Telangana: పాత పెన్షన్ కోసం ఉద్యోగుల పోరు.. నవంబర్ 17న రాష్ట్రవ్యాప్త సామూహిక సెలవు
ఈ వార్తాకథనం ఏంటి
తెలంగాణలో పాత పెన్షన్ విధానం (ఓపీఎస్) పునరుద్ధరణ కోసం ప్రభుత్వ ఉద్యోగులు, ఉపాధ్యాయులు మరోసారి ఆందోళనకు సిద్ధమయ్యారు. ఈ నెల 17న రాష్ట్రవ్యాప్తంగా సామూహిక సెలవు పాటించాలని తెలంగాణ స్టేట్ కాంట్రిబ్యూటరీ పెన్షన్ స్కీమ్ ఎంప్లాయీస్ యూనియన్ (టీజీసీపీఎస్ఈయూ) నిర్ణయించింది. ఈ సందర్భంగా అన్ని జిల్లా కేంద్రాల్లో 'ధర్మ దీక్షలు' నిర్వహించనున్నట్లు ప్రకటించింది.
వివరాలు
2.60 లక్షల మంది ఉద్యోగులపై ప్రభావం
2023 అసెంబ్లీ ఎన్నికల సమయంలో కాంగ్రెస్ పార్టీ పెన్షన్ విధానంపై ఇచ్చిన హామీకి మూడేళ్లు పూర్తవుతున్న సందర్భంగా ఈ నిరసన కార్యక్రమాన్ని చేపడుతున్నట్లు యూనియన్ అధ్యక్షుడు స్థితప్రజ్ఞ తెలిపారు.
రాష్ట్రంలో ప్రస్తుతం సుమారు 2.60 లక్షల మంది సీపీఎస్ పరిధిలోని ఉద్యోగులు, ఉపాధ్యాయులు ఉన్నారు.
వీరిలో అత్యవసర సేవల విభాగాల్లో పనిచేస్తున్న 45 వేల మందికి సామూహిక సెలవు నుంచి మినహాయింపు ఇచ్చారు.
మిగిలిన 2.15 లక్షల మంది ఈ ఆందోళనలో పాల్గొనే అవకాశం ఉందని యూనియన్ అంచనా వేస్తోంది.
ఇప్పటికే 1.50 లక్షల మందికి పైగా ఉద్యోగులు సామూహిక సెలవు కోసం దరఖాస్తు చేసుకున్నట్లు వెల్లడించింది.
వివరాలు
ప్రభుత్వ ప్రధాన కార్యదర్శికి వినతిపత్రం
పాత పెన్షన్ విధానాన్ని అమలు చేయాలనే డిమాండ్తో యూనియన్ ప్రధాన కార్యదర్శి కల్వరీ శ్రీకాంత్ నేతృత్వంలోని ప్రతినిధి బృందం ఆదివారం ప్రభుత్వ ప్రధాన కార్యదర్శి సంజయ్ జాను కలిసి వినతిపత్రం అందజేసింది.
తమ వేతనాల నుంచి 11.5 శాతం మొత్తాన్ని సీపీఎస్ ఖాతాలకు జమ చేస్తున్నప్పటికీ.. పదవీ విరమణ తర్వాత వచ్చే పెన్షన్, వైద్య భద్రతపై స్పష్టత లేకుండా పోయిందని ఉద్యోగులు ఆవేదన వ్యక్తం చేశారు.
ఉద్యోగ విరమణ తర్వాత ఆర్థిక భద్రతపై ఆందోళన నెలకొందని పేర్కొన్నారు.
కర్ణాటక, తమిళనాడు, కేరళ రాష్ట్రాల్లో తీసుకున్న నిర్ణయాల తరహాలో తెలంగాణలోనూ ప్రభుత్వం వెంటనే చర్యలు చేపట్టాలని కోరారు.
ముఖ్యమంత్రి రేవంత్ రెడ్డి గతంలో ఇచ్చిన హామీని నిలబెట్టుకోవాలని విజ్ఞప్తి చేశారు.
వివరాలు
ఆందోళనకు ఉపాధ్యాయ సంఘాల మద్దతు
సీపీఎస్ ఉద్యోగుల సామూహిక సెలవు కార్యక్రమానికి ఎమ్మెల్సీ శ్రీపాల్ రెడ్డితో పాటు పలు ఉపాధ్యాయ సంఘాలు మద్దతు ప్రకటించాయి.
నల్గొండలో నిర్వహించనున్న ధర్మ దీక్షలో శ్రీపాల్ రెడ్డి పాల్గొననున్నారు.
రాష్ట్రంలోని ప్రతి ఉద్యోగి, ఉపాధ్యాయుడు ఈ కార్యక్రమంలో భాగస్వాములై విజయవంతం చేయాలని యూనియన్ నాయకులు పిలుపునిచ్చారు.
ఈ ఆందోళన నేపథ్యంలో నవంబర్ 17న అత్యవసరం కాని ప్రభుత్వ సేవలకు అంతరాయం కలిగే అవకాశముంది.