనిపై ప్రస్తుతం ఫోరెన్సిక్‌ దర్యాప్తు కొనసాగుతోంది. వీడియోలో కనిపించిన వారు నిజంగా ఉగ్రవాదులేనా లేదా అనే విషయంపై పరిశీలన జరుగుతోంది. అవసరమైన సమయంలో తమ ఎదుట హాజరుకావాలని NIA కోరినట్టు రమేశన్‌ చెప్పారు. అయితే ఈ ఘటనకు సంబంధించి మీడియా ముందు మాట్లాడవద్దని అధికారులు సూచించినట్లు ఆయన వెల్లడించారు. ఈ ఘటన నేపథ్యంలో పర్యాటక ప్రాంతాల్లో భద్రతా ఏర్పాట్లను మరింత కట్టుదిట్టం చేయాల్సిన అవసరం స్పష్టమవుతోంది.