Tamil Nadu Minister: మహిళలను కించపర్చేలా తమిళనాడు మంత్రి పొన్ముడి వ్యాఖ్యలు.. డిప్యూటీ జనరల్ సెక్రటరీ పదవి నుంచి తొలగింపు
ఈ వార్తాకథనం ఏంటి
తమిళనాడు అటవీశాఖ మంత్రి కె. పొన్ముడి మరోసారి వివాదాస్పద వ్యాఖ్యలతో వార్తల్లోకి ఎక్కారు.
ఇటీవల ఆయన మహిళలపై చేసిన అభ్యంతరకర వ్యాఖ్యలు తీవ్ర విమర్శలకు లోనవుతున్నాయి.
ఈ వ్యాఖ్యల నేపథ్యంలో గాయని చిన్మయి, నటి ఖుష్బూ వంటి ప్రముఖులతో పాటు పలువురు సామాజికవేత్తలు కూడా ఆయన తీరుపై తీవ్రంగా విరుచుకుపడ్డారు.
ఆయన వ్యాఖ్యలపై ఆయన స్వంత పార్టీ అయిన డీఎంకేలోనూ విమర్శలు వెల్లువెత్తిన తరువాత, పార్టీ అధికారులు ఆయనపై చర్యలు తీసుకోవాల్సిన పరిస్థితి ఏర్పడింది.
ఒక కార్యక్రమంలో పాల్గొన్న సందర్భంగా కె. పొన్ముడి చేసిన ప్రసంగం వీడియో రూపంలో ఇంటర్నెట్‌లో వైరల్ అయింది.
ఆ వీడియోలో ఆయన,వ్యభిచారిణులు,వారి ఖాతాదారుల మధ్య జరిగే సంభాషణను వివరిస్తూ, అసభ్య పదజాలాన్ని వాడారు.
వివరాలు
పొన్ముడి వ్యాఖ్యలను ఖండించిన కనిమొళి
ఈ మాటలన్నీ "జోక్" అని చెప్పినప్పటికీ, ఆయన వాడిన భాషా శైలి మహిళల గౌరవాన్ని దిగజార్చేలా ఉందని పలువురు అభిప్రాయపడుతున్నారు.
దీంతో ఆయన వ్యాఖ్యలు తీవ్రంగా విమర్శలకు గురయ్యాయి. ఈ వివాదంపై భాజపా నాయకురాలు, సినీ నటి ఖుష్బూ సుందర్ స్పందిస్తూ, కె. పొన్ముడిని తక్షణమే మంత్రి పదవి నుంచి తొలగించాలని డిమాండ్ చేశారు.
ఆమెతో పాటు డీఎంకే ఎంపీ కనిమొళి కూడా ఆయన వ్యాఖ్యలను ఖండించారు.
ఆమె కూడా ఈ వ్యాఖ్యలను అమర్యాదకరమైనవిగా అభివర్ణించారు.
ఈ వివాదం ఊపందుకోవడంతో, డీఎంకే పార్టీ కఠిన నిర్ణయం తీసుకుని కె. పొన్ముడిని పార్టీ డిప్యూటీ జనరల్ సెక్రటరీ పదవి నుంచి తొలగించింది.