Rinku Singh: 2027 ప్రపంచకప్ గెలవాలి.. రో-కోపై రింకు సింగ్ ఆసక్తికర వ్యాఖ్యలు
ఈ వార్తాకథనం ఏంటి
భారత క్రికెట్ దిగ్గజాలు విరాట్ కోహ్లీ, రోహిత్ శర్మ 2027 వన్డే ప్రపంచకప్లో ఆడతారా? లేదా? అనే చర్చ కొంతకాలంగా కొనసాగుతోంది. రో-కోకు మరో ప్రపంచకప్ ఆడే అవకాశం ఇవ్వాలని కొందరు కోరుతుండగా.. భవిష్యత్ దృష్ట్యా యువ ఆటగాళ్లకు ప్రాధాన్యం ఇవ్వాలనే అభిప్రాయాలు కూడా వినిపిస్తున్నాయి. ఈ నేపథ్యంలో టీమ్ఇండియా బ్యాటర్ రింకు సింగ్ చేసిన వ్యాఖ్యలు ఆసక్తికరంగా మారాయి. విరాట్, రోహిత్ కలిసి 2027 వన్డే ప్రపంచకప్ను గెలవడం చూడాలని తన కోరికగా రింకు సింగ్ చెప్పాడు. వీరిద్దరూ భారత క్రికెట్కు అందించిన సేవలను గుర్తుచేస్తూ.. ప్రపంచకప్ విజేత జట్టులో రో-కో భాగంగా ఉండాలని తాను మాత్రమే కాకుండా దేశంలోని క్రికెట్ అభిమానులంతా కోరుకుంటున్నారని పేర్కొన్నాడు.
వివరాలు
రో-కోకి 2027 ప్రపంచకప్ వారికి చివరి ప్రపంచకప్ అయ్యే అవకాశం
''విరాట్ భాయ్, రోహిత్ భాయ్ ఇద్దరూ లెజెండ్స్. వారు ప్రపంచకప్లో ఆడి, ట్రోఫీ గెలిచే భారత జట్టులో భాగం కావాలని కోరుకుంటున్నా. దేశం మొత్తం కూడా అదే ఆశిస్తోంది. అది జరిగితే భారత క్రికెట్లో అదొక గొప్ప సందర్భంగా నిలుస్తుంది. ఎందుకంటే 2027 ప్రపంచకప్ వారికి చివరి ప్రపంచకప్ అయ్యే అవకాశం ఉంది. భారత్ చాలా కాలంగా వన్డే ప్రపంచకప్ గెలవలేదు. చివరిసారిగా 2011లో సొంతగడ్డపై జరిగిన మెగా టోర్నీలో విజయం సాధించింది. ఇప్పుడు 2027లో భారత్ ప్రపంచకప్ గెలిస్తే.. అది రోహిత్, విరాట్కు కూడా ప్రత్యేకంగా నిలుస్తుంది. అందుకే వీరిద్దరూ జట్టులో ఉండి దేశానికి ట్రోఫీ అందించాలని ఆశిస్తున్నా'' అని రింకు సింగ్ వ్యాఖ్యానించాడు.
వివరాలు
లార్డ్స్ వేదికగా శతకంతో అదరగొట్టి హిట్మ్యాన్
2024లో టీ20 ప్రపంచకప్ గెలిచిన అనంతరం విరాట్ కోహ్లీ, రోహిత్ శర్మ అంతర్జాతీయ టీ20లకు వీడ్కోలు పలికారు.
ఆ తర్వాతి ఏడాదిలోనే టెస్టు క్రికెట్ నుంచి కూడా తప్పుకున్నారు. దీంతో ప్రస్తుతం వన్డే ఫార్మాట్లో మాత్రమే కొనసాగుతున్న వీరిద్దరూ ఇంకా ఎంతకాలం క్రికెట్ ఆడతారనే చర్చ మొదలైంది.
వయసు,ఫిట్నెస్,జట్టులో యువ ఆటగాళ్లకు లభిస్తున్న అవకాశాలను పరిగణనలోకి తీసుకుంటే.. వచ్చే ఏడాది జరిగే వన్డే ప్రపంచకప్కు రోహిత్,విరాట్ను ఎంపిక చేస్తారా? అనే ప్రశ్నలు వినిపిస్తున్నాయి.
ఇటీవల రోహిత్ శర్మ రిటైర్మెంట్ ప్రకటించనున్నాడనే వార్తలు కూడా వచ్చాయి.
అయితే లార్డ్స్ వేదికగా శతకంతో అదరగొట్టి హిట్మ్యాన్ తన ఫామ్ను చాటుకున్నాడు.
ఈ నెలాఖరులో భారత్ వేదికగా వెస్టిండీస్తో జరిగే వన్డే సిరీస్లో రోహిత్,విరాట్ బరిలోకి దిగనున్నారు.
వివరాలు
ఈ ఏడాది విరాట్ కోహ్లీ 384 పరుగులు
విరాట్ కోహ్లీ ఇప్పటివరకు 314 వన్డేల్లో 14,941 పరుగులు సాధించాడు. ఇందులో 54 సెంచరీలు, 79 అర్ధశతకాలు ఉన్నాయి.
రోహిత్ శర్మ 288 వన్డేల్లో 11,895 పరుగులు చేశాడు. అతడి ఖాతాలో 34 సెంచరీలు, 62 అర్ధశతకాలు ఉన్నాయి.
ఈ ఏడాది విరాట్ కోహ్లీ ఆరు ఇన్నింగ్స్ల్లో 106 స్ట్రైక్రేట్తో 384 పరుగులు చేశాడు.
రోహిత్ శర్మ తొమ్మిది ఇన్నింగ్స్ల్లో 379 పరుగులు నమోదు చేశాడు. దీంతో 2027 ప్రపంచకప్లో వీరిద్దరి భవిష్యత్తుపై ఆసక్తి మరింత పెరిగింది.