TG ENC: గోదావరి, కృష్ణా నదీ యాజమాన్య బోర్డులకు.. బనకచర్ల లింక్ విషయం ప్రస్తావన
ఈ వార్తాకథనం ఏంటి
తెలంగాణ నీటిపారుదల శాఖ ఇంజనీర్‌-ఇన్‌-చీఫ్ (ఈఎన్సీ) గోదావరి, కృష్ణా నదీ యాజమాన్య బోర్డులకు లేఖ రాశారు.
ఈ లేఖలో గోదావరి.. బనకచర్ల లింక్ విషయంలో ఆంధ్రప్రదేశ్‌ ప్రభుత్వానికి ముందుకు వెళ్లే అవకాశం ఇవ్వకుండా చర్యలు తీసుకోవాలని కోరారు.
అనుమతులు లేకుండానే ఆంధ్రప్రదేశ్‌ ఈ ప్రాజెక్టును చేపడుతోందని, దీనిపై ఇప్పటికే తెలంగాణ ప్రభుత్వం గతంలోనే అభ్యంతరం వ్యక్తం చేసిందని ఈఎన్సీ తన లేఖలో వెల్లడించారు.
ఈ పనులు రాష్ట్రాల విభజన చట్టానికి, అలాగే ట్రైబ్యునల్ ఇచ్చిన అవార్డులకు వ్యతిరేకంగా ఉంటాయని పేర్కొన్నారు.
పైగా, ఈ ప్రాజెక్టు అమలు వల్ల తెలంగాణకు నష్టం జరిగే అవకాశం ఉందని హెచ్చరించారు.
వివరాలు
"జలహారతి కార్పొరేషన్" ఏర్పాటు చేస్తూ అధికారిక ఉత్తర్వులు
అంతేకాకుండా, ఈ నెల 7వ తేదీన జరిగిన గోదావరి నదీ యాజమాన్య బోర్డు (జీఆర్ఎంబీ) సమావేశంలోనూ ఈ అంశం ప్రస్తావనకు వచ్చినట్లు వివరించారు.
ఆ సమావేశంలో బోర్డు ఛైర్మన్‌ తో పాటు ఆంధ్రప్రదేశ్‌ సభ్యులు ఈ ప్రతిపాదన ఇప్పటికీ ప్రారంభ దశలోనే ఉందని పేర్కొన్నారని తెలిపారు.
కానీ, అదే సమావేశం తర్వాతి రోజు, ఆంధ్రప్రదేశ్‌ ప్రభుత్వం గోదావరి - బనకచర్ల లింక్ అమలుకు సంబంధించి "జలహారతి కార్పొరేషన్" పేరుతో ఒక సంస్థను ఏర్పాటు చేస్తూ అధికారిక ఉత్తర్వులు జారీ చేసిన విషయాన్ని ఈఎన్సీ లేఖలో పేర్కొన్నారు.
ఈ నేపథ్యంలో, తెలంగాణ ఈఎన్సీ తక్షణమే చర్యలు తీసుకోవాలని, ఏపీ ప్రభుత్వాన్ని వెంటనే నిలిపివేయాలని డిమాండ్ చేశారు.
వివరాలు
ఏపీ ప్రభుత్వం జలాల మళ్లింపునకు సంబంధించిన ఉత్తర్వులు
పోలవరం ప్రాజెక్టు, తాడిపూడి ఎత్తిపోతల పథకాల కింద కూడా ఇందుకు సంబంధించిన ఏవైనా టెండర్లు లేదా కార్యాచరణను చేపట్టకూడదని స్పష్టం చేశారు.
ప్రస్తుతం కృష్ణా నది నీటి పంపిణీపై ట్రైబ్యునల్ ముందు వాదనలు జరుగుతున్న నేపథ్యంలో, అలాంటి పరిస్థితుల్లో ఏపీ ప్రభుత్వం జలాల మళ్లింపునకు సంబంధించిన ఉత్తర్వులు ఇవ్వడం తగదని వివరించారు.
గతంలో జారీ చేసిన జలహారతి కార్పొరేషన్ ఉత్తర్వులను తక్షణమే రద్దు చేయాలని, దీనికోసం జీఆర్ఎంబీ, కేఆర్ఎంబీలు చొరవ చూపాలని తెలంగాణ ఈఎన్సీ తన లేఖలో స్పష్టం చేశారు.