ISRO PSLV Third Stage Engine Test: ఇస్రో మరో విజయం..పీఎస్‌ఎల్‌వీ మూడోదశ ఇంజిన్‌ టెస్ట్ సక్సెస్
ఈ వార్తాకథనం ఏంటి
వరుసగా రెండు పీఎస్‌ఎల్‌వీ ప్రయోగాల్లో ఎదురైన సమస్యల తర్వాత ఇస్రోకు ఊరటనిచ్చే పరిణామం చోటుచేసుకుంది. రాకెట్‌లో అత్యంత కీలకమైన మూడో దశ (PS3) ఇంజిన్‌కు చేసిన మెరుగుదలలపై నిర్వహించిన గ్రౌండ్ టెస్ట్ విజయవంతమైంది. ఆంధ్రప్రదేశ్‌లోని శ్రీహరికోట సతీష్ ధావన్ అంతరిక్ష కేంద్రంలో ఈ పరీక్ష జరిగింది. ఈ ఫలితం శాస్త్రవేత్తల్లో కొత్త నమ్మకాన్ని పెంచింది. పరీక్షలో లభించిన డేటాను పూర్తిగా విశ్లేషించిన తర్వాత తదుపరి ప్రయోగాలపై నిర్ణయం తీసుకోనున్నారు.
Details
పీఎస్‌ఎల్‌వీకి ఎందుకంత ప్రాధాన్యం?
భారత అంతరిక్ష ప్రయోగాల్లో పీఎస్‌ఎల్‌వీకి ప్రత్యేక స్థానం ఉంది. చంద్రయాన్-1, మంగళయాన్, ఆదిత్య-ఎల్1 వంటి కీలక మిషన్లలో ఈ రాకెట్ సేవలు అందించింది.
అయితే 2025 మే 18న పీఎస్‌ఎల్‌వీ-సీ61, 2026 జనవరి 12న పీఎస్‌ఎల్‌వీ-సీ62 ప్రయోగాలు విఫలమయ్యాయి.
రెండు సందర్భాల్లోనూ మూడో దశలో సాంకేతిక సమస్యలు తలెత్తినట్లు పరిశీలనలో వెల్లడైంది. దీంతో అసలు సమస్య ఎక్కడుందనే దానిపై ఇస్రో ప్రత్యేక దృష్టి పెట్టింది.
Details
మూడో దశలో కీలక మార్పులు
వైఫల్యాల కారణాలను పరిశీలించేందుకు జాతీయ స్థాయి నిపుణుల కమిటీని ఏర్పాటు చేశారు.
దాని సూచనల ఆధారంగా మూడో దశ ఘన ఇంధన మోటార్‌లో పలు మార్పులు చేశారు. మోటార్ డిజైన్, నాజిల్ ప్రాంతం, యాంత్రిక అనుసంధానాలు, సీలింగ్ వ్యవస్థలతో పాటు ముడి పదార్థాల ఎంపిక, నాణ్యతా పరీక్షలను కూడా పునఃపరిశీలించారు.
ఇలా ఒక్కో అంశాన్ని సరిచేసిన తర్వాతే మెరుగుపరిచిన ఇంజిన్‌ను పరీక్షకు తీసుకెళ్లారు.
Details
తదుపరి ప్రయోగాలపై ఆశలు
శ్రీహరికోటలో జరిగిన తాజా పరీక్ష విజయవంతం కావడం పీఎస్‌ఎల్‌వీ భవిష్యత్ ప్రయోగాలకు కీలక సంకేతంగా మారింది.
ముఖ్యంగా విదేశీ ఉపగ్రహాలను కూడా కక్ష్యలోకి చేర్చే వాణిజ్య ప్రయోగాల్లో పీఎస్‌ఎల్‌వీకి మంచి ప్రాధాన్యం ఉంది.
తాజా పరీక్షలో సేకరించిన సమాచారాన్ని శాస్త్రవేత్తలు విశ్లేషించిన తర్వాత తదుపరి దశలను ఖరారు చేస్తారు.
వరుస వైఫల్యాల నుంచి పాఠాలు తీసుకుని సాంకేతిక మార్పులతో ముందుకు సాగుతున్న ఇస్రోకు ఈ విజయం కీలక బూస్ట్‌గా నిలిచింది.