TGSRTC: ప్రయాణికులకు టీజీఎస్‌ఆర్టీసీ గుడ్ న్యూస్.. బతుకమ్మ,దసరాకు 7754 స్పెషల్ బస్సులు
ఈ వార్తాకథనం ఏంటి
బతుకమ్మ, దసరా పండుగల సందర్భంగా రాష్ట్రంలోని ప్రయాణికులకు ఎటువంటి ఇబ్బందులు ఎదురవకూడదని టీజీఎస్‌ఆర్టీసీ ముందస్తుగా విస్తృత ఏర్పాట్లు చేసింది. ఈ నెల 20 నుంచి అక్టోబరు 2 వరకు మొత్తం 7,754 ప్రత్యేక బస్సు సర్వీసులను నిర్వహించనుందని సంస్థ ప్రకటించింది. ఈ ప్రత్యేక సర్వీసులకు సంబంధించి సకల ప్రణాళికలను ఇప్పటికే సిద్ధం చేసింది. ఇందులో 377 ప్రత్యేక సర్వీసులకు ముందస్తు రిజర్వేషన్ సౌకర్యం కూడా అందించబడుతుంది. అలాగే పండగ ముగిసిన తరువాత సొంతూర్లకు వెళ్లిన ప్రయాణికులు తిరిగి వచ్చే విధంగా, అక్టోబరు 5, 6 తేదీల్లో కూడా రిజర్వేషన్, రద్దీ పరిస్థితిని బట్టి అదనపు బస్సులు నడపడానికి తగిన ఏర్పాట్లు చేయబడుతున్నాయి.
వివరాలు
రాష్ట్ర నలుమూల ప్రాంతాలకు మాత్రమే కాకుండా ఇతర రాష్ట్రాలకు కూడా బస్సులు
హైదరాబాద్‌లో ప్రధానంగా ఎంజీబీఎస్‌, జేబీఎస్ స్టేషన్లతోపాటు, ప్రయాణికుల రద్దీ ఎక్కువగా ఉండే కేపీహెచ్‌బీ, ఉప్పల్ క్రాస్‌రోడ్, ఉప్పల్ బస్టాండ్, దిల్‌సుఖ్‌నగర్, ఎల్బీనగర్, ఆరాంఘర్ వంటి ప్రాంతాల నుండి ప్రత్యేక బస్సులు సర్వీసులు ప్రారంభించబడతాయి. అంతేకాక, హైదరాబాద్, సికింద్రాబాద్ నుండి రాష్ట్ర నలుమూల ప్రాంతాలకు మాత్రమే కాకుండా, ఆంధ్రప్రదేశ్, కర్ణాటక, మహారాష్ట్ర రాష్ట్రాలకు కూడా ప్రత్యేక బస్సులు నడపడానికి టీజీఎస్‌ఆర్టీసీ సిద్ధమవుతోంది. పండగ స్పెషల్ బస్సుల్లో ప్రత్యేక ఛార్జీలు వసూలు చేయనున్నారు.
వివరాలు
గతేడాది కంటే అదనంగా 617 బస్సులు: సజ్జనార్‌
"బతుకమ్మ, దసరా పండుగల సమయంలో ప్రజలకు సురక్షితమైన, సౌకర్యవంతమైన ప్రయాణాన్ని అందించడానికి సంస్థ పూర్తి స్థాయిలో సిద్ధంగా ఉంది. గతేడాది కంటే అదనంగా 617 బస్సులను ఏర్పాటు చేస్తున్నాం. రద్దీ ఎక్కువగా ఉన్న ప్రాంతాల్లో ప్రత్యేక క్యాంప్‌లు ఏర్పాటు చేసి, ప్రయాణికులకు అన్ని రకాల సౌకర్యాలను అందిస్తున్నాం. రద్దీ ప్రాంతాల వద్ద పర్యవేక్షణ అధికారులను నియమించి, పరిస్థితిని గమనిస్తూ ప్రయాణికుల కోసం ప్రత్యేక బస్సులను అందుబాటులో ఉంచుతాము. పోలీసులు, రవాణా, మున్సిపల్ శాఖల అధికారులతో సమన్వయం చేసి, ప్రతి ప్రయాణికుడు తమ గమ్యస్థానానికి సురక్షితంగా చేరేలా అన్ని చర్యలు తీసుకుంటున్నాం" అని టీజీఎస్‌ఆర్టీసీ ఎండీ వీసీ సజ్జనార్‌ తెలిపారు
వివరాలు
రిజర్వేషన్ చేసుకోవడానికి టీజీఎస్‌ఆర్టీసీ అధికారిక వెబ్‌సైట్
ప్రత్యేక సర్వీసుల్లో ముందస్తు రిజర్వేషన్ చేసుకోవడానికి, ప్రయాణికులు టీజీఎస్‌ఆర్టీసీ అధికారిక వెబ్‌సైట్ http://tgsrtcbus.in ను ఉపయోగించవచ్చని సూచించారు. ఇంకా వివరాల కోసం కాల్ సెంటర్ నంబర్లు 040-69440000, 040-23450033 ను సంప్రదించవచ్చని తెలిపారు.