Karun Nair : టీమిండియా స్టార్‌ ప్లేయర్‌కు గాయం… కీలక టోర్నీకి దూరం?
ఈ వార్తాకథనం ఏంటి
ఎనిమిదేళ్ల విరామం తర్వాత టీమిండియా టెస్టు జట్టులో తిరిగి అవకాశాన్ని దక్కించుకున్న కరుణ్‌ నాయర్‌ ఆశించిన స్థాయిలో ప్రదర్శన ఇవ్వలేకపోయాడు. ఇంగ్లండ్ తో జరిగిన ఐదు టెస్టుల సిరీస్‌లో నలుగురు మ్యాచ్‌ల్లో ఆడిన ఆయన మొత్తం 205 పరుగులకే పరిమితమయ్యాడు. ఈఫలితంగా జట్టులో ఆయన స్థానం అనిశ్చితంగా మారింది. మాజీఆటగాళ్లతో పాటు అభిమానులు కూడా ఆయనను జట్టులోంచి తప్పించాలని డిమాండ్‌ చేస్తున్నారు. ఇలాంటి పరిస్థితుల్లో దేశవాళీ క్రికెట్‌లో రాణించి,స్వదేశంలో జరగనున్న వెస్టిండీస్‌,దక్షిణాఫ్రికా సిరీస్‌లకు జట్టులో స్థానం పొందాలని కరుణ్‌ నాయర్‌ లక్ష్యంగా పెట్టుకున్నాడు. అయితే ఈ ప్రయత్నానికి గాయం అడ్డుపడింది. గాయం కారణంగా ఆయన దులీప్‌ ట్రోఫీ 2025 టోర్నమెంట్‌ నుంచి తప్పుకున్నారు. ఈటోర్నీలో ఆయన సెంట్రల్‌ జోన్‌ తరఫున ఆడాల్సి ఉంది.
వివరాలు
ఆగస్టు 28 నుంచి సెప్టెంబర్‌ 15 వరకు దులీప్‌ ట్రోఫీ 2025 నాకౌట్‌ మ్యాచ్‌లు
వివరాల్లోకి వెళితే.. కరుణ్‌ నాయర్‌ చేతి వేలికి స్వల్ప గాయం కావడంతో, వైద్యుల సలహా మేరకు ఆయన దులీప్‌ ట్రోఫీలో పాల్గొనకూడదని నిర్ణయించారు. ఈ టోర్నీలో ఆడకపోతే,వెస్టిండీస్‌,దక్షిణాఫ్రికాల‌తో జరగనున్న టెస్టు సిరీస్‌లకు సెలెక్టర్లు ఆయనను పక్కన పెట్టే అవకాశం ఉంది. "ఇంగ్లాండ్‌తో ఓవల్‌ వేదికగా జరిగిన ఐదో టెస్టులో రెండో ఇన్నింగ్స్‌లో బ్యాటింగ్ చేస్తున్న సమయంలో ఒక బంతి కరుణ్‌ నాయర్‌ చేతి వేలికి తాకింది. దాంతో స్వల్ప వాపు వచ్చింది. ఈ కారణంగా ఆయన దులీప్‌ ట్రోఫీలో ఆడడం లేదు" అని బీసీసీఐ వర్గాలు వెల్లడించాయి. దులీప్‌ ట్రోఫీ 2025 నాకౌట్‌ మ్యాచ్‌లు ఆగస్టు 28 నుంచి సెప్టెంబర్‌ 15 వరకు జరగనున్నాయి.