Sam Altman on AI agents: సాఫ్ట్వేర్ ఇంజనీర్ల స్థానంలో AI ఏజెంట్లు వస్తారా? ఓపెన్‌ఏఐ సీఈఓ ఏమన్నారంటే..?
ఈ వార్తాకథనం ఏంటి
ఓపెన్‌ఏఐ వ్యవస్థాపకుడు, సీఈఓ సామ్ ఆల్ట్‌మాన్‌ ఇటీవల ఏఐ ఏజెంట్లను అందుబాటులోకి తెచ్చే ప్రణాళికలను వెల్లడించారు. ఈ ఏఐ ఏజెంట్లు భవిష్యత్తులో మనుషులకు వర్చువల్‌ సహాయకులుగా మారుతాయని చెప్పారు. ఇటీవలే ఒక బ్లాగ్‌ పోస్టులో, అనుభవజ్ఞులైన సాఫ్ట్వేర్ ఇంజినీర్‌ చేసే పనులను ఈ ఏఐ ఏజెంట్లు సమర్థంగా నిర్వహించగలవని వివరించారు. అలాగే, ఆర్టిఫిషియల్‌ ఇంటెలిజెన్స్‌ విస్తృతి ఎలా మారబోతోందో కూడా వివరంగా చర్చించారు. సాధారణంగా, ఒక సాఫ్ట్వేర్ కంపెనీలో ఇంజినీర్‌ చేసే పనిని ఈ ఏఐ ఏజెంట్లు పూర్తి చేయగలవని ఆల్ట్‌మన్‌ తెలిపారు. అయితే, వీటికి స్వతంత్ర ఆలోచనా శక్తి ఉండదని, కేవలం కేటాయించిన పనులను మాత్రమే పూర్తి చేయగలవని పేర్కొన్నారు.
వివరాలు
ఏఐ ఏజెంట్లతో పాటు మానవ జోక్యం కూడా తప్పనిసరిగా అవసరం
అందువల్ల, ఏఐ ఏజెంట్లతో పాటు మానవ జోక్యం కూడా తప్పనిసరిగా అవసరమవుతుందని తెలిపారు. దీర్ఘకాలంలో, వివిధ రంగాల్లో ఈ ఏఐ ఏజెంట్లు మరింత ప్రాధాన్యం పొందే అవకాశముందని అన్నారు. అలాగే, 2024లో ఏఐ విధానం ఏ విధంగా ఉన్నదో, 2025లోనూ దాదాపు అలానే కొనసాగుతుందని తెలిపారు. కానీ, దీన్ని శాశ్వతంగా అలానే ఉండిపోతుందని మాత్రం నిర్ధారించలేమని పేర్కొన్నారు. ఏఐ టెక్నాలజీ వినియోగానికి వచ్చే ఖర్చు ప్రతి ఏడాది పదింతలు తగ్గుతున్నందున, దీని ప్రాముఖ్యత మరింతగా పెరుగుతుందని వివరించారు.
వివరాలు
ఏఐ కారణంగా ఉద్యోగ నష్టం
ప్రధాన టెక్ కంపెనీలు ఏఐ ప్రభావం ఉద్యోగాలపై పెద్దగా ఉండదని చెబుతూనే, ఉద్యోగుల తొలగింపులు చేపడుతున్నాయి. ఖర్చులను తగ్గించుకునే ఉద్దేశంతో కంపెనీలు ఉద్యోగులను తగ్గిస్తూ, ఆ స్థానంలో ఏఐ సాంకేతికతను వినియోగిస్తున్నాయి. ఉదాహరణగా, ఫేస్‌ బుక్‌ మాతృ సంస్థ మెటా ఇప్పటికే తమ అనువర్తనాల కోడింగ్‌ పనులను ఏఐ ఆధారిత ఇంజినీర్ల సహాయంతోనే నిర్వహిస్తున్నట్లు ప్రకటించింది. గూగుల్‌ సీఈఓ సుందర్‌ పిచాయ్‌ ప్రకారం, గూగుల్‌లో 25% కోడ్‌ను ఏఐ రూపొందిస్తోందని, అయితే చివరికి ఇంజినీర్లు ఆ కోడ్‌ను సమీక్షించి ఆమోదం తెలుపుతున్నారని వివరించారు.