Trump Tariffs: రేపటి నుంచే అమల్లోకి అమెరికా కొత్త టారిఫ్‌లు.. భారత్‌కు నోటీసులిచ్చిన అమెరికా
ఈ వార్తాకథనం ఏంటి
రష్యా నుంచి భారత్‌ చమురు కొనుగోలు చేస్తోందన్న కారణంతో అమెరికా అధ్యక్షుడు డొనాల్డ్‌ ట్రంప్‌ విధించిన అదనపు సుంకాలు మరికొద్ది గంటల్లోనే అమల్లోకి రానున్నాయి. ఈ విషయంపై అమెరికా ప్రభుత్వం ఇప్పటికే న్యూఢిల్లీకి అధికారికంగా నోటీసు జారీ చేసింది. అగ్రరాజ్యం ప్రకారం ఆగస్టు 27వ తేదీ అర్ధరాత్రి 12:01 గంటల నుంచే (భారత కాలమానం ప్రకారం అదే రోజు ఉదయం 10 గంటలకు) ఈ అదనపు సుంకాలు అమల్లోకి వస్తాయని స్పష్టతనిచ్చింది. ఆ సమయం తర్వాత అమెరికాలోకి ప్రవేశించే భారతీయ ఉత్పత్తులపై ఇవి తప్పనిసరిగా వర్తిస్తాయని హోంల్యాండ్‌ సెక్యూరిటీ శాఖ తమ ప్రకటనలో పేర్కొంది.
వివరాలు
భారతదేశంపై మొత్తం సుంకాల భారం 50 శాతం
ఇప్పటికే అమెరికా భారత్‌పై 25 శాతం సుంకాలు విధించిన విషయం తెలిసిందే. అవి ఆగస్టు 7వ తేదీ నుంచే అమలులోకి వచ్చాయి. అయితే, రష్యా చమురు దిగుమతి చేస్తున్నందున మరో 25 శాతం అదనపు టారిఫ్‌లు కూడా విధిస్తున్నట్లు ఇటీవల డొనాల్డ్‌ ట్రంప్‌ ప్రకటించారు. ఈ నేపథ్యంలో భారతదేశంపై మొత్తం సుంకాల భారం 50 శాతానికి పెరిగింది. కొత్త టారిఫ్‌లు అమల్లోకి రావడంతో దేశీయ వస్త్ర పరిశ్రమ, ఆక్వాకల్చర్‌ రంగం, తోలుతో సంబంధిత ఉత్పత్తులపై తక్షణ ప్రభావం పడనుంది. భారత్‌ నుంచి ఎగుమతి అయ్యే చాలా కొద్ది ఉత్పత్తులకే ఈ అధిక సుంకాల నుంచి మినహాయింపు ఇవ్వబడింది.
వివరాలు
భారత్‌ ఇప్పటికే తీవ్ర అభ్యంతరం
ఈ నిర్ణయంపై భారత్‌ ఇప్పటికే తీవ్ర అభ్యంతరం వ్యక్తం చేసింది. ఇది అనుచితం, అన్యాయం, అహేతుకం అని స్పష్టంచేసింది. దేశ ప్రయోజనాలను కాపాడుకునేందుకు అవసరమైన అన్ని చర్యలు తీసుకుంటామని ప్రభుత్వం వెల్లడించింది. ఇదే సందర్భంలో ప్రధాని నరేంద్ర మోదీ కూడా స్పందించారు. రైతులు, పశుపోషకులు, చిన్న తరహా పరిశ్రమల ప్రయోజనాల విషయంలో ఎట్టి పరిస్థితుల్లోనూ రాజీ పడబోమని తెలిపారు. ఈ కారణంగా భారత్‌పై అమెరికా నుంచి ఒత్తిడి పెరగొచ్చని అంగీకరించినా, కానీ దానిని భరిస్తామని స్పష్టం చేశారు.