Shubhanshu Shukla: శుభాన్షు శుక్లా యొక్క ఆక్సియం-4 మిషన్ కోసం ఇస్రో ఎంత ఖర్చు చేసిందో తెలుసా..?
ఈ వార్తాకథనం ఏంటి
నాలుగు దశాబ్దాల విరామం తర్వాత అంతరిక్ష ప్రయాణం చేసిన తొలి భారతీయుడిగా శుభాంశు శుక్లా మంగళవారం భూమికి విజయవంతంగా తిరిగివచ్చారు. ఆయనకు ఈ అరుదైన అవకాశాన్ని కల్పించడంలో భారత అంతరిక్ష పరిశోధనా సంస్థ (ఇస్రో) భారీ కృషి చేసింది. ఈ అవకాశంతోపాటు ఇస్రో భవిష్యత్తు ప్రణాళికలు కూడా ముడిపడి ఉన్నాయి. అమెరికాకు చెందిన ప్రైవేట్ సంస్థ అయిన యాక్సియం స్పేస్ నిర్వహించిన ఏఎక్స్-4 మిషన్‌లో భాగంగా భారత వాయుసేన గ్రూప్ కెప్టెన్ శుభాంశు శుక్లా అంతర్జాతీయ అంతరిక్ష కేంద్రం (ఐఎస్ఎస్)కు ప్రయాణించారు.
వివరాలు
2027లో భారత్ తొలి స్వదేశీ మానవ సహిత అంతరిక్ష యాత్ర 'గగన్‌యాన్'
వాస్తవానికి ఈ మిషన్‌లో భాగంగా ఐఎస్ఎస్‌కు వెళ్లే వ్యోమగాముల బృందంలో శుభాంశు శుక్లాకు చోటు కల్పించేందుకు ఇస్రో సుమారు రూ. 550 కోట్లు (అంటే 59 మిలియన్ డాలర్లు) ఖర్చు చేసింది. 2027లో భారత్ తొలి స్వదేశీ మానవ సహిత అంతరిక్ష యాత్ర 'గగన్‌యాన్'ను ప్రారంభించాలన్న లక్ష్యంతో ముందుకు సాగుతోంది. ఈ ప్రాజెక్టుకు నలుగురు వాయుసేన అధికారులను ఇప్పటికే ఎంపిక చేసింది. వారిలో శుభాంశు శుక్లా కూడా ఒకరు. ఈ నేపథ్యంలో ఆయనకు ప్రత్యక్షంగా, ప్రత్యక్ష అనుభవం కల్పించేందుకు, అంతరిక్ష జీవనపద్ధతులు, పరిసరాలు ఎలా ఉంటాయన్న అవగాహన కలిగించేందుకు ఇస్రో ఈ భారీ మొత్తాన్ని వెచ్చించింది.
వివరాలు
ఇస్రో లక్ష్యం నెరవేరింది
ఏఎక్స్-4 మిషన్‌లో భాగంగా శుభాంశు శుక్లా ఇతర వ్యోమగాములతో కలిసి 20 రోజులు అంతర్జాతీయ అంతరిక్ష కేంద్రంలో గడిపారు. అక్కడ సాంకేతిక పరిజ్ఞానం, వాతావరణ పరిస్థితులు, జీవనశైలిలో ఉన్న భిన్నతలు, నిర్వహణా వ్యవస్థ వంటి అంశాలపై అనుభవాలను సొంతం చేసుకున్నారు. ఈ అనుభవం ఆయనకు గగన్‌యాన్ మిషన్‌లో అమూల్యమైన దోహదంగా నిలవనుంది. ఇటీవలే ఇస్రో చైర్మన్ వి. నారాయణన్ కూడా ఇదే విషయాన్ని ధృవీకరించారు. యాక్సియం స్పేస్ మిషన్ అనేది భారత్ చేపట్టనున్న గగన్‌యాన్ మిషన్‌కు ఆరంభంగా మారిందని ఆయన వ్యాఖ్యానించారు. ఈ మిషన్ ద్వారా పొందిన అనుభవాలు, నేర్చుకున్న పాఠాలు భారత మానవ సహిత అంతరిక్ష యాత్రలకు కీలకంగా ఉపయోగపడతాయని నారాయణన్ స్పష్టం చేశారు.
వివరాలు
రీహ్యాబిలిటేషన్ కేంద్రంలో ప్రత్యేక పర్యవేక్షణ
ఏఎక్స్-4 మిషన్ కమాండర్ అయిన అమెరికాకు చెందిన పెగ్గీ వైట్సన్, పోలాండ్‌కు చెందిన స్లావోజ్ ఉజ్నాన్‌స్కీ విస్‌న్యూస్కీ, హంగరీకి చెందిన టైబర్ కాపులతో కలిసి శుభాంశు శుక్లా అమెరికాలోని కాలిఫోర్నియా రాష్ట్రంలోని శాన్ డియాగో సముద్రతీరంలో బుధవారం ల్యాండ్ అయ్యారు. అనంతరం వారందరినీ రీహ్యాబిలిటేషన్ కేంద్రానికి తరలించారు. అక్కడ ఫ్లైట్ సర్జన్ల పర్యవేక్షణలో వారంతా సుమారు వారం రోజులపాటు గడుపుతారు. భూమి వాతావరణానికి శరీర వ్యవస్థలు పూర్తిగా అలవాటుపడిన తర్వాత మాత్రమే వారిని రీహ్యాబిలిటేషన్ కేంద్రం నుంచి విడుదల చేస్తారు.
వివరాలు
ఒక్కప్పుడు రాకేశ్ శర్మ... ఈ రోజు శుభాంశు శుక్లా
భారతీయులు ఎదురుచూస్తున్న క్షణం ఆవిర్భవించింది. శుభాంశు శుక్లా విజయవంతంగా భూమికి చేరుకున్నారు. తనపై భారతదేశం పెట్టుకున్న ఆశలను శుక్లా బాగా అర్థం చేసుకున్నారు. అంతరిక్ష కేంద్రం నుంచి ఆయన భారతదేశానికి పంపిన సందేశం ఇందుకు నిదర్శనం. ''అంతరిక్షం నుంచి నేను భారతదేశాన్ని చూశాను. అది గొప్ప ఆశయాలతో, నిర్భయంగా, విశ్వాసంతో ముందుకు సాగుతోంది. సారే జహా సే అచ్చా అంటూ నినదించాలనిపించేలా భారతదేశం కనిపించింది'' అని శుక్లా తన సందేశంలో పేర్కొన్నారు. గతంలో 1984లో భారత వాయుసేన వింగ్ కమాండర్ రాకేశ్ శర్మ అంతరిక్ష ప్రయాణం చేశారు. అంతర్జాతీయ అంతరిక్ష కేంద్రంలో అడుగుపెట్టిన తొలి భారతీయుడిగా ఆయన చరిత్రలో నిలిచారు. ఇప్పుడు ఆ ఘనతను శుభాంశు శుక్లా కొనసాగించారు.