Dimuth Karunaratne: 36 సంవత్సరాల వయస్సులో అంతర్జాతీయ క్రికెట్‌కు వీడ్కోలు పలికిన దిగ్గజ బ్యాటర్..
ఈ వార్తాకథనం ఏంటి
శ్రీలంక దిగ్గజ బ్యాట్స్‌మన్, మాజీ కెప్టెన్ దిముత్ కరుణరత్నే అంతర్జాతీయ క్రికెట్‌కు గుడ్‌బై చెప్పాడు.
36 సంవత్సరాల వయస్సులో అతను రిటైర్మెంట్ ప్రకటించాడు. ఫిబ్రవరి 6న గాలెలో ఆస్ట్రేలియాతో జరిగే రెండో టెస్ట్ మ్యాచ్ అనంతరం అతను అంతర్జాతీయ క్రికెట్‌కు వీడ్కోలు పలకనున్నాడు.
ఈ మ్యాచ్ అతని 100వ టెస్ట్‌గా నిలిచిపోగా, ఇది క్రికెట్‌లో అతని కెరీర్‌కు ఒక ముఖ్యమైన మైలురాయి కానుంది.
వివరాలు
2012లో న్యూజిలాండ్‌తో అరంగేట్రం
క్రిక్‌బజ్ నివేదిక ప్రకారం, కరుణరత్నే ఇటీవల తన బ్యాటింగ్‌లో ఆశించిన స్థాయిలో రాణించలేకపోయాడు.
ఈ కారణంగా, రిటైర్మెంట్ తీసుకోవాలని నిర్ణయించుకున్నాడు. గత ఏడు టెస్టుల్లో అతను కేవలం 182 పరుగులే చేయగలిగాడు.
అంతేకాదు, దేశీయ క్రికెట్‌లో కూడా తన ఫామ్‌తో ఇబ్బంది పడుతున్నట్లు కనిపించాడు.
దీని వల్ల, యువ ఆటగాళ్లకు అవకాశాన్ని కల్పించాలని భావించి, అంతర్జాతీయ క్రికెట్ నుంచి తప్పుకోవాలని నిర్ణయించుకున్నాడు.
2012లో న్యూజిలాండ్‌తో జరిగిన మ్యాచ్‌లో దిముత్ కరుణరత్నే టెస్ట్ క్రికెట్‌లో అరంగేట్రం చేశాడు.
తన తొలి మ్యాచ్‌లో, మొదటి ఇన్నింగ్స్‌లో డకౌట్ కాగా, రెండో ఇన్నింగ్స్‌లో 60 నాటౌట్‌గా నిలిచాడు.
వివరాలు
2021లో బంగ్లాదేశ్‌పై డబుల్ సెంచరీ
ఆ మ్యాచ్‌లో శ్రీలంక 10 వికెట్ల తేడాతో విజయాన్ని సాధించింది.
ఇప్పటివరకు 99 టెస్ట్ మ్యాచ్‌లు ఆడిన అతను, 16 టెస్ట్ సెంచరీలతో కలిపి మొత్తం 7,172 పరుగులు చేశాడు.
2021లో బంగ్లాదేశ్‌పై డబుల్ సెంచరీ బాది, టెస్ట్ క్రికెట్‌లో తన అత్యధిక స్కోరు 244 పరుగులు సాధించాడు.
కరుణరత్నే శ్రీలంక టెస్ట్ క్రికెట్‌లో ఒక ముఖ్యమైన ఆటగాడిగా నిలిచాడు.
టెస్టులతో పాటు 50 వన్డేలు, 34 టీ20 అంతర్జాతీయ మ్యాచ్‌లు కూడా ఆడాడు.
టెస్ట్ క్రికెట్‌లో శ్రీలంక తరఫున అత్యధిక పరుగులు చేసిన ఆటగాళ్లలో అతను నాల్గవ స్థానంలో ఉన్నాడు.
అతని ముందున్న ఆటగాళ్లు కుమార్ సంగక్కర (12,400), మహేల జయవర్ధనే (11,814), ఏంజెలో మాథ్యూస్ (8,090) ఉన్నారు.